Main Logo

Sunday, 26 September 2021

බණ්ඩාරනායක ඝාතනයට අවුරුදු හැට දෙකයි

 

බණ්ඩාරනායක ඝාතනයට අවුරුදු හැට දෙකයි

 

බණ්ඩාරනායක මහතා ඝාතනය කරනු ලැබ අදට අවුරුදු හැටදෙකක් වෙනවා. එහෙත් බණ්ඩාරනායක මැතිණිය  පවසා තිබුණේ එන් එම්ලා ඇගේ සැමියා නොමරා මැරූ බව. ඒ වැඩ වර්ජන සංවිධානය කිරීමෙන්. අපි ඒ කතාවට පස්සෙ එමු. මේ කියන්න යන කතාව මා යම් ප්‍රමාණයකට කලින් කියා ඇති. 1989 භීෂණ සමයේ ශ්‍රී ල නි ප අඳුරෙන් එළියට ඒමට තැත් කරමින් හිටියේ. පක්‍ෂය කිසිදා කවන්ධයක් වුණේ නැහැ. සාහිත්‍ය කතාවලින් දේශපාලන විශ්ලේෂණ කරන්න බැහැ. ශ්‍රී ල නි පක්‍ෂයට තිබුණේ යම් ප්‍රමාණයක හරි ජාතිකත්ව හිසක්.

Saturday, 25 September 2021

වෙනස් වෙන විදේශ ප්‍රතිපත්තිය

 

වෙනස් වෙන විදේශ ප්රතිපත්තිය

 

ලංකාවේ විදේශ ප්රතිපත්තිය වෙනස් වෙමින් පවතින බව පේනවා. එයට වගකිවයුත්තන් කවුරුන්දැයි හරියට කියන්න බැහැ. එහෙත් අප රට භයානක පැත්තකට යොමු වෙමින් පවතින බව කියන්න පුළුවන්. මා දැන් හිටපු තානාපති කෙනෙක්. මට මගේ අදහස් ප්රකාශ කිරීමට බාධාවක් නැහැ. තානාපති ව කටයුතු කළත් මේ ටික කියන්න වෙනවා.

Friday, 24 September 2021

බටහිර විද්‍යා වහල්ලු

 

බටහිර විද්‍යා වහල්ලු

 

මෙරට තරම් බටහිර විද්‍යා වහල්ලු වෙනත් රටක, බටහිර රටවල් ද ඇතුළු ව, ඉන්නවා කියා මා හිතන්නේ නැහැ. මේ විද්‍යාත්මක ක්‍රමයට අමාත්‍ය මණ්ඩල  හදන රටක්. මා හිතන්නෙ මිනිසුන් චන්දෙ දෙන්නෙත් විද්‍යාත්මක ක්‍රමයට කියා. උසස් පෙළට බටහිර විද්‍යා විෂය ඉගෙන ගන්නා සිසුන් විද්‍යාත්මක ක්‍රමය හදාරනවා ද කියා මා දන්නේ නැහැ. එහෙත් උසස් පෙළ ශාස්ත්‍ර මානව ශාස්ත්‍ර ධාරාවල නම් කර්ක ශාස්ත්‍රය හා විද්‍යාත්මක ක්‍රමය හදාරනවා. ඒ අය විද්‍යාව දන්නේ නැහැ. ඒත් විද්‍යාත්මක ක්‍රමය දන්නවා!

Thursday, 23 September 2021

ඒලියන්ත වයිට් බටහිර රෝහලක මිය යයි

 ඒලියන්ත වයිට් බටහිර රෝහලක මිය යයි


ඒලියන්ත වයිට් මියගිහින්. කොවිඩ් රෝගය වැළඳී මිය ගිහින්. මිථ්‍යාවට විරුද්ධ ව අවි අමෝරා ගෙන සටන් කරන පඬියන්ට පඬි පෝතකයන්ට පඬි නැට්ටන්ට හා ඔවුන්ගේ ස්ත්‍රී ලිංගිකයන්ට හත් දා මගුල් කන්න ප්‍රවෘත්තියක්. ඔවුන් මුහුණු පොතේ පෙළහර දක්වනවා. මුට්ටි දාල කොවිඩ් හොඳ කරන්න බැහැ කියනවා. දැන්වත් මිථ්‍යාව අත්හරින්න කියනවා. මා දන්නේ නැහැ ඔවුන් කී දෙනකු විද්‍යාඥයන් ද කියා. කී දෙනකු බටහිර වෙද මහත්තුරු ද වෙද හාමිනේලා ද කියා. 

Wednesday, 22 September 2021

හිතන්නෙ නැති අපට බිංදුව

 හිතන්නෙ නැති අපට බිංදුව 


ඊයේ (සැප් 21) ලිපියේ මූලික ව සඳහන් වූයේ දෙමළ විසුරුණු ජනයා සමග කිරීමට බලාපොරොත්තු වන සාකච්ඡා පිළිබඳ ව. ජනාධිපති ගෝඨාභය එවැනි බලාපොරොත්තුවක් ගැන කීම අප පුදුමයට පත් කළ දෙයක් නො වෙයි. මින් පෙර ද ඔහු අතින් එවැනි කතා කියැවී තියෙනවා. එහෙත් යමක් කී පමණින් ඒ කෙරෙයි ද කියා තීරණය වන්නේ නැහැ. එය සමාජ බලවේග විසින් තීරණය කෙරෙන්නක්. 13 + දෙන බව කී වතාවක් ඉන්දියාවට කී දෙනකු පොරොන්දු වී තියෙනවා ද? 


ඊයේ ලිපියේ එයට අමතර ව වැදගත් කරුණු දෙකක් සඳහන් වුණා. එකක් ආන්ද්‍ර බුද්ධාගම ගැන. අනෙක බිිංදුව යන සංකල්පය සංස්කරණය කිරීම ගැන. ඇතැම් පාඨකයනට ඒ මග හැරී යන්න ඇති. ඒ මා නාභිගත නොවීම නිසා වෙන්න පුළුවන්. ඒ අතර බොහෝ පාඨකයන්ට ඒ වැදගත් වී නැහැ. එක් අයකු පමණක් අසා තිබුණා ආන්ද්‍ර බුද්ධාගමට පෙර මෙහි තිබූ බුද්ධාගම මොකක් ද කියා. මා හිතන්නේ එයට පෙර මෙහි බුදුහාමුදුරුවන් දෙසූ බුදුදහමත් අශෝක බුදුදහමත් තිබුණා ය කියා. අශෝක බුදුදහම කියා මා හඳුන්වන්නේ මිහිඳු හිමියන්ගෙන් ලැබුණු තුන්වැනි සංගායනාවේ බුදුදහම. 


මෙවැනි දේ කියනවාට විරුද්ධ පිරිසක් රටේ ඉන්නවා. ඔවුන් මහාවංසය හා අටුවාව කිසිදු විවේචනයකින් තොරව පිළිගන්නවා. ඔවුන් මූලික වශයෙන් ජාතික මතධාරීන්. එහෙත් ඔවුන් සමහර දෙනකුට මා ද්‍රෝහියෙක්. එහෙම නැත්නම් නොමග ගිය අයෙක්. මා ඔවුන්ගෙන් හා වෙනත් අයගෙන් දැනගන්න කැමතියි වළගම්බා රජු දවස ධර්මය ග්‍රන්ථාරුඪ කෙළේ මොන භාෂාවෙන් ද කියාත් ඒ පෙතපත අද දකින්ට ඇත් ද කියාත්. ඒ ප්‍රශ්නය මෙතෙක් අසා නැත්නම් හරි ඒ ගැන හිතා නැත්නම් හරි මට කරන්න දෙයක් නැහැ. 


බිංදුව ගැන නම් කිසිවකුට උනන්දුවක් ඇති වී නැහැ. එය තේරුම් ගන්න අපහසුවක් නෑහෑ. අප උනන්දුවන්නේ අපේ ජීවිතවලට සම්බන්ධ දේ ගැන. අප නිරෝධායනය වන හෝටලයේ සේවය කරන තරුණියකගේ ගම දිවුලපිටිය. මා ඇගෙන් ඇහුවා දිවුලපිටියේ කාලෝ ෆොන්සේකා දන්නවා ද කියා. ඇය දැන හිටියේ නැහැ. මා දෙවැනි දවසකත් ඇගෙන් ඇහුවා. ඇය අන්තර්ජාලය බලා ආපසු පැමිණ කීවේ ප්‍රොෆෙසර් කාලෝ ෆොන්සේකා ටීවී එකේ දැක ඇති බව. මා ඒගැන පුදුුම වූයේ නැහැ. මෙරට හේතුවාදයේ සුළුපියා වූ කාලෝ ෆොන්සේකා (පියා ඒබ්‍රහම් කොවූර්) ඇගේ ජීවිතයට කිසිසේත් සම්බන්ධ නැහැ. ඇය සමහර විට නළු නිළියන් ගායක ගායිකාවන් ක්‍රිකට් ක්‍රීඩකයන් ගැන දන්නවා ඇති. ඒත් තම ගමේ ම උපන් කාලෝ ෆොන්සේකා ගැන දන්නේ නැහැ. 


කාලෝ ශිෂ්‍යත්වය (එකල ශිෂ්‍යත්වය නොවූ බව වෙන ම කරුණක්) සමත් ද, ඔහු ජ්‍යෙෂ්ඨ විභාගය පළමු වර සමත් ද, විශ්වවිද්‍යාල ප්‍රවේශයට කී වරක් පෙනී සිටියේ ද, විශ්වවිද්‍යාලයට ඇතුල්වීමට වයස විසිදෙකක් වන තුරු නොහැකි වූයේ ඇයි ද, ප්‍රවේශ විභාගයේ වැඩ හතරෙන් දෙකක් අසමත් ද, පසුව පාඩම් හා පාඩම් ම කර රන් පදක්කම් දිනා ගත්තේ ද, හේතුවාදියකු වූයේ කවදා ද, ගිනි පෑගීමේ අරමුණ ඔහු හිතා හිටි බුද්ධාගමට පහර ගැසීම ද, කොරුන් ඇුවිද්දවන කතෝලික පූජකවරුන්ට විරුද්ධ වීමට අතපසු වූයේ හේතුවාදය එයට බලනොපාන නිසා ද, ශිෂ්‍ය අවධියේ සමසමාජ කාරයකු නොවී කථිකාචාර්යවරයකු වීමෙන් පසුව සමසමාජ කාරයකු වූයේ ඔහුගේ මනස අවදිවන්නේ කාලයක් ගත වීමෙන් පසුව නිසා ද, ආදී කරුණු වැදගත් වන්නේ මට පමණක් වන්න පුළුවන්. ඒ ඔහු උගතකු බුද්ධිමතකු නොවන මගේ ජීවිතයට සම්බන්ධ වී ඇත්තේ උගතකු බුද්ධිමතකු ලෙස නිසා. උගතකු බුද්ධිමතකු නොවන  මා උගතුන් බුද්ධිමතුන් ගැන දැනගන්න කැමතියි. 


