Wednesday,
January 9, 2019
පුළුවන් තරම් බලය බෙදන්න ඕනෑ
බැසිල්
රාජපක්ෂ
ශ්‍රී ලංකා පොදුජන පෙරමුණ
ශ්‍රී ලංකා පොදුජන පෙරමුණ
ජනාධිපති
මෛත්‍රීපාල සිරිසේන හදිසි ජනා ධිපති වරණය ක් කැඳෙව්වොත් ශ්‍රී ලංකා පොදුජන පෙරමුණේ සහායෝගය දෙනවාද?
අපි එහෙම තීන්දුවක් අරගෙන නැහැ. මම හිතන්නේ මේ වෙලාවේ ජනාධිපතිවරණයකට යෑම ඒ තරම් සුදුසු නැහැ. දැන් සමහරු කියනවා මහින්ද රාජපක්ෂ මැතිතුමා ගත්ත තීරණය වැරදියි කියලා. මම ඒ තීරණයේ හරි වැරැද්ද ගැන අදහසක් කියන්නේ නැහැ. එහෙත්, එහෙම සාකච්ඡාවක් තියෙන වෙලාවක හදිසි ජනාධිපතිවරණයක් කැඳවීම අවාසියක් වේවි. අනෙක ජනතාව මෛත්‍රීපාල සිරිසේන ජනාධිපතිවරයාට ඡන්දය ලබාදුන්නේ වසර හයක් සඳහා. ජනාධිපතිවරයා වසර පහකට ඒ කාලය සීමා කරගත්තා. ඊටත් ඉහා ගිහින් තවත් කාලය සීමා කරගැනීම සුදුසුයි කියලා මම හිතන්නේ නැහැ. කෙසේ වෙතත් 2019 අග ජනාධිපතිවරණයක් පැවැත්විය යුතුයි.
පොදුජන
පෙරමුණට 2019 අවුරුද්දේ තියෙන සැලසුම් මොනවාද?
ජනාධිපතිවරණයට
අපේ රට සූදානම් කිරීම තමයි මූලිකම වැඬේ. ඒ අතරේ ඇල්පිටිය පළාත් පාලන ආයතනයේ
මැතිවරණය පැවැත්විය යුතුයි. ඊට අමතරව පළාත් සභා තුනක මැතිවරණ දැනටමත් අවුරුද්දයි
මාස දෙකක් තිස්සේ කල් දාලා තියෙනවා. මේ වර්ෂය අවසාන වෙද්දී පළාත් සභා නවයේම
මැතිවරණ පැවැත්විය යුතුමයි. ප්‍රජාතන්ත්‍රවාදය ගැන ඉහළින් කතාකරන එජාපයටත්, වැඩි
වැඩියෙන් බලය බෙදන්නැයි ඉල්ලන දෙමළ ජාතික සන්ධානයටත් පළාත් සභා කල් දාන්න බැහැ. ඒ
නිසා මැතිවරණ රැසකට මේ වර්ෂයේදී මුහුණදෙන්නට සිදුවේවි. ඉදිරි කාලය තුළ මේ රටේ
ජනතාවගේ මතය ප්‍රකාශ කිරීමට අවස්ථාවක් තියෙනවා. ලංකාවේ වැඩිම මහජන නියෝජිතයන්
පිරිසක් ඉන්න දේශපාලන පක්ෂය විදියට අපි රටේ ප්‍රධාන ප්‍රශ්න කිහිපයකට අවධානය
යොමුකරලා තියෙනවා. ඒ ප්‍රශ්නවලට විසඳුමක් ලබාදෙන වැඩපිළිවෙළක් එක්ක එන්න
බලාපොරොත්තු වෙනවා. ඒ වැඩපිළිවෙළ සකස් කිරීම තමයි කරන්න බලාපොරොත්තු වෙන්නේ.
ශ්‍රී
ලංකා පොදුජන පෙරමුණ සහ මහින්ද රාජපක්ෂ අතර තියෙන සම්බන්ධය මොකක්ද?
