පසුගිය මිහිකත දිනයේ දී මෙරට ඇමරිකානු තානාපතිනිය ගාලු මුවදොර පිටියෙහි කුනු ඇහිඳිණු ජනමාධ්‍ය මගින් දුටුවෙමි. මිහිකත දිනය අපේ සංකල්පයක් නො වේ. අම්මගෙ දිනය, පියාගෙ දිනය, කාන්තා දිනය, ගුරු දිනය ආදී වශයෙන් දින ගණනාවක් බටහිරයන්ට ඇත. තානාපතිවරුන්ගේ දිනයක් ද හැකි ඉක්මණින් නියම කරගන්නේ නම් එය ලෝකයට වැඩදායක වනු ඇත. අඩුම තරමෙන් එදිනටවත් ඇමරිකන් හා වෙනත් බටහිර තානාපතිවරුන් හා තානාපතිනියන් තානාපතිකම කිරීමට උත්සාහ ගන්නේ නම් ඔවුන් සේවයේ රැඳී සිටින රටවලට එයින් යහපතක් වනු ඇත. අද බටහිර තානාපතිවරුන් තානාපතිවරියන් හැසිරෙන්නේ තමන් සේවය කරන රටේ පාලකයන් ලෙස ය. ඔවුන්ට ගැති නිවටයන් පිරිසක් ඒ ඒ රටවල සිටින බව සැබෑ ය. එහෙත් එපමණින් බටහිර රටවල හා ඉන්දියාවේ තානාපතියන් හා තානාපතිනියන් තමන් සේවයෙහි රැඳී සිටින රටවල පාලකයන් හා පාලිකාවන් බවට පත්වන්නේ නැත.
බටහිරයන්ට වසරකට එවැනි දින කීයක් ඇද්දැයි මම නො දනිමි. කොතරම් දින සංඛ්‍යාවක් තිබිණි ද එය 365ට වැඩි වේවි යැයි සිතිය නො හැකි ය. එවැනි දින සංඛ්‍යාව 365 ට වැඩි වුවහොත් අවුරුද්දේ ඇතැම් දිනක එවැනි දින කිහිපයක් තිබෙන්නට හැකි ය. මේ දින වෙන්කර ගැනීම ද බටහිර ග්‍රීක යුදෙවු ක්‍රිස්තියානි චින්තනයෙන් පැන නගින්නකි. ඔවුන්ගේ චින්තනයෙහි එකට ගැනීමක් නැත. වැඩ කරන දින වැඩ නොකරන දිනවලින් වෙන් කෙරෙයි. බටහිරයන් සිකුරාදා සවස් වනතුරු ඇඟිලි ගණින්නේ එදින වැඩකරන දින අවසන් වන බැවිනි. සිකුරාදා සවසින් පසු සඳුදා උදෑසන වනතුරු බටහිරයෝ කාර්යාලයේ වැඩ තම හිසින් අස්කර ගනිති. මේ වෙන්කිරීම කෙතරම් ද යත් ඇමරිකාවේ පාසල්වල සිසුන්ට සිකුරාදා ගෙදර වැඩ නො දෙයි. සිසුන්ගේ පාසල් සතිය ද සඳුදා උදෑසන සිට සිකුරාදා සවස වනතුරු පමණක් වෙයි. බටහිරයන් වැඩකරන දිනය සති අන්තය ආදී සංකල්ප තනාගෙන ඇත්තේ මේ වෙන්කිරීමේ ප්‍රතිපත්තිය අනුව ය. මෙරට සිටින අනුකාරකයන් කර ඇත්තේ මේ සමහර සංකල්ප කිසිම වගවිභාගයකින් තොරව අනුකරණය කිරීම පමණකි. එහෙත් මෙරට පවතින තරගකාරී අධ්‍යාපනය හේතුවෙන් ඊනියා සතිඅන්තයේ ද සිසුන්ට අනේකවිධ ගෙදරවැඩ ලැබෙයි. එසේ නොදුනහොත් දෙමවුපියන්ගේ සිත් අසතුටට පත්වෙයි.