බොහෝ අයට බිංදුව ගැන සෙවීම තම ජීවිතයට සම්බන්ධ නැහැ. පුරා විද්‍යාඥයන්ටත් එහි වැදගත්කමක් නැහැ. ඔවුන්ට ඒ බිංදුව (හල් කිරීම) සඳහන් කැබලි පළමුවෙන් කියවන්න පුළුවන් වුණා නම් ඒ වැදගත් වන්න තිබුණා. එහෙත් දැන් එහි වැදගත්කම ගිහින්. එවැනි කැබලි සීගිරියේ තවත් තියෙනවා ද? එහි කාලය කුමක් ද? අපේ පැරණි ඉලක්කම් කවරේ ද (මියන්මාහි තවමත් ඔවුන්ගේ පැරණි ඉලක්කම් යොදා ගන්නවා, ඒත් ඒ සංකේත වත්මන් ක්‍රමය මත පදනම් වී තිබෙනවා. රූපයෙහි ඇත්තේ විවිධ අකුරුවලින් ලියැවුණු බුරුම ඉලක්කම්)?  සීගිරියෙන් පිටත් හල්කිරීම සඳහන් ඵලක පුවරු සෙල්ලිපි ආදිය තියෙනවා ද? මේ ආදී පශ්න ඔවුන්ගේ ප්‍රබුද්ධ හිත්වල ඇති වන්නේ නැහැ.


මෙරට උගතුන් දන්නේ 1856 සිට 1888 දක්වා ලංකාවේ පැවති පරිපාලනය කුමක් ද, ඊනියා බෞද්ධ පුනර්ජීවනයේ විස්තර කවරේ ද ආදී ප්‍රශ්න ගැන හිත යොමු කරන්න. ඒ ඔවුන්ගේ ජීවිතයට සම්බන්ධ කෙරී ඇත්තේ අධ්‍යාපනයෙන්. උසස් පෙළේ සිට අපට පුරුදු කරන්නේ එවැනි පරිධියේ ප්‍රශ්න ගැන හිත යොමු කරන්න. ඒ ප්‍රශ්න අපේ ජීවිතවලට සම්බන්ධ කෙරෙනවා. අර හෝටල් සේවිකාවට එවැනි අධ්‍යාපනයක් ලැබී නැහැ. අපේ ජීවිතවලට සම්බන්ධ ප්‍රශ්න අපේ පරිසරය විසින් සකස් කෙරෙන්න. ඒ දෙමව්පියන්, නෑයන්, මිතුරන්, ගුරුවරුන්, ජනමාධ්‍යවේදීන්, දේශපාලනඥයන් ආදීන් විසින් සකස් කෙරෙනවා වෙන්න පුළුවන්.  


අප කේවල ප්‍රශ්න ගැන පමණක් හිත යොමු කරනවා. අධ්‍යාපනයෙන් ඊනියා විද්‍යා අධ්‍යාපනයෙනුත් කෙරෙන්නේ කේවල ප්‍රශ්න ජීවිතයට සම්බන්ධ කිරීමයි. අප දත්ත හා තොරතුරු ගබඩා පමණයි. අප කරන්නේ තව තවත් දත්ත හා තොරතුරු පසුපස යෑමයි. අඹ ගෙඩියක් වැටී තියෙනවා. ඒ ඇයි? කපුටෙක් කොටන්න ඇති, ලේනෙක් හපන්න ඇති, ඉදිල වැටෙන්න ඇති. අප ඉන් සෑහීමට පත් වෙනවා. එතකොට පොල් ගෙඩියක් වැටිල තියෙන්නෙ මොක ද? මොකක් හරි උත්තරයක් (හේතුවක්) කියන්න බැරියැ. එතකොට ගෙඩි වැටෙන්නෙ මොක ද? ගෙඩි වැටෙනවා කියන එක හිතේ මවා ගන්න පුළුවන් ද? මා අහන්නේ නැහැ ඔළු ගෙඩිය ගෙඩියක් ද කියා. කේවල ප්‍රශ්න වෙනුවට සාධාරණ (පොදු) ප්‍රශ්න අහන එක තමයි බටහිර විද්‍යාවෙ ලොක්කො කරන්නෙ. පොඩ්ඩො ඒ ප්‍රශ්නවලට ලොක්කො දෙන උත්තරේ මත පදනම් වෙලා පරිධියේ පොඩි පොඩි, බොහෝ විට කේවල ප්‍රශ්න විසඳනවා.  


නිවුටන් ගෙඩි වැටෙන්නෙ මොකද කියන එකට උත්තරයක් හැදුව. ඒ තමයි ගුරුත්වාකර්ෂණය. බටහිර පොඩ්ඩො ඒක මත පදනම් වෙලා හඳට රොකට් අරිනවා. අපි සුද්දො හදපු රූපවාහිනියෙන් ඒක බලන් ඉන්නවා. බලන් ඉඳලා අර තරුණයන් කියන්න වගේ ලොරි, නැහැ කන්ටේනර් ටෝක් දෙනවා.  ඉංගිරිසින් මුළු ලෝකෙට ම තමන්ගෙ ක්‍රමය පුරුදු කෙළෙ කොහොම ද කියන එක හිතන්න. ඒ හිතන්න පුළුවන් නම්. අද මධ්‍යම පංතිය කන්නෙ බොන්නෙ නිදාගන්නෙ පමණක් නොව වැසිකිළි යන්නෙත් ඉංගිරිසින්ට ඕන විධියට. ඊනියා ද්විභාෂික උගතුන් කියන්නෙ ඉංගිරිසියෙන් තියෙන දේ සිංහලෙන් කියන අයට. සංගීතයට ඒ මිශ්‍රණය ආවෙ ටික කලක් ගිහින්. සිංහල සංගීතයට බටහිර වාද්‍ය භාණ්ඩ එකතු වුණේ හෙමින් හෙමින් හීන් සැරෙන්.  දේශපාලනයත් කෙරෙන්නෙ වෙස්ට්මිනිස්ටර් ක්‍රමයට. ඒත් ඒ හැම තැනක ම අප අනාගන්නවා. හත්පොළේ ගාගන්නවා. 


ඉංගිරිසිනුත් අද අමාරුවේ වැටිලා. කොවිඩ් 19 ඔවුන් දණ ගැස්සුවා. කොවිඩ් වෛරසය අද කේවල ප්‍රශ්නයක් වෙලා. බටහිර විද්‍යාවෙ ලොක්කන්ට ඒක පොදු වෛරසයක් ලෙස සලකා විසඳුම් හොයන්න බැරි වුණා. බටහිර විද්‍යාවේ දුර්වලකම අපට දැන් පේනවා.  මෙරට ඉන්න බටහිර වෙදමහතුන්ට වෙද හාමිනේලාට අමුතුවෙන් කියන්න දෙයක් නැහැ. ලෝක සෞඛ්‍ය සංවිධානයේ ඊළඟ නිවේදනය එනකම් බලන් ඉන්නවා. ඔවුන් කියන දේ රවි කුමුදේශ්ටත් ශවේන්ද්‍ර සිල්වාටත් චතුර අල්විස්ටත් විතරක් නොවෙයි උගතකු බුද්ධිමතකු වියතකු නොවූ මටත් කියන්න පුළුවන්. නිවේදන කියවන්න එතරම් උගත් කමක් අවශ්‍ය නැහැ. 


ලෝකෙ ප්‍රශ්න අපේ ප්‍රශ්න. ඒ සමහර ඒවා කේවල, සමහර ඒවා පොදුකරණයට ලක්කරන්න පුළුවන්. සමහර ඒව දෙකෙන් එකකටවත් අයත් නැති වෙන්න පුළුවන්. ඒ මොනව වුණත් අපි හිතන්නෙ නම් නැහැ.  හිතන්නෙ නැති අපට බිංදුව.       







Tuesday, 21 September 2021

ඊනියා ඩයස්පෝරාව සමග මොන කතා ද?

 

ඊනියා ඩයස්පෝරාව සමග මොන කතා ද?

 

ජනාධිපති ගෝඨාභය රාජපක්‍ෂ එක්සත් ජාතීන්ගේ සංවිධානයේ මහා ලේකම්ට කියා තිබෙනවා දෙමළ ඩයස්පෝරාව සමග සාකච්ඡා කිරීමට බලාපොරොත්තු වන බව. මෙහි වැරදි ගණනාවක් ම තිබෙනවා. පළමුවෙන් ම ඩයස්පෝරාව කියන වචනය වැරදියි. මෙය බයිබලයේ, පරණ තෙස්තමේන්තුවේ එන වචනයක්. යුදෙවුවන් තම රටින් පිටුවහල් කිරීමෙන් පසුව ඔවුන්ට යොදා ගැණුනු වචනයක්. එහි තේරුම තම නිජබිමෙන් පිට කෙරුණු වැන්නක්. දෙමළ ඩයස්පෝරාව කියන්නේ තම නිජබිමෙන් පිටමංකෙරුණු දෙමළ ජනයා කියන එකයි.

Monday, 20 September 2021

මට මරණ බය ඇති වුණා

 

මට මරණ බය ඇති වුණා

 

සුදත් බණ්ඩාරගේ මරණයෙන් පසු මට මරණ බය ඇති වුණා. සුදත් හිත හොඳ දොස්තර යනුවෙන් දැන් එක් එක් අය ලියනවා. බුලත් විට කෑ දොස්තර යන්න තවත් යෙදුමක්. ඊනියා විප්ලවවාදීන් ද ඔහුගේ හොඳ කියනවා. එක් පඬියකුට අනුව සුදත් තම හොඳ ම ප්‍රතිවාදියා. පඬියාගේ ලොක්කා මුකුත් කී බවක් දැන ගන්න නැහැ. අතන මෙතන පතන රතන හාමුදුරුවො  මා දැනුවත් ව මොකුත් කියා නැහැ.

Sunday, 19 September 2021

රනිල්ලා බල්ලකුටවත් පැවරුවෙ නැති ආරක්‍ෂාව

රනිල්ලා බල්ලකුටවත් පැවරුවෙ නැති ආරක්‍ෂාව

 

මා කලින් ලිපියේ කියා සිටියේ පාස්කු ප්‍රහාරයේ මහා මොළකරු කවුරුද යන්නයි. ඇතැමුනට එය අගක් මුලක් නැති කතාවක් වීමට ඉඩ ඇතත් ජාත්‍යන්තර ව සිදු වන්නේ එයයි. නෝර්වේ විවිධ පුද්ගලයන් හරහා මෙරට සිංහල මුස්ලිම් අරගල ඇති කිරීමට උත්සාහ කළා. එහෙත් ඔවුන් බලාපොරොත්තු වූ තරමින් ඒ කරගන්න බැරි වුණා. දිගාලා හා ඔවුන්ගේ එකල හිත මිතුරු ගිහි පැවිදි අය අසාර්ථක වුණා. අසු තුනෙන් පසු සිංහල මිනිසුන් උසිගැන්වීම පහසු නැහැ.