පැහැදිලිවම අතිසමීප සම්බන්ධයක්. මහින්ද රාජපක්ෂ ජනාධිපතිතුමා හා පොදුජන පෙරමුණ අතර සම්බන්ධය ඈත් කරන්න බැහැ. ආරම්භයේ පටන්ම එතුමා තමයි පක්ෂයේ පරමාදර්ශී නායකයා. එතුමාගේ නායකත්වයෙන් තමයි සියලු දේ කළේ. එතුමාගේ දැක්ම තමයි අපේ පක්ෂයේ දැක්ම. ළඟදී සාමාජිකත්වය සම්බන්ධයෙන් ඇතිවුණ ප්‍රශ්නය දේශපාලනික වශයෙන් අපේ පක්ෂයට වැදගත්කමක් නැහැ. එතුමාගේ සාමාජිකත්වය තියෙනවාද නැද්ද කියන එක සලකන්නේ නැහැ. එතුමා වෙනුවෙන් තමයි මේ පක්ෂය බිහි කළේ. එතුමාගේ අනුගාමිකයින් තමයි මේ පක්ෂයේ ඉන්න සියලුදෙනාම. සාමාජිකත්වය සම්බන්ධව දැන් අර්බුදයක් තියෙන්නේ ව්‍යවස්ථාමය පසුබිම නිසායි. එහෙත් පහුගිය කාලයේ අපේ පක්ෂයේ සියලු කටයුතුවලට සම්බන්ධ වුණ මහජන නියෝජිතයන් බොහෝ දෙනෙක් නිල වශයෙන් පක්ෂයේ සාමාජිකත්වය අරගෙන තිබුණේ නැහැ. නීතිමය රාමු ඇතුළේ ඉඳන් දේශපාලනය ගැන බලන්න බැහැ. එජාපයේත් නිල සාමාජිකත්වය නොගෙන පක්ෂයේ නායක මට්ටමේ ඉන්න පුද්ගලයො ඉන්නවානේ. ඒ නිසා මම මොහොතකටවත් ඒ ගැන කතාකරන්න කැමති නැහැ.
පාර්ලිමේන්තුව
විසුරුවා හැරීමෙන් පසුව මහින්ද රාජපක්ෂ මහතා පොදුජන පෙරමුණට එක්වේවිද?
අනිවාර්යයෙන්ම
එහෙම වේවි. මේ පක්ෂය බිහිවෙද්දී ඔක්කෝම හිටියේ ආණ්ඩුවේ. නිල වශයෙන් එජාපය හා ශ්‍රීලනිපය
හිටියා. නොනිල විදියට ජවිපෙ හා දෙමළ ජාතික සන්ධානයත් ඒ පැත්තේ හිටියා. විරුද්ධ
පක්ෂයක් තිබුණේ නැහැ. අපි කියන්නේ, දේශපාලන මඩ ගොහොරුවක
තමයි නෙළුම් පොහොට්ටුව පිපුණේ. අපේ අඩුපාඩු නැතිවම නෙවෙයි. අපි කියන්නේ නැහැ අපි
හැම අතින්ම විශිෂ්ටයි කියලා. අපි අනිවාර්යයෙන්ම සිවිල් සමාජය ශක්තිමත් කිරීම, නීතියේ
ආධිපත්‍යය ඇතිකිරීම, ආණ්ඩුක්‍රම ප්‍රතිසංස්කරණ ගැන වැඩිපුර හිතන්න ඕනෑ.
ජාතීන්, ආගම්, කුල භේදවලින් මිදිලා වැඩ කරන්න
බලාපොරොත්තු වෙන්න ඕනෑ. අනෙක් හැම කොටසක්ම එකතු කරගන්න ඕනෑ. මොනවා වුණත් ශ්‍රී
ලංකා පොදුජන පෙරමුණ තමයි ප්‍රධාන දේශපාලන බලවේගය වෙන්න ඕනෑ.
ශ්‍රීලනිපය
හා පොදුජන පෙරමුණ අතර තියෙන සම්බන්ධය මොකක්ද?
ශ්‍රීලනිපය අපේ පක්ෂයට ආසන්නම පක්ෂයක් විදියට සලකන්න පුළුවන්. ශ්‍රීලනිප බීජයෙන් තමයි අපි හටගත්තේ. ඒ නිසා ඒ පක්ෂයත් එක්ක වැඩි සමීපභාවයක් තියෙනවා. ඒ නිසා ශ්‍රීලනිපය සමඟ අපි සන්ධානගත වීමේ ඉඩක් තියෙනවා.
