නිරෝගීකම සම්පතකි. රෝගීකම දුකකි. පිළිකා රෝගය ඇත්තේ එහි අන්තයේමැයි
කිවහොත් අතිශෝක්තියක් නොවේ. කාලයක් තිස්සේ වේදනා විඳීමට සිදුවීමත්
ජීවිතය පිළිබඳව ඇති අනිශ්චිතතාවත් මේ රෝගයේ කටුක බව උග්‍ර කරවයි. අද බටහිර වෛද්‍ය
විද්‍යාවට අනුව පිළිකා රෝගයට ලබාදෙන ප්‍රතිකාරද එතරම් සහනකාරී නොවේ.
පිළිකා රෝගයට දෙන බෙහෙත් සාමාන්‍ය මිනිසුන්ට දරාගත නොහැකි තරම් මිල
අධිකය. ඒ නිසාම ඒ රෝගීනුත් ඔවුන්ගේ පවුල්වල අයත් අසහනයට පත්වෙති. බටහිර ප්‍රතිකාර
කෙරෙන ක්‍රමයද සහනදායී නොවේ. බොහෝ විට පිළිකා රෝගයට කෙරෙන ප්‍රතිකාර වල
අතුරු පල රෝගයටත් වඩා දරුණුය, කල් පවතී. හැම රෝහලකම මේ ප්‍රතිකාර නැත. ගම් රටවල් වලින් ඈත පිහිටි රෝහලකට
ඇතුල්වුනු පසු රෝගියා තම පවුලෙන් නෑ හිත මිතුරන්ගෙන් වෙන් කෙරේ. මේ කිසි එකකටත් වඩා අසහනකාරී කරුණ පිළිකා රෝගය
නිට්ඨාවටම සුව කිරීමට බටහිර වෛද්‍ය විද්‍යාවට නොහැකි වීමය. ඊටත් වඩා
වැදගත් බටහිර වෛද්‍ය විද්‍යාව පිළිකා රෝගයෙන් වැලකී සිටිය හැකි පිළිවෙතක් කියා
නොදීමය.
මීට දශක කිහිපයකට ඉහතදී අප රටේ පිළිකා රෝගීන් මෙතරම් බහුල නොවුනු බව මගේ
හැඟීමය. දියුණු වෙමින් පවතින (බටහිර අනුකරනය කරන) රටවල මෙන්ම ඊනියා දියණු
(බටහිර) රටවලද පසුගිය කාලය තුල පිළිකා රෝගීන්ගේ අඩුවීමක් දකින්නට නැතැයි
පැවසේ. දියවැඩියාව නම් සීනි අඩුවෙන් පාවිච්චි කිරීමෙන් වලකා ගත හැකි යැයි
සිතමු. පිළිකා රෝගයෙන් වැලකී සිටින්නේ කෙසේද? පිළිකා රෝගය කරුමෙට වැළඳෙන රෝගයක් යැයි යමෙකු සිතුවොත් එය එතරම්
අසාධාරන නොවේ. නමුත් බුදු දහමේ නියාම ධර්ම වලට අනුව නම් සියල්ල කරුමයට බැර කල නොහැකිය.