Saturday, 18 September 2021

පාස්කු ප්‍රහාරයේ මහා මොළකරු

 පාස්කු ප්‍රහාරයේ මහා මොළකරු


කුරුණෑගල රෝහලේ වෛද්‍යවරයකු ලෙස සේවය කළ සුදත් බණ්ඩාර මිය ගිහින්. ඔහු ශිෂ්‍ය අවධියේ ජ වි පෙ දේශපාලනයෙහි නිරත වූවෙක්. කැලෑ සටන් කළ අයෙක්. ජ වි පෙ වෙනුවෙන් ඇප කැප වී වැඩ කළ අයෙක්. අද ඉන්නා ජ වි පෙ ඊනියා නායකයන්ට වඩා ජ්‍යෙෂ්ඨ එමෙන් ම විප්ලවයට කැප වූ අයෙක්. එහෙත් භීෂණ සමයෙන් කලකට පසු ඔහු ජ වි පෙ පෙරමුණේ ඊනියා විප්ලවය හරි යන්නෙ නැති එකක් බව තේරුම් ගත්තා.

Friday, 17 September 2021

 

ජී එල්, බිෂොප්තුමා හා හා  මිෂෙල් , පාස්කු, ජැක් හා ජිල්

 

මගෙන් කෙනකු ඇහුවා මා මියන්මා තානාපති ධුරයෙන් ඉල්ලා අස්වූයේ ජී එල් පීරිස් විදේශ ඇමති ලෙස පත් කිරීමට විරුද්ධ ව ද කියා. මා මගේ ඉල්ලා අස්වීමේ ලිපිය ජනාධිපතිතුමාට යැවුවේ මා මිත්‍ර ගාමිණි ලක්‍ෂමන් විදේශ ඇමති තනතුරට පත් කිරීමට පෙර. එහෙත් මා එසේ ඉල්ලා අස්වීමේ ලිපිය යවා නොතිබුණි නම් මගේ මිත්‍රයා විදේශ ඇමති ලෙස සිටිය දී මට තානාපතිවරයකු ලෙස වැඩ කිරීමට නොහැකි බැවින් මගේ පත්වීම ජනාධිපතිතුමා අතින් කෙරුණත් ජී එල් පීරිස් විදේශ ඇමති ලෙස පත් කිරීමෙන් පසුව ඉල්ලා අස්වීමේ ලිපිය යැවීම අනිවාර්යයෙන් ම කෙරෙනවා. ජී එල්  දේශපාලනයේ දී මුලින් ප්‍රේමදාස සමග හිටියා. ඉන්පසු චන්ද්‍රිකා ආණ්ඩුවේත් රාජපක්‍ෂ ආණ්ඩුවලත් හිටියා. ඔහු හිටියේ නැත්තේ යහපාලන ආණ්ඩුවේ පමණයි. ඒකට හේතුව රනිල් ඔහු ගැන ශිෂ්‍ය කාලයේ සිට ම ඉතා හොඳින් දැන සිටීම වෙන්න ඕන. මෛත්‍රිපාල සිරිසේන ජනාධිපති ලෙස පත් වූ විගස මා විශ්වවිද්‍යාල  ප්‍රතිපාදන  කොමිෂන් සභාවේ සාමාජික ධුරයෙන් ඉල්ලා අස්වූයේ ඔහු යටතේ සේවය කිරීමට බැරි බව දන්වමින්.

Thursday, 16 September 2021

හිටපු තානාපති ඇවිල්ලා

 

හිටපු තානාපති ඇවිල්ලා

 

මා මියන්මාහි ලංකා තානාපති ධුරයෙන් අස් වී ඊයේ (සැප් 15) රාත්‍රී ලංකාවට ආවා.  මා ඉල්ලා අස්වූයේ හිතේ අමාරුවටවත් කිසිවකුගේ බලපෑමටවත්  නො වෙයි. ඒ මූලික වශයෙන් කොවිඩ් නිසා. මට කොවිඩ් වැළඳීමත් කොවිඩ් හේතුවෙන් මියන්මාහි වැඩ කිරීම අපහසු වීමත් මගේ අස්වීම පිටුපස තියෙනවා. මේ දිනවල ලංකාවේ ඉල්ලා අස්වීමේ රැල්ලක් ඇති වෙලා. ලංකාවේ කොහොමත් තියෙන්නෙ රැලි. එක එක විධියෙ රැලි ඇති වෙනවා. ඇඳුම්වල රැලි ඇතිවෙනවා. රෙදි මැදල ඒ රැලි ඉවත් කරන්න පුළුවන්. රෙදි හේදුව ම නම් ඇති වෙන්නෙ රැලි. රෙදි හෝදන අය හැම පක්‍ෂෙක ම ඉන්නවා. ඔවුන් දන්නෙ නැහැ ඔවුන් ඇති කරන රැලි ගැන. වයසට ගියාමත් ඇඟේ රැලි ඇති වෙනවා. ඒ මොකක් වුණත් මා අස් වුණෙ රැල්ලකට නම් නොවෙයි.

Tuesday, 14 September 2021

අංගො හාමිගේ දුව ෆයිසර් අරගෙන ද?

 අංගො හාමිගේ දුව ෆයිසර් අරගෙන ද? 


එන්නත ගැන විවිධ මත පළවෙනවා. ඒ සෑම මතයක් ම යම් බටහිර මතයක පුනරුච්චාරණයක්. බටහිර ප්‍රධාන ධාරාවේ මතයට අමතර ව විවිධ මත පළවෙනවා. වඩා හරියන (හරි නොවෙයි) මතය කුමක් ද කියා දැන් ම කියන්න බැහැ. 

Monday, 13 September 2021

කතෝලික සාමූහිකත්වයෙන් ක්‍රිස්තියානි පෞද්ගලිකත්වයට

 

කතෝලික සාමූහිකත්වයෙන් ක්‍රිස්තියානි පෞද්ගලිකත්වයට

 

බටහිර වෛද්‍ය විද්‍යාවට කොවිඩ් 19 ගැන කියන්න කරන්න දෙයක් නැහැ. එන්නත් තමයි එක ම උත්තරය. එහෙත් ඒ ඒ එන්නත් අතර තරගයක් තියෙනවා. ඒ පිටුපස ඉන්නේ වෙළෙඳ සමාගම්. බටහිර වෛද්‍ය විද්‍යාවට පමණක් නොව සමස්ත බටහිර දැනුමට ම අද ප්‍රශ්නවලට උත්තර නැහැ. බටහිර භෞතික විද්‍යාව කඩා වැටෙන්න ගත්තෙ විසිවැනි සියවස මුල. දශක කිහිපයක් තිස්සෙ අඳුරු ශක්තිය (Dark Energy) හා අඳුරු ද්‍රව්‍යය (Dark Matter) කියන්නෙ මොනවද කියන්න කතන්දරයක් (ප්‍රවාදයක්) හදා ගන්න බැරි වෙලා. ක්වොන්ටම් භෞතිකය හා නිව්ටෝනීය සම්භාව්‍ය භෞතිකය ඒකාබද්ධ කරන්න අවුරුදු හැත්තෑවකට වැඩි කාලයක් තිස්සේ ගන්නා උත්සාහ අසාර්ථක වෙලා. 

Sunday, 12 September 2021

දොස්තරලා මොනවද කෙළේ

 

දොස්තරලා මොනවද කෙළේ

 

විපක්‍ෂය මොනව කිවුවත් දැන් කොවිඩ් පැතිරීම ටිකක් අඩුවෙලා. ඒකට හේතුව කුමක් ද? එන්නත ද, රට වැහීම ද, මිනිසුන් ප්‍රසිද්ධියේ නැති වුවත් දේශීය ප්‍රතිකාර ගැනීම ද? එය දැන ගන්නේ කොහොම ද? ඒ සඳහා ඊනියා විද්‍යාත්මක ක්‍රමයක් තියෙනවා ද? මා අද උදේත් අහගෙන හිටියා දේශීය ප්‍රතිකාර හරි ද කියා විද්‍යාත්මක ව  තීරණය කරන්න ඕන කියනවා. බටහිර වෙදකමට කොවිඩ් රෝගයට ප්‍රතිකාරයක් නැතිව තිබිය දී දේශීය ප්‍රතිකාර සුදුසු ද නැද්ද කියා තීරණය කරන්න බටහිර විිද්‍යාත්මක පරීක්‍ෂණ කරන්න කීමෙන් පැහැදිලි වන්නේ වහල් බව මිස අනෙකක් නො වෙයි.

Saturday, 11 September 2021

පාස්කු ප්‍රහාරය කාදිනල්තුමා අගමැති හා පාප්වහන්සේ

 

පාස්කු ප්‍රහාරය කාදිනල්තුමා අගමැති හා පාප්වහන්සේ

 

කාදිනල්තුමා කලක පටන් දේශපාලනයක නිරත වන බව පැහැදිලියි. එතුමා කලකට පෙර රත්නපුර බිෂොප් තනතුරට පත් වූ කාලයේත් ඊට පෙරත් එතුමා ගැන කතෝලික සභාව උනන්දුවක් දැක්වූ බවක් පේන්න තියෙනවා.  බොහෝ දෙනකු එදත් විශ්වාස කළා එතුමා කවදා හරි කොළඹ ප්‍රධාන බිෂොප් තනතුරට පත් වේ ය කියා. මා අගරදගුරු යන්න පාවිච්චි කරන්නේ නැහැ. මෙරට රදගුරුන් වූයේ භික්‍ෂූන් වහන්සේ. අගරදගුරු යන්න කෙසේ යොදා ගැණුනි ද යන්න මා දන්නේ නැහැ. ඉස්සර නම් දඹදිව බරණැස රජ කුමරුවන් තක්‍ෂිලාවේ රාජගුරුන්ගෙන්  ඉගෙන ගත්තා. ඇතැම් අවස්ථාවල මනමේ කුමරුට මෙන් සිප්සතර පමණක් නොව දූ කුමරිය ද ලැබුණා.

Friday, 10 September 2021

තොග වෙළෙන්දෝ හා දෙවියෝ

 

තොග වෙළෙන්දෝ හා දෙවියෝ

 

එක්තරා ආකාරයකට ගත්ත ම තොග වෙළෙඳුන් ද දෙවියන් වගේ.