පොදුජන
පෙරමුණ බිහිවූ වෙලාවේ ශ්‍රීලනිපය හිටියේ එජාපය එක්ක යහපාලන ආණ්ඩුවේ. එතකොට ඔබලාගේ
දේශපා ලන බලවේගයට දේශපාලන පක්ෂයක් අවශ්‍ය බව හිතන්න පුළුව න්. එහෙත් දැන් ශ්‍රීලනිපය ආණ්ඩුවෙන් ඉවත්වෙලා. රාජපක්ෂවරු සමඟ එක්වෙන්න මෛත්‍රීපාල සිරිසේන ජන පති වරයා කැමති වෙලා. ඉතින්, පොදුජන
පෙරමුණකට දැන් අවශ්‍යතාවක් තියෙනවාද?
ශ්‍රීලනිපය යුගයේ අවශ්‍යතාවට අනුව වෙනස් වෙලා නැහැ. මම ඉහතින් පෙන්වපු නවීන තත්වයන්ට ශ්‍රීලනිපය සූදානම් වෙලා නැහැ. ඒ නිසා අපේ පක්ෂය යුගයේ අවශ්‍යතාවක් වෙලා තියෙනවා. කෙනෙක්ට කියන්න පුළුවන් අද ශ්‍රීලනිපය අවශ්‍යද කියලා. මම හිතන්නේ ශ්‍රීලනිපයටත් ඓතිහාසික කාර්යභාරයක් තියෙනවා. ඒ නිසා ඒ පක්ෂය තියෙන්න ඕනෑ. ඒත් අවශ්‍ය ප්‍රමාණයට තමන්ගේ කාර්යභාරය කරන එක ඒ නායකයන්ගේ වගකීමක්. ඒ ගැන මම කතාකරන්නේ නැහැ.
ඔබ
ඉහතින් පෙන්වූ නවීන අදහස් ගැන පොදුජන පෙරමුණේ සාමාජිකත්වය තියෙන බොහෝ දෙනෙක්
සංවේදී නැති බවයි අපට පෙනෙන්නේ. පොදුජන පෙරමුණේ අද ඉන්නේ එජනිසය සමඟ සිටි කණ්ඩායම.
ඔවුන්ගේ පරණ අදහස් වෙනස් වී ඇති බව පෙනෙන්නේ නැහැ.
ඒක තමයි අපටත් තියෙන අභියෝගය. අපි ගෙයක් හදනවා කියලා හිතමු. හිස් ඉඩමක අලු‍ත්ම ගෙයක් හදනකොට හරි ලේසියි. ඒත් තියෙන ගෙයක් නවීන විදියට අලු‍ත්වැඩියා කරන්න ගියාම වියදමත් වැඩියි, කරදරත් වැඩියි. ලංකාවේ දේශපාලනය තුළ මුල් බැසගත් මත, සම්ප්‍රදායන් තියෙනවා. ඒවා වෙනස් කරන්න අමාරුයි. එහෙත් හොඳ නායකත්වයක් තිබුණොත් ඒවා කරන්න පුළුවන්. අපි උත්සාහ කරන්නේ ඒක කරන්න තමයි.
ඔබ
ජාතිභේද නැතිව දේශපාලනය කිරීම ගැන කීවත්, පෙ ාදුජන පෙරමුණේ ඉන්න බොහෝ අය උත්සාහ කරන්නේ සිංහල ජාතිකවාදය වඩ වඩාත් ශක්තිමත් කරමින් බලයට එන්නයි.
ඒක නම් වෙනස් කරගත යුතුමයි. කවුරු මොනවා කිව්වත්. මම නම් ඒකට කැමතිම නැහැ. මම කියන්නේ නැහැ කිසිම ජාතියකට අසාධාරණයක් වෙන නීති හදන්න ඕනෑ කියලා. සමානත්වය ඇති කරන්න නීතිමය පසුබිම හදන්න ඕනෑ. මගෙනුත් අහන අය ඉන්නවා, ලංකාවේ වෙන ජනවර්ගවලට තියෙන ප්‍රශ්නය මොකක්ද කියලා. හැමෝටම සමාන අයිතීන් තියෙනවා නේද කියලා. ඒත් සුළු ජාතිකයෙකුට තියෙන ප්‍රශ්න මොනවාද කියලා ලේසියෙන් පැහැදිලි කරන්න බැහැ. තමනුත් සුළුතරය බවට පත්වුණොත් තමයි ඒ අමාරුව තේරුම් ගන්නේ. මම වෙනත් රටවල සුළුතරය විදියට ඉඳලා ඒ අත්දැකීම් ලබලා තියෙනවා. යම්කිසි කෙනෙක් දේශපාලනයෙන් බලයට එන්න ඒක යොදාගන්නවා නම් මම අනුමත කරන්නේ නැහැ.