පිළිකා රෝගයෙන් වැලකී සිටින්නේ කෙසේද යන ප්‍රශ්ණයට පිළිතුරු දිය හැක්කේ
පිළිකා රෝගය වැලඳෙන්නේ ඇයි දැයි දැන ගත හොත් පමණි. බටහිර විද්‍යාඥයින්
පසුගිය අඩ ශතකය තුල මේ සම්බන්ධයෙන් මහා පරිමාණ ලෙස පර්යේශණ කරමින් සිටින
අතර ඔවුන් විසින් පල කර ඇති විද්‍යා ප්‍රබන්ධ ගණනින් එන්ට එන්ටම සීඝ්‍ර
ලෙස වැඩිවන බවද පෙනේ. මේ අතර වැදගත් යැයි සැලකෙන සැම පර්යේශණකින්ම
පාහේ නව පිළිකා කාරකයක් සොයා ගැනේ. ඒ අනුව අද වෙන විට බටහිර විද්‍යාඥයින්
විසින් රසායනික ද්‍රව්‍ය (අණු හෝ පරමාණ) දහස් ගණනක් පිළිකා රෝග කාරක ලෙස
හඳුනාගෙන ඇත. මේවා සමහරක් අපි ගෙදර දොරේ පාවිච්චි කරන දෑය, සමහර දෑ කෑමේ
බීමේ ඇත, සමහර දෑ සමහර දෑ කෘෂි රසායනය, තවත් සමහර දෑ සිරුරේම නිපදවෙන දෑය. මේතරම් දේ දැන ගෙනද පෙනහළු පිළිකා වැනි යම්
විශේෂ අවස්ථාවලදී හැරෙන්නට අහවල් දේ පිලිපැදීමෙන් පිළිකා රෝගයෙන් වැලකී සිටිය හැකි යැයි කීමට බටහිර විද්‍යාව
සමත් වී නැත. රෝග කාරක හඳුන්නේනම් රෝගයෙන් වැලකී සිටීමට ක්‍රමයක් සොයා
ගත නොහැකි ඇයි? ඒ නොහැකියාව බටහිර විද්‍යාවේම මුල් බැස ගත්තකි.
විද්‍යාඥයින් පිළිකා රෝග කාරකයින් සොයා ගන්නේ විද්‍යාගාර තුල තත්ව පාලණය කරමින් සිදු කරනු ලබන පර්යේශණ මඟිනි. බොහෝවිට මේ පර්යේශණ සඳහා යොදා ගැනෙන්නේ සතුන් හෝ කෘතිම ෙසෙල පද්ධතිය. නමුත් සමාජයේ ගැවසෙන මිනිසුන් සම්බන්ධයෙන් තත්ව පාලනයක් කල නොහැකිය. ඔවුහු තම ජීවිතයේදී විවිධ පිළිකා රෝග කාරකවලට මුහුණ දෙති. ඒ නිසා යම් එක් පිළිකා වර්ගයක් සම්බන්ධයෙන් සමාජයේ කෙරෙන පර්යේශණයකදී විද්‍යාගරයේ කෙරෙන පර්යේශණයකදීට වඩා වෙනස් හෝ ඊට වැඩි රෝග කාරක කුලකයක් සමුවිය හැකිය. ඊට අමතරව ඒ කුලකයටම මුහුණ දෙන සමහරක් මිනිසුන්ට ඒ පිළිකා රෝගය වැලඳෙන්නේ නැතිවීමටද හැකිය මන්ද විද්‍යාගාරයේ සතුන්ට වඩා මිනිසුන් අතර විවිධත්වයක් ඇති බැවිනි. ඒ නිසා යම් පිළිකා වර්ගයක් යම් රෝග කාරක කුලකයට සංඛ්‍යානම ක්‍රම භාවිතා කරමින් සම්බන්ධ කරන්නට යෑමේදී බටහිර විද්‍යාවට ප්‍රශ්ණයක් මතුවේ. මේ ප්‍රශ්ණය තවත් බරපතල වන්නේ බටහිර විද්‍යාව විසින්ම හඳුනාගන්නා පිළිකා රෝග කාරක ගණනින් එන්ට එන්ටම වැඩි වීමය. මිනිසුන්ට යම් පිළිකාවක් හැදෙන්නේ අහවල් හේතුව යැයි බටහිර විද්‍යාවට නිශ්චිතව ඔප්පු කල නොහැක්කේ බටහිර විද්‍යාච පිලිපදින ක්‍රමය තුල එය කල නොහැකි නිසාය. හේතුව නොදැන රෝගයෙන් වැලකී සිටිය නොහැකිය.