 

පොළොන්නරුවේ හාල් ව්‍යාපාරික දෙවියන් ගැන තවත් වචනයක් කියන්න ඕන. පසුගිය දා පොළොන්නරුවේ ගබඩාවලින් ගෙනා හාල් තොග රටේ ජනතාවට එක වේලකටවත් මදි බවයි පැවසෙන්නේ. ආණ්ඩුව එපමණකින් නැවතිය යුතු නැහැ. ඒ හාල් තොග ගෙන ඒම හුදෙක් සංදර්ශනයක් නොවිය යුතුයි. අද මෙරට සෑම ක්‍ෂෙත්‍රයක ම ඇත්තේ ප්‍රදර්ශන හා සංදර්ශන පමණයි. දර්ශනයක් නැහැ. දර්ශනය ගැන කතා කරන්නන් ද ප්‍රදර්ශකයන් පමණයි.

Thursday, 9 September 2021

මාෆියා මැඩලීම

 

මාෆියා මැඩලීම

 

සීනි හා හාල් මාෆියා මැඩලීමට ආණ්ඩුව ගත් තීරණයට ස්තුතිවන්ත වෙන්න ඕන. ඒ සඳහා හදිසි නීති යෙදා ගැනීමට සිදු වීම ආණ්ඩුවේ වරදක් නො වෙයි. පවත්නා සාමාන්‍ය නීති එහි දී වැඩදායක නැහැ. විපක්‍ෂය පවත්නා සාමාන්‍ය නීති ප්‍රමාණවත් යැයි කීවත් ඔවුන් ඒ නීති යොදා ගෙන කර ඇති දේ කුමක් ද? ඔවුන්ගේ පාලන සමයෙහි කොවිඩ් නැතුවත් ආහාර මිල වැඩි වුණා.

Wednesday, 8 September 2021

සිංහල සංගීතයේ නව නැම්මක්

 සිංහල සංගීතයේ නව නැම්මක්


පහත සඳහන් සබැඳි තුනේ ගීතවල තනුවලට  ගැයෙන සිංහල ගී තුන පළමුව නම් කරන තැනැත්තාට ගෙදර සාදන ලද ලුණුදෙහි බෝතලයක් තෑගි දෙනු ලැබේ. 


කට පොඩි බෝතලය හිස් බව පෙනෙන්නේ නම් වරද මා අත නොවේ. 




https://www.youtube.com/watch?v=kr9h5xBQz3k


https://www.youtube.com/watch?v=sKNrCUHIPnM


https://www.youtube.com/watch?v=kWbMikrZ91U







අනුකරණ සහ අසීමිත අයිතිවාසිකම්

 

අනුකරණ සහ අසීමිත අයිතිවාසිකම්

 

අප අයිතිවාසිකම් ගැන පමණක් කතා කරන යුතුකම් අමතක කරන ජාතියක් වීම ගැන කාට හරි පුළුල් අධ්‍යයනයක් කරන්න පුළුවන් නම් හොඳයි. මෙය මෙරට සමසමාජ ව්‍යාපාරය ආරම්භ වීමත් සමග පටන්ගත් දෙයක් බවයි මගේ වැටහීම. සමසමාජ නායකයන් යුතුකම් ඉටු නොකළ පිරිසක් නොවෙයි. අද මෙන් ම වසංගත කාලයක, තිස් ගණන්වල  මැලේරියාව නැති කිරීමට ඒ රෝගීන් සුවපත් කර ගැනීමට සමසමාජ නායකයන් වැඩ කළා.

Tuesday, 7 September 2021

නවසීලන්ත තෙපරබෑම්

 

නවසීලන්ත තෙපරබෑම්

 

නවසීලන්ත අගමැතිණිය අහමඩ් අධිල් මොහොමඩ් සම්සූදීන් ත්‍රස්තවාදියා ලාංකිකයකු ලෙස හැඳීන්වීම මා විවේචනය කළා. ඔහු ඕක්ලන්ඩ්හි සුපිරි වෙළෙඳසලක විනාඩියක් පමණ කාලයක දී පිහි ඇනුම් හයක් පමණ කළ ත්‍රස්තවාදියෙක්. මේ ගැන මගේ විවේචනය කාලය වෙබ් අඩවියේත් මුහුණු පොතේත් පළ කෙරුණා. ඇතැමුනට විද්‍යුත් තැපෑලෙනුත් ලිපිය බෙදා හැරුණා. මා හිතන්නේ දි අයිලන්ඩ් පුවත්පත පමණක් ඒ ලිපිය පදනම් කරගෙන ප්‍රවෘත්තියක් ලියා තිබුණා.  ප්‍රවෘත්තිය ලිවීම සම්බන්ධයෙන් මා ෂමින්ද්‍ර ෆර්ඩිනැන්ඩොට ස්තුතිවන්ත වෙනවා. වෙනත් කිසිම පුවත්පතක් මා දන්නා තරමින් අදවත් නවසීලන්ත අගමැතිණිය කළ ප්‍රකාශයේ බරපතළ කම කියා නැහැ. විශේෂයෙන් සිංහල මාධ්‍යයේ මාධ්‍ය ඒ ප්‍රවෘත්තිය නොසලකා හැරීම තරමක ප්‍රශ්නයක්. දෙරණ අරුණ දි අයිලන්ඩ්  ප්‍රවෘත්තිය කියෙව්වේවත් නැහැ. ඒ කලකට පසුව පැමිණි සංඛ අමර්ජිත්ගේ වරදක් නොවෙයි. අරුණ පුවත්පතේවත් ඒ ගැන සඳහනක් කෙරුණේ නැහැ. එය දේශීය දැනුමේ මිථ්‍යාව පිළිබඳ ප්‍රශ්නයක් කියා හිතනවා ද දන්නේ නැහැ.

Monday, 6 September 2021

දෙවියන් වහන්සේ ලක්‍ෂ්‍යයක් ද?

 

දෙවියන් වහන්සේ ලක්‍ෂ්‍යයක් ද?

 

උගතකු බුද්ධිමතකු වියතකු නොවන මා කිසිවකුගේ ආගමික විශ්වාස ප්‍රශ්න කරන්නේවත් විවේචනය කරන්නේවත් නැහැ. ආගමික විශ්වාස තබා කිසිම විශ්වාසයක් ප්‍රශ්න කරන්නේ නැහැ. අප සියල්ලන් ම පදනම් වන්නේ යම් යම් විශ්වාස මත. ඒ ඒ විශ්වාස අදාළ චින්තනයෙන් සංස්කෘතියෙන් ලැබෙන දේ. මා විවේචනය කරනනේ තමන් විශ්වාසය මත පදනම් නොවන්නේ යැයි කියන්නන්ගේ එකී විශ්වාසයත් බටහිර හා වෙනත් රටවලින් විවිධ දේ අනුකරණය කිරීමත්. ඒ අනුකරණය නොකර අප සංස්කෘතියට අවශෝෂණය කරන්නේ නම් මට ප්‍රශ්නයක් නැහැ.

Sunday, 5 September 2021

නවසීලන්ත අගමැතිණිය, ත්‍රස්තවාදියා හා සභ්‍යත්ව ගැටුම

 

නවසීලන්ත අගමැතිණිය, ත්‍රස්තවාදියා  හා සභ්‍යත්ව ගැටුම

 

නවසීලන්තයේ ඕක්ලන්ඩ් නුවර දී ලංකාවෙන් ගිය ඉස්ලාම් භක්තිකයකු සුපිරි වෙළෙඳහලක දී කිහිප දෙනකුට පිහිඇනුම් පහර දීමෙන් පසු පොලිසියෙන් වෙඩිකාලා මිය ගිහින්. මෙවැනි සිද්ධියක් ලංකාවේ සිදු වුණා නම් ඊනියා ජාත්‍යන්තර ප්‍රජාව හෙවත් බටහිර ක්‍රිස්තියානි නූතනත්ව රාජ්‍ය හා මෙරට ඔවුන්ගේ රාජ්‍ය නොවන ඒජන්තයන් වූ දකුණේ (දක්‍ෂිණාංශික) වමාලා සිංහල බෞද්ධ අධිපතිවාදයට හා පොලීසිය නීතිය අතට ගැනීමට විරුද්ධ ව ප්‍රකාශ පිට ප්‍රකාශ නිකුත් කරන්න තිබුණා. නඩු විභාගයක් නැතිව පොලීසියට සටන්කාමියා ඝාතනය කිරීමට අවසරයක් නැති බවත් සටන්කාමියාගේ මානව අයිතිවාසිකම් කඩ වී ඇති බවත් ඔවුන් කියන්න තිබුණා.

Saturday, 4 September 2021

ගණිතමය භෞතික විද්‍යාඥ ස්ටීවන් වයින්බර්ග්

ගණිතමය භෞතික විද්‍යාඥ ස්ටීවන් වයින්බර්ග්

 

පහත පළවන්නේ පසුගිය දා මිය ගිය ලෝකයේ ඉහළ ම ගණිතමය - Mathematical   (ප්‍රවාදාත්මක- Theoretical ) භෞතික විද්‍යාඥයකු වූ ස්ටීවන් වයින්බර්ග් ගැන ඔහුගේ ශිෂ්‍යයකු විසින් ලියන ලදුව ඊයේ (2021 සැප් 03) සයන්ස් සඟරාවේ පළ වූ ලිපියක්.  

 

මෙහි ඉතා වැදගත් කරුණු කිහිපයක් සඳහන් වෙනවා. භෞතික විද්‍යාත්මක නොවූ කරුණු අතර ඔහුගේ පාසලේ, එනම් නිව්යෝක් හි Bronx High School of Science,  භෞතික විද්‍යා නොබෙල් ත්‍යාග ලාභීන් හත් දෙනකු ඉගෙන ගත් බවත් ඔහුටත් ඔහුගේ පංතියේ ම ඉගෙන ගත් ග්ලැෂෝටත් ඔහු සමග ම 1979 නොබෙල් ත්‍යාගය ලැබුණු බව ඉන් ප්‍රධානයි. ඒ දෙදෙනා ම යුදෙව්වන්. සියලු නොබෙල් ත්‍යාග ලාභීන්ගෙන් සියයට විස්සක් පමණ යුදෙව්වන්.  භෞතික විද්‍යාවේ යුදෙව් ප්‍රතිශතය විසිහයක් වෙනවා. 1979 දී වයින්බර්ග්ලා සමග අබ්දුස් සලාම්ටත් භෞතික විද්‍යාව පිළිබඳ නොබෙල් තෑග්ග ලැබුණා. ඔහු භෞතික විද්‍යාව පිළිබඳ නොබෙල් තෑග්ග දිනූ එකම ඉස්ලාම් භක්තිකයා. ඔහූට අමතර ව විද්‍යාවෙන් නොබෙල් තෑගි දිනාගත් ඉස්ලාම් භක්තියන් ඉන්නේ දෙදෙනෙක් පමණයි. ඒ දෙදෙනා ම රසායන විද්‍යාවෙන්.

Friday, 3 September 2021

මරා දැමුණු ශ්‍රී ල නි පක්‍ෂයට ඉපදී හැත්තෑවයි

 

මරා දැමුණු ශ්‍රී ල නි පක්‍ෂයට ඉපදී හැත්තෑවයි

 

ශ්‍රී ල නි පක්‍ෂයට ඊයේට (2021 සැප් 02) අවුරුදු හැත්තෑවක් පිරුණා. එහි වත්මන් නායක මෛත්‍රිපාල සිරිසේන ඉපදිලා තියෙන්නේ අදින් අවුරුදු හැත්තෑවකට පෙර. මෛත්‍රිපාල ශ්‍රී ල නි පක්‍ෂයට වඩා දවසක් බාලයි. ඊයේ ඔහු පාක්‍ෂිකයන් අමතා කළ කතාව වැඩකට ඇති එකක් නෙවෙයි.  ඒ ගැන ඔහුට දොස් කියන්න බැහැ. අද ශ්‍රී ල නි පක්‍ෂය මරා දාලා. ඒ මැරුවේ මෛත්‍රිපාල කියා බොහෝ දෙනකු හිතුවත් ඒ එසේ නො වෙයි. මෛත්‍රිපාල ශ්‍රී ල නි පක්‍ෂ නායකත්වයට හිමිකම් කීමට සිටි අයගෙන් එක් අයෙකු පමණයි. ඔහුට පෙර අනුර බණ්ඩාරනායක, එස් බී දිසානායක වැන්නන් හිටියා. ඔවුන්ටත් එ ඒ අවස්ථාවල ශ්‍රී ල නි පක්‍ෂයෙන් ඉවත් වෙන්න  වුණා.

Thursday, 2 September 2021

පාස්කු ප්‍රහාරයට වග කිවයුත්තන් අතර

 

පාස්කු ප්‍රහාරයට වග කිවයුත්තන් අතර

 

මා මිත්‍ර ජී එල් පීරිස්ට ලංකාවේ බිෂොප් සභාව තහනම් නියෝගයක් පණවලා. කාදිනල්තුමා හමුවන්න දැන් ම බැහැ කියල. කාදිනල්තුමා හමුවන්න නම් පාස්කු ප්‍රහාරය ගැන විමර්ෂණ කටයුතු ඉක්මන් කරන්න කියන එක තමයි බිෂොප් සභාව ඉල්ලා සිටින්නේ. බිෂොප් සභාව ඔය ඉක්මන් කරන්න කියන්නෙ ඇතැම් වදකරුවන් නිදහස් කරන්න ද? අද අවශ්‍ය පූර්ණ පරීක්‍ෂණයක්.  ඒ අතර ජී එල් පීරිස් ලංකාවේ වතිකානු නියෝජිත පූජකතුමා හමුවෙලා. එතුමා ඇමතිතුමාට කොන්දේසි පණවල නැහැ.

Wednesday, 1 September 2021

මෙහෙමත් වෙද මහත්තුරු හා ගුරුවරු

මෙහෙමත් වෙද මහත්තුරු හා ගුරුවරු

 

පසුගිය යහපාලන ආණ්ඩුව පැවති සමයේ ආණ්ඩුව වෙනස් විය යුතු බව අප කියා සිටියේ 2017 තරම් කාලයක ය. ඒ කරන ආකාරයත් අපි කියා හිටියා. රනිල් අගමැති කමෙන් පහකර මහින්ද අගමැති කිරීමට මහින්ද මෛත්‍රිපාලට ශක්තිය ලබා දිය යුතු යැයි අපි කිවුව. අපත් සමග සිටි බොහෝ දෙනා අප අත්හැර ගිය අතර සමහරු මෛත්‍රිපාලට ශක්තිය ලබා දීමට මයිලෝ අරන් දෙන්න යැයි කිවුවා. ඒ සියලු සමච්චල් මැද දින පනහේ ආණ්ඩුව පිහිටෙවුවා. දින පනහේ ආණ්ඩුව රැක ගත්තෙ නැති වුණත් අද තිබෙන ආණ්ඩුව බලයට පත් කිරීමට ඒ උත්තේජනයක් සැපයුවා.

Tuesday, 31 August 2021

මරණ භය, එන්නත, සංස්කෘතිය හා බටහිර වෙද මහත්තුරු

 

මරණ භය, එන්නත, සංස්කෘතිය හා බටහිර වෙද මහත්තුරු

 

මිනිසුන්ට මරණ භය දැනිලා. ඒ කොච්චර ද කියනවා නම් එන්නත ලබා ගන්න ගිහින් මරා ගන්න හදනවා. මේ භය අර අත්‍යාවශය සේවා කියමින්  අනවශ්‍ය ගමන් බිමන්වල යෙදෙන අයට නැත්තේ මොකද කියන එක ප්‍රශ්නයක්. මෙහි බිමන් කියන්නේ විමන් කියා සමහරු කියනවා. අපේ භාෂාවේත් සමහර ඉන්දියානු භාෂාවලත් ව ම අකුරු මාරුවෙනවා.  වංග දේශය බංග දේශය නැත්නම් බංගල දේශය වන්නේ ඒ අයුරින්. ඒත් වමා කියන එක බමා වෙන්නෙ නැහැ. ඒ කොහොම වුණත් විමන් යන්නේ විමානවලින් අහසින් කියාත් කියනවා. කාට හරි කියන්න බැරි නැහැ බිමින් යන නිසා බිමන් වෙලා තියෙනවා කියාත්.

Monday, 30 August 2021

බටහිරයන්ගේ ඉත්තන් වූ කලා වමාලා කාලා වැමෑරීම

 

බටහිරයන්ගේ ඉත්තන් වූ කලා වමාලා කාලා වැමෑරීම

 

බටහිර ක්‍රිස්තියානි නූතනත්වය කඩා වැටෙන බව අප තේරුම් ගත්තේ කලකට පෙර. කොවිඩ් 19 සමග එය තවත් අයට පේන්න පටන් අරන් තියෙනවා. ඊනියා පශ්චාත්නූතනවාදී අදහස්වලින් පුහු මනෝ විශ්ලේෂණයෙන් පෙන්නුම් කෙළේත් ඒ කඩා වැටීමයි. අද ඇතැම් බටහිරයන් ඊනියා ජාලතන්ත්‍රවාදයක් ගැන කියවන්නේත් ඒ කඩා වැටීම පෙන්නුම් කරමින්. බටහිරයන් කියන බොහෝ දේ මෙරට ප්‍රචාරය කිරීමට සැරසී සිටින පිරිසක් ඉන්නවා. ඔවුන් සංඛ්‍යාවෙන් ඉතා ස්වල්පයයි. බටහිර පළවන අදහසක් තම්නට තේරෙන විධියට පළමුවෙන් සිංහලෙන් කීමත් බුද්ධිමත් බවේ ලක්‍ෂණයක් වෙන්න ඇති. ඔවුන් කරන්නේ කාලා වැමෑරීමක්.   ඒත් ඔවුුන් කියන දෙයක් රටට ඇහෙන්නේ නැහැ. මේ පිරිස බොහෝ විට වාමාංශික අදහස් දරණ වම්මු. වමක් නැති වුවත් වම්මු ඉන්නවා. ඒත් මේ වම්මුන් බොහෝ විට නඩත්තු කෙරෙන්නේ බටහිර ඊනියා රාජ්‍ය නොවන ආයතන මගින්. අද වමාලා වමක් නැතිව දකුණේ වමාලා වෙලා.

Sunday, 29 August 2021

මේ ඔබේ කාලයයි

 

මේ ඔබේ කාලයයි

 

පරාක්‍රම සමුද්‍රයේ රළපනාව මත කොන්ක්‍රීට් මංතීරුවක් ඉදිකිරීමට විරුද්ධ ව හාමුදුරුවරුන් කිහිප නමක් විරෝධය පලකරළ. වැඩේ තාවකාලික ව නතර කරළ. ඇතැමුන් කියන විධියට ලෝකයේ හොඳම ජල කළමනාකරණය තිබූ රටේ අද අපට රළපනාවක් අලුත්වැඩියා කරගන්න බැහැ. ඒ අතර මෙරට ඊනියා බටහිර වෙදකම පිළිබඳ විශේෂඥයන්ට කොවිඩ් සම්බන්ධයෙන් අලුතෙන් කිසිවක් කියන්න බැහැ. මේ වන විට චතුර අල්විස් වැනි ජනමාධ්‍යවේදීන්ටත් ඒ බව තේරුම් යමින් පවතිනවා.

Saturday, 28 August 2021

රූකඩ නටවන සර්පයා

 

රූකඩ නටවන සර්පයා

 

අද විපක්‍ෂය ඇත්තේ දරුණු අර්බුදයක. එයට නායකයකු නැහැ. ප්‍රතිපත්තියකට ඇත්තේ ආණ්ඩුව මොනව කළත් එය විවේචනය කරමින් විරුද්ධ වීම පමණයි. විපක්‍ෂය කොවිඩ් 19 වැළඳී දුස්සාධ්‍ය වූවකුට වඩා අසරණයි. එක් අතකට කියන්න පුළුවන් විපක්‍ෂය කොවිඩ් වැළඳී විපක්‍ෂ නායක කාර්යාලයේ කර කියා ගන්න දෙයක් නැතිව වැටී ඉන්නවා කියා.

Friday, 27 August 2021

ලොක්කෝ බොක්කෝ හා සොක්කෝ

 

ලොක්කෝ බොක්කෝ හා සොක්කෝ

 

වසංගතයක් ආවා කියා සමාජයේ ආකල්ප වෙනස් නොවන බව අද සිදුවේගන යන ක්‍රියාවලියෙන් පැහැදිලි වෙනවා. අපට රටක් ලෙස හිතන්න පුළුවන් ලංකාව සහභාගිවන ජාත්‍යන්තර ක්‍රිකට් තරගයක දී පමණයි. දෙමළ ත්‍රස්තවාදය පරාජය කිරීමේ දී වැඩි පිරිසක් එකතු වූ නමුත් සිංහල බෞද්ධ විරෝධී සිංහලයන් ද දෙමළ ත්‍රස්තවාදය සමග බැඳුනා. ක්‍රිස්තියානි කතෝලික පූජකවරුන් ද ඒ අතර සිටි බව කාදිනල්තුමාට අමතක වන්න බැහැ. ඇතැම් ඊනියා ප්‍රගතිශීලි භික්‍ෂූන් වහන්සේ කීප නමක් ද ඔවුන්ට එකතු වුණා.

Thursday, 26 August 2021

අපට ලැබුණු දකුණු ඉන්දීය බුදුසසුන

 

අපට ලැබුණු දකුණු ඉන්දීය බුදුසසුන

 

ඊයේ (අගෝස්තු 25) ලිපියේ මා සඳහන් කළා අනුරාධපුර සංස්කෘතියේ සරල බව හා ප්‍රෞඪ බව ගැන. අපට බුදුදහම ලැබී ඇත්තේ මිහිඳු මාහිමියන් මෙරටට වැඩීමට පෙරයි. මිහිඳු හිමියන් මෙරටට වැඩම කර මෙරට බුදුසසුනක් පිහිටෙවුවා. රුවන්වැලි සෑය තනා ඇත්තේ අද ඒ පිහිටි  භූමියේ පිහිටි ගසක ලැගුම් ගත්තේ යැයි කියන රත්නවල්ලි නම්  යක්‍ෂයන්ගේ යැයි සිතිය හැකි දෙවඟනකට ඉවත් වීමට ආරාධනා කිරීමෙන් පසුව යැයි ජනප්‍රවාදයේ සඳහන් වෙනවා.