පොදුජන
පෙරමුණ නියෝජනය කරනවා යැයි ඔබ කියන නවීන අදහස්, පක්ෂයේ
දේශපාලන නායකයන්ට එන්නත් කරන්නට සැලසුමක් තියෙනවාද?
අපි පහළ මට්ටමෙන්ම ජනතා සහභාගිත්වය ගත්තොත් හුඟ දෙනෙක් මේ සංකල්ප පිළිගනීවි. ඊට විරුද්ධ මතයක් ජනතාවටත් නැති බව පෙනෙනවා. එන්න එන්නම මධ්‍යස්ථ ඡන්ද වැඩිවෙනවා. තරුණ ඡන්ද වැඩිවෙනවා. එදාට වඩා අද මාධ්‍ය වෙනස්වෙලා. අද පත්තරයක්වත් නොකියවන තරුණයෝ ඉන්නවා. ඒත් ඔවුන්ට රටේ වෙන දේවල් ගැන ලොකු දැනුමක් තියෙනවා.
බොරු
කතා පතුරුවලා එයාලාගේ සහයෝගය ගන්න බැහැ..
බැහැ බැහැ. එයාලා දන්නවා හැමදේම. අපේම ඉතිහාසය ගැන අපටත් වඩා හොඳට එයාලා කියනවා. ඒ නිසා අපි ඒ අය එක්ක දේශපාලනය කරන්න සූදානම් වෙන්න ඕනෑ.
බලය
බෙදීමේ අවශ්‍යතාව සුළුතර ජනවර්ගවලින් නිතර මතු කරනවා. එහෙත් පොදුජන පෙරමුණ ඒ ගැන
සංවේදීද?
ඉදිරි කාලයේදී අපේ පක්ෂය ගමින් ගමට යන්න බලාපොරොත්තු වෙනවා. ගම්මාන 25,000ක විතර පිළිසඳර කියලා සාකච්ඡා මාලාවක් කරනවා. ඒ අයගේ අදහස් ගන්න බලාපොරොත්තු වෙනවා මේ ප්‍රශ්නයට විසඳුම් සෙවීම සඳහා. ජාත්‍යන්තර රටවලින් උදාහරණ ගන්නවා. අපේ පක්ෂයේ උපායමාර්ගික කාරණා ගැන වෙනම අංශයක් ඉන්නවා. බලය ජන සන්තක කරන්නේ කොහොමද කියලා අපි හොයනවා. බලය බෙදීම කියන්නේ ජාතියක් වෙනුවෙන් විය යුතු දෙයක් නෙවෙයි. මම නම් කියන්නේ බලය පුළුවන් තරම් බෙදන්න ඕනෑ. බලය බෙදීම කියන්නේ ජනතාවගේ වැඩ කටයුතු කරන්න ජනතාවට අයිතියක් දෙනවා කියන එක.■
■ තරිඳු
උඩුවරගෙදර / රේඛා නිලු‍ක්ෂි හේරත්
මෙයින් මගේ දෙමළ කතාකරන
ජනයාට දෙමළ වීම නිසා ම පමණක් ඇති ප්‍රශ්නය කුමක් ද යන ප්‍රශ්නයට
පිළිතුරක් ලැබෙන්නේ නැහැ. සිදු වී ඇති එකම දෙය බැසිල් හෙළිදරවුවීම පමණයි.
බැසිල් රටේ දේශපාලනයේ
බලසම්පන්න චරිතයක් බැවින් මේ ප්‍රශ්නය ගැන ප්‍රසිද්ධ වාදයකට එන ලෙස මා බැසිල්ට
අභියෝග කරනවා.