පිළිකා රෝගය හඳුනාගැනීමටත් තරමකට කලමණාකරනය කර ගැනීමටත් බටහිර විද්‍යාව
යම් සමත් කමක් දක්වා ඇත. නමුත් ඊට වඩා වැඩියෙන් වැදගත් වෙන්නේ රෝගයෙන්
වැලකී සිටින ක්‍රමයයි. බටහිර විද්‍යාවට එයට පිළිතුරක් නැත්තේ බටහිර
විද්‍යාව ප්‍රශ්ණය බලන ආකාරය නිසාය. තවමත් බටහිර ජීව හා වෛද්‍ය විද්‍යාවට
නිව්ටන්ගෙන් ගැලවීමට හැකි වී නැත. බටහිර විද්‍යාව පිළිකා රෝගය හදාරන්නේ
කොටස් වලට කඩා ගෙනය. මේ වෙනවිට රෝග කාරකයැයි හඳනාගන්නා අණු දහස් ගණනක් සොය
ගෙන ඇත. ඉදිරියේදී ඒ ගණන තවත් වැඩිවනු මිස අඩුවෙන්නේ නැත. මේ අණු සහ
ජීවත්වෙන මිනිසෙකුගේ පිළිකාවක් අතර නිශ්විත සම්බන්ධ කමක් බටහිර විද්‍යාවට
ගොඩනැඟිය නොහැකිය. ප්‍රශ්ණය එහි ඇති සංකීර්නබව නොවේ සමස්ථය කොටස් වලට කඩා ගෙන
විමසීමමය. අපේ සර්වාංග වෛද්‍යවරුන්ට හැකි වුනද බටහිර විද්‍යාවට
සමස්ථය කොටස් නොකර අවබෝධ කරගැනීමට නොහැකිය.
නමුත් බටහිර විද්‍යාවේ අධාරයක් නැතිව වුවද අපට මේ රෝගයත් රෝගීන්ගේ
වටපිටාවත් පසුගිය කාලය තුල රෝගය වර්ධනය වී ඇති ආකාරයත් ගැන සලකා බලා ඉතා
පැහැදිලිව යම් දෙයක් අවබෝධ කරගත හැකිය. අපේ පරිසරය විසවීම, අපි හුස්ම ගන්න
වාතය විස වීම, අපි කන බොන දෑ විස විම, එදිනෙදා ජීවිතයේ තරඟකාරිත්වය මේ සියල්ලගේ එකතුව එසේත් නැත්නම් අද අපි
ජීවත්වන ක්‍රමයම පිළිකා රෝගයට හේතු කාරක වෙන බව සිතා ගැනීමට සාමාන්‍ය බුද්ධියක් ඇති බටහිර විද්‍යාව නූගත්
ඕනෑම වැඩිහිටියෙකුට අපහසු නැත. බටහිර විද්‍යාව හඳුනාගෙන ඇති දහස් ගණන් රෝග
කාරක අණුවලින් දැකිය හැකි සමස්ථය එය නොවේද?
නමුත් ඔප්පු කිරීම් බලාපොරොත්තු වෙන බටහිර විද්‍යාවට ඒ බව ඔප්පු කල
නොහැකිය. බටහිර විද්‍යාවට ඔප්පු කල හැක්කේ පිළිකා රෝගයට හේතුවෙන අණු දහස් ගණනක්
ඇති බවය. අපේ අරමුණ විය යුත්තේ පිළිකා රෝගය හඳුනාගැනීමවත් ඊට හොඳ ප්‍රතිකාර
ලබාදීමවත් නොව ඉන් වැලකී සිටීමටය. නිරෝගීව සිටින්නට නම් අනුමාණයක්
නැතිව අද අපි අනුගමණය කරන බටහිර ජීවන ක්‍රමයෙන් ඈත්විය යුතුය. අපි බටහිර විද්‍යාව
පෙන්වා දෙන තෙක් සිටියොහොත් කිසි දිනෙක අපිට පිළිකා රෝගයෙන් වැලකී සිටීමට නොහැකිවනු ඇත.
ජානක වංශපුර
2014-03-26
2014-03-26