Wednesday, 25 August 2021

ඇත් රාජයා ඉතිහාසය හා සංස්කෘතිය

 

ඇත් රාජයා ඉතිහාසය හා සංස්කෘතිය

 

අර ඇත් රාජයා දළදා හාමුදුරුවන් සඳහා ඇඹරී තිබූ පාවඩය සකස් කරන විට මට මතක් වූයේ අපේ සංස්කෘතියයි. ඉතිහාසයයි. කිසිම සංස්කෘතියක් නිර්මල සංස්කෘතියක් ලෙස හඳුන්වන්න බැහැ. ඕනෑම සංස්කෘතියක් වෙනස් වෙනවා. විවිධ හේතූන් නිසා වෙනස් වෙනවා. ඒවා අභ්‍යන්තර හේතු වෙන්න පුළුවන් එහෙම නැත්නම් බාහිර හේතු වෙන්න පුළුවන්. සිංහල සංස්කෘතිය වෙනස්වීමට වඩා බලපා තියෙන්නෙ බාහිර හේතූන් කියා කියන්න පුළුවන්.

Tuesday, 24 August 2021

කොවිඩ් 19, දැනුම, සංස්කෘතිය හා ඇතා

 

කොවිඩ් 19, දැනුම, සංස්කෘතිය හා ඇතා

 

කොවිඩ් 19 ගැන අප දන්නේ මොනවා ද? අප එතරම් දෙයක් නොදන්නා බවයි කියන්න පුළුවන්. අප ඊනියා ලෝකයක යම් යම් දේ නිරීක්‍ෂණය කරනවා කියනවා. ඒ නිරීක්‍ෂණය කරන්නෙත් බෙහෝ විට අප දන්නේ යැයි සිතන සංකල්ප කතා (ප්‍රවාද) මත පදනම් වෙලා. පොළොවට පොල් වැටෙන බව නිරීක්‍ෂණය කරන්න පොල්, පොළොව, වැටෙනවා කියන සංකල්ප තියෙන්න ඕන. අපට අහස කියා සංකල්පයකුත් තියෙනවා. අප නිල් අහස කියාත් සමහර විට කියනවා. ඒත් එහෙම නිල් පාට අහසක් අප නිරීක්‍ෂණය කරනවා ද? අහස අපේ නිරීක්‍ෂණයක් ද? අප නිරීක්‍ෂණය නොකරන දෙයක් නිරීක්‍ෂණය කරන බව කියනවා ද?

Monday, 23 August 2021

කොවිඩ් අස්සෙන් කැරොල්

 

කොවිඩ් අස්සෙන් කැරොල්

 

මා ඊයේ (අගේස්තු 22) ඇසූ ප්‍රශ්නයේ ඔවුන්ගේ නම් සඳහන් කළත් ඩලස් අලහප්පෙරුම පැරණි මාධ්‍යවේදියාගෙන්ගෙන් හරි අද දේශපාලනඥයන් වී සිටින එකල  සිරසේ මහාරාජා විසින් පුම්බනු ලැබූ ඊනියා මාධ්‍යවේදීන්ගෙන් හරි මා ඊනියා විද්‍යාත්මක ක්‍රමය කුමක් දැයි දැනගැනීමට අදහස් කෙළේ නැහැ. මරික්කාර් මනුෂ වැන්නන්ගෙන් එවැන්නක් බලාපොරොත්තු වීම විද්‍යාත්මක දැයි කාට හරි අහන්න පුළුවන්.  කෙසේ වෙතත් එවැන්නකු හරි වෙනත් පඬියකු හරි අපට විද්‍යාත්මක ක්‍රමය කුමක් දැයි කියා දී නැහැ. ලංකාවේ කෙසේ වෙතත් එක්සත් ජනපදවල, එංගලන්තයේ හා ඕස්ත්‍රේලියාවේ ඊනියා විද්‍යාත්මක රට වැහීමකට (ලොක්ඩවුන්) විරුද්ධ පිරිස් ඉන්නවා. පසුගිය දා මෙල්බර්න් නුවර එවැනි විශාල පිරිසක් පොලීසිය හා ගැටුණා. ට්‍රම්ප් සමහර ඊනියා විද්‍යාත්මක නිගමනවලට විරුද්ධ වුණා. ඔවුන් එසේ කරන්නේ ඇයි දැයි ඉඩක් ලැබුණොත් පසුව කියන්නම්.

Sunday, 22 August 2021

විද්‍යාත්මක ක්‍රමය


විද්‍යාත්ම ක්‍රමය

මේ ප්‍රශ්නය ඩලස් අලහප්පෙරුම, රතන හිමි, ලාල්කාන්ත ආදී විද්‍යාත්මක ක්‍රමයක් ගැන කියන සියල්ලන් වෙතට යොමු කරනවා. ඔය විද්‍යාත්ම ක්‍රමය මොකක් ද කියල කියනවා ද?  




Saturday, 21 August 2021

රට සම්පූූර්ණයෙන් නොවසා කොවිඩ් පරදවමු

 

රට සම්පූූර්ණයෙන් නොවසා කොවිඩ් පරදවමු

 

අද ලිපියක් ලියන්න හිටියේ නැහැ. ඒත් ඊයේ ජනාධිපති ගෝඨාභය ජාතිය ඇමතීමෙන් පසු මෙය ලියන්න හිතුනා. එය සාර්ථක කතාවක්. කතාවේ මුල  ආණ්ඩුව මෙතෙක් කොවිඩ් සම්බන්ධයෙන් කර ඇති වැඩ සමාලෝචනය කෙරුණා. ආණ්ඩුව පසුගිය වර දිගු කාලයක් රට මුළුමනින් ම මෙන් වසා තැබීමෙන් අපනයනයට වූ පාඩුවත් ගෙනහැර දැක්වුවා. එය ආණ්ඩුව කළ වරදක් පිළිගැනීමක්. වරද පිළිගැනීම හොඳ ගුණයක්.

Friday, 20 August 2021

රට වහන්න පෙර

රට වහන්න පෙර

 

රට වහන්න ඕන කියන කතාව අද රට පුරා පැතිරිලා. මේ කතාව ගෙනි යන්න මධ්‍යම පංතියකුත් රටේ ඉන්නවා. නිිදහස් අධ්‍යාපනයෙන් ප්‍රසාරණය වූ මේ මධ්‍යම පංතියට එතරම් විචාරයක් නැහැ. ඔවුන් බොහෝ විට බලන්නේ රටෙන් තමන්ට විය යුතු දේ මිසක් තමන්ගෙන් රටට විය යුතු දේ නො වෙයි. ඒත් ඔවුන්ට රටේ විශාල බලයක් තියෙනවා. මේ මධ්‍යම පංතියට බටහිර වෙද මහත්තුරු බටහිර වෙද හාමිනේලා වගේ ම බටහිර වෛද්‍ය ක්‍ෂෙත්‍රයේ ඒ ඒ රාජකාරි කරන අය, ගුරුබොරුවන් ආදීන් ඇතුළත් වෙනවා.

Wednesday, 18 August 2021

බටහිර වෙදමහත්තුරු බටහිර දැනුම හා තලේබාන් ජයග්‍රහණය

 

බටහිර වෙදමහත්තුරු බටහිර දැනුම හා තලේබාන් ජයග්‍රහණය

 

මා බටහිර වෛද්‍ය විද්‍යාව හදාරනු තබා සාමාන්‍ය පෙළටවත් බටහිර ජීව විද්‍යාව හදාරා නැහැ. ඒ මදිවට උසස් පෙළ රසායන විද්‍යාව අසමත්.  බටහිර ගණිතය හා භෞතික විද්‍යාව ගැන නම් අල්ප දැනුමක් තියෙනවා. ඒත් මා ගණිතඥයකුවත් විද්‍යාඥයකුවත් නො වෙයි. මා සුළුවෙන් දන්නා ගණිතයෙහි හා බටහිර භෞතික විද්‍යාවෙහි නිශ්චිත අදහස් දීමට උත්සාහ කරනවා. එය ඉංගිරිසි සංස්කෘතියෙහි ලක්‍ෂණයක්. මා හිතන්නේ බටහිර වෛද්‍ය විද්‍යාවෙහිත් ආවට ගියාට වචන පාවිච්චි කරන්නේ නැහැ කියා. එහෙම වුණත් බටහිර භෞතික විද්‍යාවෙහිත් ෆෝටෝනයක් කියන්නෙ මොකක් ද කියල නිශ්චිත ව කියන්නෙ නැහැ. ඒක ගැනත් කතා කරමු.

Monday, 16 August 2021

රට වසා රට අරාජික කිරීම

 

රට වසා රට අරාජික කිරීම

 

කලකට පෙර රට බෙදන්න කතා කළ පිරිසක් හිටියා. ඔවුන් මූලික වශයෙන් සිංහල බෞද්ධ විරෝධීන්. කාදිනල්තුමාටත් මතක ඇති. ඒ අය විවිධ සිවල් සමාගම්, ක්‍රිස්තියානි හා වෙනත් සාම මණ්ඩල, විකල්ප ප්‍රතිපත්ති කේන්දර ආදියෙහි ඉඳගෙන කේන්දර බැලුවා. ඔවුන් රට බෙදන්න කියා කෙළින් ම කිව්වේ නැහැ. ඔවුන් කිව්වේ පළාත් සභාවලට තව තවත් බලය දෙන්න කියා. ඉඩම් පොලිස් බලතල ඒ අතර වුණා. ඔවුන්ට දේශපාලන නායකත්වය දුන්නේ රනිල්. රනිල් බටහිරට අවශ්‍ය ආකාරයට ක්‍රියා කළ ක්‍රියා කරන අයෙක්. ඔහු ප්‍රභාකරන් එක්ක ගිවිසුම් අත්සන් කරන්න නෝර්වේ තානාපති සමග උතුරට ගිය අයෙක්.

Saturday, 14 August 2021

ගමෙන් ලියුමක් ඇවිල්ලා විජේගෙන් වාගෙයි

 

ගමෙන් ලියුමක් ඇවිල්ලා විජේගෙන් වාගෙයි

 

මියන්මාහි වෙසෙන මගේ ශ්‍රී ලාංකික මිතුරකුට තමන් දන්නා මියන්මා ජාතිකයකු මුණ ගැසිලා. ඒ මියන්මා ජාතිකයා යම් කිසි සම්මන්ත්‍රණයක් සඳහා ලංකාවට ගිහින්. මගේ මිතුරා අසා තිබෙනවා ඒ තැනැත්තාගෙන් ලංකාව ගැන මොකද කියන්නෙ කියලා. පිළිතුර වී ඇත්තේ ලාංකිකයන් තමන් ගැන කියවන බවත් වෙලාවට වැඩ නොකරන බවත්.