බටහිරයන් පරිසරයට අවුරුද්දේ එක් දිනයක් වෙන්කර ඇත්තේ කුහකවතින් බව පැහැදිලි ය. බටහිර ග්‍රීක යුදෙවු ක්‍රිස්තියානි චින්තනය මත පදනම් වූ යුදෙවු ක්‍රිස්තියානි සංස්කෘතියට රැකිය හැකි පරිසරයක් නැත. පරිසරය රැකීම හා බටහිර ආර්ථික සංවර්ධනය නොරත රත මෙන් එකිනෙක සමග නො පෑහෙයි. විවිධ පරිසර සම්මේලනවල දී බටහිරයෝ අනෙක් රටවලට පරිසරය රැකීමට උපදෙස් දෙන නමුත් පරිසරය රැකීමට දායක නො වෙති. ඔවුන් ඊනියා මිහිකත දිනයක් වෙන්කර ඇත්තේ ද අනෙක් රටවල් රැවටීමේ කුහක චේතනාවෙනි. ලෝකයේ උෂ්ණත්වය දිනෙන් දින ඉහළ යන්නේත් ඕසෝන් ස්ථරය විවර වන්නේත් බටහිර ආර්ථික සංවර්ධනය හේතුවෙනි. ලෝකයේ පරිසර විනාශයට ලංකාව වැනි රටවල දායකත්වය ඉතාමත් අවම මට්ටමක පවතියි.
ලංකාවේ අද කුණු ප්‍රශ්නය සෑම නගරයක ම පාහේ දකින්නට ඇත. එහෙත් බටහිර රටවල කුණු ප්‍රශ්නයක් නැත. එයින් කියැවෙන්නේ බටහිරයන් ලෝකයට කුණු එකතු නොකරන බව නො වේ. ඔවුහු කුණු එකතු කර ඇතැම් කුණු හංගති. තවත් කුණු ලෝකයේ අනෙක් රටවලට පටවති. කුණු විනාශ කිරීමේ දී පරිසරය වෙනත් ආකාරවලින් දූෂණය නො වන්නේ ද? බටහිරයන්ට සුපුරුදු ආකාරයට මේ සම්බන්ධයෙන් සංඛ්‍යානාත්මක ව ව්‍යාජ දත්ත ඉදිරිපත් කළ හැකි ද? අපේ රටවල කුණු ප්‍රශ්නය හා රථවාහන තදබදය අතර පදනම වශයෙන් ගතහොත් වෙනසක් නැත. ඒ ප්‍රශ්න දෙකම ඇතිවන්නේ එක් පැත්තකින් බටහිර ආර්ථික සංවර්ධනය පසුපස හඹායෑමත් අනෙක් පැත්තෙන් අපට බටහිරයන්ගේ වෙන්කිරීම අපේ සංස්කෘතීන්ට අවශෝෂණය කරගැනීමට නොහැකිවීමත් නිසා ය. අපට තවමත් මෝටර් රථයෙන් යෑම හා පයින් යෑම වෙන්කර ගැනීමට නොහැකි වී ඇත.
ලංකාවේ උගතුන් යැයි කියන්නේ බටහිර දැනුම් අනුකාරකයන්ට ය. ඔවුන්ට බටහිරයන් අනුව යමින් අවිචාරයෙන් මිහිකත දීනයක් පැවැත්වීම මහා කාර්යයක් බව අමුතුවෙන් කිවයුතු නො වේ. මොවුන්ගේ අවිචාරවත් බවට කදිම නිදසුනක් පසුගිය දා ඔවුහු ම ඉදිරිපත් කළහ. ඔවුන්ගෙන් අයකු හෝ කිහිප දෙනකු හෝ එකතු වී මා එක්තරා ලාබාල දේශපාලනඥයකුට බුලත් දෙන ව්‍යාජ ඡායාරූපයක් අන්තර්ජාලයට නිකුත් කර ඇත. මට මෙකී දේශපාලනඥයා ජීවිතයට මුණ ගැසී නැත. මට ඔහුට නොව ඔහුගේ පියාටවත් බුලත් දීමේ අවශ්‍යතාවක් නැත. මගේ මව මිය යෑමෙන් පසුව මා බුලත් දුන්නේ මගේ භාර්යාවගේ මවට පමණ ය. පසුගිය දිනයක ඇය ද මියගිය බැවින් මේ අවුරුද්දේ මම කිසිම ගිහියකුට බුලත් නුදුන්නෙමි. අවුරුද්දට හැර වෙනත් දිනයක මා ගිහියන්ට බුලත් දෙන්නේ ද නැත. මා කිසි දිනෙක දේශපාලනඥයකුට බුලත් දී ද නැත. මේ ව්‍යාජ ඡායාරූපය දැකීමෙන් අමන්දානන්දයට පත් වූ මගේ දේශපාලන විරුද්ධකාරයන් මෙන් ම කසිකබල් ශාස්ත්‍රඥයෝ ද මා වැටී ඇති පහත් තත්ත්වය, මගේ වැඩවසම් මානසිකත්වය ආදිය ගැන ඉලෙක්ට්‍රොනික තැපෑලෙන් හා වෙනත් ක්‍රම මගින් තම මිතුරන්ට හා වෙනත් අයට දැනුම් දුන්හ. එහෙත් මේ සියල්ලන්ගේ ම අවිචාරයක මහත කෙතෙක් ද කිවහොත් ඔවුහු මා අඳින ජාතික ඇඳුමේ අත් මැණීක් කටුව අසල මගේ පියා කළාක් මෙන් හුළං පොදක් වැදීමට ඉඩක් ඇතිව තබන බවත් ව්‍යාජ ඡායාරූපයේ ජාතික ඇඳුමේ අත් දේශපාලනඥයන්ගේ කපටිකිටේ මෙන් මැණික් කටුව අසළ කිටි කිටියේ තදින් තබා ඇති බවත් නො දුටුවෝ ය! අඩුම තරමෙන් මීළඟ ව්‍යාජ ඡායාරූපය සකස් කරන විට මේ තක්කඩියන් මෙයට වඩා විචාරශීලි විය යුතු ය.
මේ අනුකාරකයන් ඇමරිකානු තානාපතිවරිය සමග පෙළට හිඳිමින් කුණු අහුළන ඡායාරූපයක් පූවත්පත්වල පළ නොවූයේ ඇයි ද යන ප්‍රශ්නය නම් මට ඇත. තානාපතිවරිය ඉතා පැහැදිලිව ම එක්කෝ කල ඇතිවම තම කුණු ව්‍යාපෘතිය ජනමාධ්‍යයට දන්වා ඇත. එසේත් නැත්නම් තානපති කාර්යාලයේ නිලධාරීන් ගත් ඡායාරූජ මාධ්‍යයට නිකුත් කර ඇත. ඒ කුමක් වුවත් ඇය තම කුණු ව්‍යාපෘතිය පුවතක් මැවීමට යොදා ගෙන ඇත. තානාපතිවරිය මේ පුවතින් කියන්නේ කුමක් ද? ඇයට මෙරට ගැන ඇති කැක්කුම කුමක් ද? අපට කුණු ප්‍රශ්නයක් වී ඇත්තේ අප බටහිර නගර හා පුර අනුකරණය කිරීමට යෑමෙන් ය. මේ නගර හා පුර අපේ වුවමනාවට ඉතිහාසයේ විකාශයකින් ඇති වූවක් නොව අප මත බලහත්කාරයෙන් පටවනු ලැබූ දේ ය. අපට අඩු තරමෙන් පණ්ඩුකාභය රජු දවස සිට පුර සංස්කෘතියක් තිබී ඇත. අනුරාධපුරය අපට කියා දෙන එක් කරුණක් ඒ වෙයි. එහෙත් ඒ පුර සංස්කෘතිය ග්‍රීසියේ තිබූ ඇතන්ස් ආදී පුර සංස්කෘතියෙන් ද ලන්ඩන් නිව්යෝක් වැනි වත්මන් පුර සංස්කෘතියෙන් ද වෙනස් වෙයි. අද අපට ඇත්තේ අප මත බලයෙන් පැටවූ පුර සංස්කෘතියකි. ඒ පුර සංස්කෘතිය ම කුණු පුර සංස්කෘතියකි. මේ කුණු ප්‍රශ්නය එහි ප්‍රතිඵලයකි. ඒ අනුකරණයට බටහිර අධ්‍යාපනය විසින් ගැත්තන් ද බිහි කෙරී ඇත.