Thursday, 12 August 2021

හර්තාලය සමසමාජය හා ජෙප්පෝ

 

හර්තාලය සමසමාජය හා ජෙප්පෝ

 

ඊයේ අපට පශ්චාත් කොවිඩ් පරීක්‍ෂණ සඳහා පෞද්ගලික රෝහලකට යෑමට සිදු වුණා. ලිපිය පළ නොවූයේ ඒ නිසයි. කොවිඩ් රෝගය සඳහා මුල සිට ම මා ලංකාණ්ඩුවෙන් තඹ සතයක්වත් ගෙන නොමැති බව කිව යුත්තේ මා ගුණ යහපත් ප්‍රතිපත්තිගරුක අයකු බව කීමට නො වෙයි. හුදෙක් පඬියන්ගේ දැන ගැනීම සඳහායි. මා හොඳ මිනිහකු නොවන බව  කියා ඇති.

Monday, 9 August 2021

චේතිය රජුගේ බාප්පා හා හීන්බබා සීයා

 

චේතිය රජුගේ බාප්පා හා හීන්බබා සීයා

 

ඊයේ මියන්මාහි සේවය කළ ලාංකිකයකු කොවිඩ් වැළඳී මිය ගියා. ඔහුගේ පෙනහළු දෙකට ම වයිරසය ඇතුල් වී ලේ කැටි ගැසී ඇති බවයි කියැවෙන්නේ. එහි නිවැරදිතාව ගැන මා සාක්‍ෂි දරන්නේ නැහැ. කෙසේ වෙතත් එය ඉතා ශෝකාකූල ප්‍රවෘත්තියක්. මට ඔහු මුණ ගැසී තිබුණා.

Saturday, 7 August 2021

බොරුකාරයකු ගැන

 


බොරුකාරයකු ගැන 



"සියලු පඬියන්ගේ දැනගැනීම සඳහා.

පී සී ආර් ධන වී රෝහල්ගත වීමි. කිවයුතු අසනීපයක් නැත. ඒ ගැන අසතුටුනම් ඇරිස් ලොක්කා හමුවන්න. මා වෙනුවෙන් පුද පූජා කළ සියල්ලන්ට පින්.”


ඉහත සඳහන් වන්නේ ජූලි 17 දාතමින් මුහුණු පොතේ ද ජූලි 20 දාතමින් කාලය වෙබ් අඩවියේ ද පළ වූ ලිපියකි. එය අසත්‍යයකි. මට කොවිඩ් වැළඳී තිබුණා. එසේ තිබිය දී කිවයුතු අසනීපයක් නැතැයි කීම බොරුවකි. මරණයේ එළිපත්ත පෑගීම ගැන ලියූ ලිපියෙන් ද ඉහත සඳහන් ප්‍රකාශය බොරු බව පැහැදිළි වෙනවා. එසේ බොරු කීම ගැන කණහාටුවෙනවා.  බොරු කියා ඇත්තේ සිහියෙන් ද අසිහියෙන් ද යන්න ප්‍රශ්නයක් නො වේ. බොරුව කියා ඇත්තේ මා ය. ඒ පිළිබඳ වගකීම මා භාරගන්නවා.


බොහෝ දෙනාට අනුව මා බොරුකාරයකු ය යන්න මගේ අදහසයි. 

 




Thursday, 5 August 2021

මහාරාජාගේ හා මහා ගුරු බොරුවන්ගේ සිංහල විරෝධය

 

මහාරාජාගේ හා මහා ගුරු බොරුවන්ගේ සිංහල විරෝධය

 

මා  කිලි මහරාජා කළු ද සුදු ද දන්නේ නැහැ. ඊනියා ගුරු දෙවි වෘත්තීය සමිති නායකයන් ගැන කීමට ඇත්තේ ද එයමයි. ලංකාවේ දී ද සමාජයෙන් ඈත් ව ජීවත්වන මට ඔවුන් ගැන පෞද්ගලික දැනුමක් නැහැ. ඒත් ඔවුන් සියල්ලන් ම මේ ආණ්ඩුවට විරුද්ධ බව මා දන්නවා. ඔවුන් පමණක් නොව විවිධ ක්‍ෂෙත්‍රවල වෘත්තීය සමිති නායකයන් මේ ආණ්ඩුවට විරුද්ධයි. මේ රටේ ජේ ආර් ජයවර්ධනගෙන් පසු එ ජා පක්‍ෂයටත් අනුබද්ධ වෘත්තීය සමිති තියෙනවා. සුනිල් රත්නප්‍රියගෙන් අහන්න. ඊනියා සමාජවාදීන්ටත් එ ජා පක්‍ෂයටත් අණ්ඩු විරෝධීන් ලෙස එකතු වීමට හැකි කම තියෙනවා. ඔවුන් එකතු වෙනවා. ඔවුන් එකතු වන්නේ ඇයි? කිලි මහාරාජාටත් ඊනියා වෘත්තීය සමිති නායකයන්ටත් ඇති පොදු එකමුතුව කුමක් ද?

Tuesday, 3 August 2021

මරණයේ එළිපත්ත පාගල ආපහු ආවා

 

මරණයේ එළිපත්ත පාගල ආපහු ආවා

 

මරණයේ එළිපත්ත පාගල ආපහු එන්න මට හැකි වුණා. එය මගේ වාසනාවක් ද වෙනත් කාගේවත් අවාසනාවක් ද කියන්න ඉක්මන් වෙන්න ඕන නැහැ. ආපහු ඒම වාසනාවක් නම් එළිපත්ත පාගන්න ගිය එක අවාසනාවක් ද වගේ ප්‍රශ්න අහන එක තේරුමක්  නැති වෙන්නත් පුළුවන්. අවාසනාවක් කියන වචනය ම තේරුමක් නැති එකක් වෙන්න ඕන. අපි කවුරුත් කවදා හරි මැරෙනවා. අපට අමෘතය ලැබිලත් නැහැ.

Tuesday, 20 July 2021

සියලු පඬියන්ගේ දැනගැනීම සඳහා.

 සියලු පඬියන්ගේ දැනගැනීම සඳහා.

පී සී ආර් ධන වී රෝහල්ගත වීමි. කිවයුතු අසනීපයක් නැත. ඒ ගැන අසතුටුනම් ඇරිස් ලොක්කා හමුවන්න. මා වෙනුවෙන් පුද පූජා කළ සියල්ලන්ට පින්.

Thursday, 8 July 2021

ලිපි

 අද හා හෙට (ජූලි 8 හා 9) ලිපි පළ නොවන බව කරුණාවෙන් සලකන්න

Wednesday, 7 July 2021

හංගපු පොහොර එළියට දැමීමට ප්‍රමාද වුණේ ඇයි?

 හංගපු පොහොර එළියට දැමීමට ප්‍රමාද වුණේ ඇයි? 


අද ජූලි හත්වැනි දා. ජූලි හතයි කියා කියමනක් සිංහලයන් අතර තියෙනවා. ජූලි කියන්නෙ ජුලියන් දින දර්ශනය අනුව හත්වැනි මාසය. ග්‍රෙගරියානු දින දර්ශනයෙත් එහෙමයි. ජුලියස් සීසර් තම නමින් මාසයක් නම් කරන්න කලින් හත්වැනි මාසය වුණෙ සැප්තැම්බර් මාසය. සැප්තැම් කියන එකේ තේරුම හත්වැනි කියන එක. ගණිතය හදාරන අය දන්නවා සෙප්ටගන් කියන්නෙ සප්තාස්‍රය කියල. ඔක්ටොබර් කියන්නෙ අටවැනි මාසය. ඔක්ටගන් කියන්නෙ අෂ්ටාස්‍රයට. නොවෙම්බර් ඩිසෙම්බර් කියන්නෙ නවය හා දහය. ඩෙකාගන් කියන්නෙ දශාස්‍රයට. ඩෙසිමල් කියන්නෙ දශම. ජූලියස් සීසර් හා ඔගස්ටස් සීසර් තමන්ගෙ නම්වලින් මාස නම් කරල සැප්තැම්බර් මාසය නවවැනි මාසය කළා. ඉතිරි මාස තුනත් පස්සට තල්ලු කළා.

Tuesday, 6 July 2021

එන්නතට එරෙහිව වයිරසය

 

එන්නතට එරෙහිව වයිරස 

 

 

අද වන විට සෞඛ්‍ය අමාත්‍යාංශය අවුල් ජාලයක් වෙලා. කොව්ඩ් රැල්ලට අමතර ව වර්ජන රැල්ලකුත් ඇවිල්ල. සෞඛ්‍ය අමාත්‍යංශය ඇත්තේ බටහිර වෙද මහතුනට පමණක් නොවූවත් අද එය ක්‍රියාත්මක වන්නේ බටහිර වෙද මහතුන් වෙනුවෙන්. රජයේ වෛද්‍ය නිලධාරීන්ගේ සංගමය සෞඛ්‍ය අමාත්‍යාංශය මෙහෙයවන බව පිටින් බලන විට පේනවා. එහි සභාපති ගෝඨාභයගෙ රැස්වීම්වලට වගේ ම සජිත්ගෙ රැස්වීම්වලටත් යනවා. සභාපතිට ජනාධිපති බලාපොරොත්තු තියෙනවා ද? කවුරුවත් ඔහුට ඒ බලාපොරොත්තු ඇතිි කරල තියෙනවා ද?

Monday, 5 July 2021

බුද්ධිමතකු නොවී ශිල්පියකු වූ ගැමුණු

 

බුද්ධිමතකු නොවී ශිල්පියකු වූ ගැමුණු

 

ඊයේ ලිපියේ සඳහන් වූ යකුන් එළවීම විශ්ලේෂණාත්මක මනසක් නැති ඇතැමුන් තමන්ට වාසි සහගත ආකාරයකට විවරණය කරලා. යකුන් යනු අමනුෂ්‍යයන් බවත් විජය රජු මෙරටට පැමිණෙන විට මෙහි සිටියේ අමනුෂ්‍යයන් බවත් කීමට ඔවුන් ඒ යොදා ගෙන. මෙහි දී අප තේරුම් ගත යුතු කරුණක් තියෙනවා. ඒ තමයි පැරණි ආසියාතික ලෝකයේ යක්‍ෂ රාක්‍ෂස නාග යනුවෙන් මිනිස් ගෝත්‍ර මෙන් ම මනුෂ්‍ය නොවන ප්‍රාණීන් ද හඳුන්වා ඇති බව. අදත් මියන්මාහි හා ඉන්දියාවේ නාග ගෝත්‍රිකයන් දකින්න පුළුවන්. මියන්මාහි අද ප්‍රසිද්ධ ප්‍රදේශයක් බවට පත් වී ඇති රකායන් ප්‍රාන්තය කලක් රක්ඛන්ග දේශය නමින් හඳුන්වා තිබෙනවා. රකායන් යන්න රක්කපුර රාක්‍ෂසපුර ආදියෙන් බිඳුණු එකක් යැයි කියැවෙනවා. බොහෝ කලකට පෙර ලංකාව ද එවන් නමකින් හඳුන්වා දී තිබෙනවා ද? ඒ ගැන පසුව කතා කරමු. දේවානම්පිය තිස්ස රජු හා සම්බන්ධ පුවත් මියන්මාහි තියෙනවා. ඒ කතා ලංකා ඉතිහාසයෙහි නැහැ. එසේ වූයේ ඇයි?