තානාපතිවරිය ඉතා සියුම් ආකාරයෙන් ලෝකයාට කියන්නේ අපට කුණු ප්‍රශ්නය කළමනාකරණය නොහැකි බවත් මෙරට කුණු ප්‍රශ්නයක් වී ඇති බවත් ඇය අප කෙරෙහි පතළා වූ කරුණාවෙන් කුණු ඇහිඳින බවත් ය. අපට කුණු දුන් බටහිරයන් ම කුණු දුන් කතාව නොකියා අපට බැරිකමක් ඇතැයි සියුම් ව ප්‍රකාශ කරයි. තානාපතිවරිය මැදිහත් වන්නේ කුණු ප්‍රශ්නයට පමණක් නො වේ. බටහිරයන්ගේ ප්‍රතිපත්තිය අපට ප්‍රශ්න ඇතිකර ඒ ප්‍රශ්න අප විසින් ඇතිකර ගන්නා ලද ප්‍රශ්න යැයි අපට ම (මෙරට සිටින බටහිර ගැති අනුකාරක පුහු උගතුන්ට) ඒතතු ගන්වා ඉන්පසු ඒ ප්‍රශ්නවලට විසඳුම් ලබාදීමට ඔවුන් ම ඉදිරිපත් වීම ය. කුණු දාන්නෝ ම කුණු ඇහිඳීමට ඉදිරිපත් වෙති.
මෙරට දෙමළ ප්‍රශ්නය ඇතිකළෝ බටහිරයෝ ය. ඔවුහු දෙමළ ජාතිවාදය ඇතිකර සිංහල බෞද්ධ සංස්කෘතිය විනාශ කිරීමට ඒ යොදාගැනීමට උත්සාහ කරති. ඔවුන් හා ඉන්දියාව එකතු වී ඇති කළ දෙමළ ත්‍රස්තවාදය පරාජය කිරීමට අපේ රණවිරුවන්ට ජනාධිපතිතුමාගේ දේශපාලන නායකත්වයෙන් හැකි විය. එසේ කළේ බටහිරයන්ගේ හා ඉන්දියාවේ විරුද්ධතාව මැද ය. අද බටහිරයෝ හා ඇතැම් ආගම්වල සිංහල බෞද්ධ විරෝධී පූජකවරු ද බටහිරයන්ගේ වැටුප් ලබන කුලීකාර රාජ්‍ය නොවන සංවිධානවල නිවටයෝ ද බටහිර රටවල සිටින විසුරුණු දෙමළ ජනයා සිංහලයන්ට, සිංහල බෞද්ධ සංස්කෘතියට, ජනාධිපතිතුමාට හා ආණ්ඩුවට විරුද්ධව යොදා ගැනීමට උත්සාහ කරති.
අද සිංහල ජාතිකවාදීහු උතුරේ පළාත්සභා මැතිවරණය පැවැත්වීමට විරුද්ධ වෙති. එහෙත් ඒ විරුද්ධතාව යුක්තියුක්ත කිරීමට ඔවුන්ට නොහැකි වී ඇත. කළ යුත්තේ පළාත් සභා අහෝසි කිරීමට ප්‍රබල උද්ඝෝෂණයක් හා ව්‍යාපාරයක් සංවිධානය කිරීම ය. ජාතික ව්‍යාපාරය ශක්තිමත් ව තිබූ යුගයේ අපි චන්ද්‍රිකා ගේ පැකේජයට විරුද්ධව උද්ඝෝෂණවල නිරත වීමු. කළුතර සිට කතරගම දක්වා සංවිධානය කෙරුණු පාගමන ඉන් එකක් පමණකි. සිංහල කොමිසම ඔස්සේ ජනමතයක් ගොඩනැගීමට අපි ක්‍රියා කළෙමු. කොමිසමේ වාර්තාව අපට පිළිගත නොහැකි වුවත් ඒ මගින් ගොඩ නැගුණේ පැකේජ් විරෝධයකි. අද ඒ වෙනුවට ඇත්තේ ජාතික ව්‍යාපාරය මහින්ද රාජපක්‍ෂ මහතා අතට පත්කළ අය මාධ්‍ය මගින් කරන පුවත් මවා පෑම් පමණ ය.
පළාත් සභා අහෝසි කළ යුත්තේ ඇයි ද යන ප්‍රශ්නයට පැහැදිලි පිළිතුරක් අපට ඇත. ඊනියා දෙමළ ප්‍රශ්නය ඇතිකිරීම හා එයට පළාත් සභා විසඳුම ලබාදීමත් කුණු දැමූ අය ම කුණු ඇහිඳීමත් අතර ඇත්තේ සමානත්වයකි. බටහිරයන්ගේ දැනුමට බිය වී එය අනුකරණය කරමින් අපට විමුක්තියක් අත් නො වේ.
(13/04/28)
නලින් ද සිල්වා