Sunday, 4 July 2021

යකුන් එළවා මිරිසවැටිය ප්‍රතිසංස්කරණය කළ ගැමුණු සිල්වා

 

 

යකුන් එළවා මිරිසවැටිය ප්‍රතිසංස්කරණය කළ ගැමුණු සිල්වා

 

මා මිත්‍ර  ගැමුණු සිල්වා මියගොස් ඇති බව මට දැනුම් දුන්නේ ඔහු කිසි දා නුදුටු සුමේධ වීරවර්ධන. සුමේධ ඒ බව දැනගෙන ඇත්තේ මුහුණු පොතේ පළ වී ඇති පහත සඳහන් ලිපිය කියවීමෙන්.  සුමේධ ඒ ලිපිය කියවා ඇත්තේ මාතෘකාව නිසා ඇති වූ කුතුහලයෙන්. ලිපිය කියවා ගෙන යෑමේ දී මගේ නමත් සඳහන් වී තිබූ බැවින් ඔහු මට කතා කර ගැමුණු මිය ගොස් ඇති බව කිවුවා. අදාළ ලිපිය සිළුමිණ පුවත්පත ගැමුණු සමග කරන ලද සාකච්ඡාවක් මත පදනම් වෙනවා.

Saturday, 3 July 2021

කුල දේශපාලනය

 කුල දේශපාලනය 


හෙද හෙදි වර්ජනයේ දී විවිධ පාර්ශ්ව  එකතු වෙලා. මුරුත්තෙට්ටුවේ හාමුදුරුවන් රතන්ප්‍රිය ආදීන් එකතු  වෙලා ඉන්නෙ අද කුලභේදය නිසා කිවුවොත් බොහෝ දෙනාට ප්‍රශ්නයක් වේවි. කොවිඩ් 19 ප්‍රශ්නය ලෝ පුරා පැතිරෙද්දී වෙනත් රටවල සෞඛ්‍ය ක්‍ෂෙත්‍රයේ මෙවැනි ප්‍රශ්න ඇති වන්නේ ද කියා දැන ගැනීමට නැහැ. වත්මන් කුලභේදය බොහෝ රටවල තිබුණත් ලංකාවේ තරම් එය උග්‍ර යැයි මා හිතන්නේ නැහැ. 

Friday, 2 July 2021

කාබනික ආහාරවලට ඇති ඉල්ලුම

 

කාබනික ආහාරවලට ඇති ඉල්ලුම

 

ජනාධිපති ගෝඨාභය රාජපක්‍ෂ ඊයේ හොඳ කතාවක් කිවුවා. මෙරට කාබනික පොහොර වගාවට විරුද්ධ අය වැඩි මුදලක් දී කාබනික ආහාර (Organic food)  අනුභව කරන බව. රසායනික පොහොර යොදා ගන්නා ආහාර අනුභවයෙන් විවිධ රෝගවලට ගොදුරු විය හැකි බව බටහිර ඇතැමුන් දන්නවා. ඒ රටවල කාබනික ආහාර වැඩි මිළක් දී ගන්න පුළුවන්. ලංකාවෙත් කාබනික ආහාරවලට ඉල්ලුමක් තියෙනවා. බටහිර විද්‍යාව හා තාක්‍ෂණය කලින් කියා ඇති පරිිිදි ධනවාදය සමග බැඳී තියෙනවා.

Thursday, 1 July 2021

තක්කඩි බටහිර දෙබිඩ්ඩෝ

 

තක්කඩි බටහිර දෙබිඩ්ඩෝ

 

අද ලෝකයේ රටවල් අතර මතවාදී වෙනස්කම් නැහැ. මා මෙහි දී මතවාදී වෙනස්කම් යනුවෙන් අදහස් කරන්නේ ධනවාදී/ධනවාදී නොවන ආදිය. එහෙත් තවමත් මාක්ස්වාදී පශ්චාත් මාක්ස්වාදී ආදී වශයෙන් කියා ගන්නා පරඬැල් කිහිපයක් පුද්ගලයන් අතර දකින්න පුළුවන්. ඔවුන් තම තමන් අතර පොරවල් ලෙස පෙනී සිටීමට තැත් කරන්නන් පමණයි. ඔවුන්ට කළ හැකි විප්ලවයක්වත් ඇති කළ හැකි සමාජවාදයක්වත් නැහැ. රාජ්‍යය වියැකී යන  ඊනියා කොමියුනිස්ට් සමාජයක් ගැන කතා නොකර ඉන්න තරමට හොඳයි.

Wednesday, 30 June 2021

රොකෆෙලර්ලාගේ හරිත විප්ලවය හා ඊරි

 

රොකෆෙලර්ලාගේ හරිත විප්ලවය හා ඊරි

 

පසුගිය විසිඅටවැනි දා ලිපියෙන් රසායනික පොහොර භාවිතය බටහිර විද්‍යාව හා ධනවාදය අතර ඇති සම්බන්ධය ගැන කෙටි හැඳින්වීමක් කෙරුණා. අද එය තවත් ඉදිරියට ගෙන යෑමට බලාපොරොත්තුවෙනවා. මා මේ ලිපිවල ලියන දේට ජාතිකත්ව කඳවුරේ බොහෝ දෙනා විරුද්ධයි. විශේෂයෙන් ම ගුණදාස අමරසේකර, අශෝක අමරතුංග වැනි "යථාර්ථවාදී" විද්‍යාඥයන් විද්‍යාව වෙනුවෙන් එක් කල්ලියක් හැටියට කටයුතු කරනවා.

Tuesday, 29 June 2021

රංජිත් බැසිල් හා වෙද හාමිනේලාගේ මුහුණ දීම

 

රංජිත් බැසිල් හා වෙද හාමිනේලාගේ මුහුණ දීම

 

ජ්‍යෙෂ්ඨ මහාචාර්ය රංජිත් බණ්ඩාර මා මෙන් නොව උගතෙක් වියතෙක් හා බුද්ධිමතෙක්. ඔහු දැනටමත් ජ්‍යෙෂ්ඨ මහාචාර්යවරයෙක්. මා යම්තම් මහාචාර්යවරයකු වුණේ අවුරුදු හැටේ දී. මා ජ්‍යෙෂ්ඨවත් සම්මානිතවත් මහාචාර්යවරයකු නො වෙයි. මහාචාර්ය රංජිත් බණ්ඩාර කීීර්තිමත් ආර්ථික විද්‍යාඥයෙක්. මා විද්‍යාඥයකු වීමට ගොස් බැරුව ආපසු පැමිණි අයෙක්. කතාවක් තියෙනවා මහාචාර්ය රංජිත් බණ්ඩාර තම පාර්ලිමේන්තු අසුන බැසිල් රාජපක්‍ෂට පූජා කර මහා බැංකුවේ අධිපති වෙන්න යනවා කියා. ඒ කුමක් වුවත් අපි මහාචාර්ය රංජිත් බණ්ඩාර කියන දේට සවන් දෙන්න ඕන.

Monday, 28 June 2021

බටහිර විද්‍යාව ධනවාදය හා රසායනික පොහොර

 

බටහිර විද්‍යාව ධනවාදය හා රසායනික පොහොර

 

බටහිර විද්‍යාව ඇගයුම් විනිශ්චයන්ගෙන් ස්වායත්ත කියා හිතන අය ඉන්නවා. මේ තරමක් අමාරු වචනවලින්  කියන්නේ බටහිර විද්‍යාවේ නිගමන ඉතාමත් ස්වාධීන නිගමන කියා හිතන අය ඉන්න බවයි. ඒ නිගමනවලට පැමිණීමේ දී විද්‍යාඥයන් දරණ දේශපාලනික ආගමික ආදී විවිධ මත බලපාන්නේ නැතැයි හිතනවා. විද්‍යාඥයන් දරණ පෞද්ගලික මත නිගමනවලට පැමිණීමේ දී නොවැදගත් වෙන බව ඇත්ත. සිංහල බෞද්ධයකු විද්‍යාඥයකු වුවහොත් (එවැන්නකු තවම බිහි වී නැහැ) ඔහුගේ ථෙරවාදයට එහි දී කිසිම වැදගත් තැනක් හිමි වන්නේ නැහැ.

Sunday, 27 June 2021

සුනිල් හා වයිමා

 

 

සුනිල් හා වයිමා

 

"කොරෝනා වසංගතයේ මෙරටින් තුරන් කරන්නේ කවදාදැයි ජනාධිපති ගෝඨාභය රාජපක්ෂ මහතා නිශ්චිතව පැවසිය යුතු බව ජනතා විමුක්ති පෙරමුණ පවසයි.

 

එම පක්‍ෂ හිටපු පාර්ලිමේන්තු මන්ත්‍රී සුනිල් හඳුන්නෙත්ති මහතා පවසන්නේ එසේ කළ නොහැකි නම් කළ හැකි අයෙකුට රට බාර දී යන්නට යන බව ප්‍රකාශ කල යුතු බවයි.”

Saturday, 26 June 2021

ගාලු පාරේ දමා ආ තානාපතිනිය විදුලකරට ගෙන ඒම

 

ගාලු පාරේ දමා ආ තානාපතිනිය විදුලකරට ගෙන ඒම

 

ඊයේ ලිපියේ මාතෘකාව වූයේ දුමින්ද හා තානාපතිනිය යන්නයි. එහෙත් බොහෝ දෙනා කියවා තිබුණේ දුමින්ද යන්න පමණයි. මෙරට සිංහලයන්ගේ සංයමය පිළිබඳ ප්‍රශ්න තියෙනවා. ඉක්මණින් නිගමනවලට ඒමට බොහෝ දෙනාට අවශ්‍යයි. දුමින්ද සිල්වාට සමාව දීම හරි ද වැරදි ද යන්න තීරණය කළ හැක්කේ නඩු විභාගය කියවීමෙන් පමණයි. හිරුණිකා ද වරක් පාර්ලිමේන්තුවේ දී කියා සිටියේ තම පියාට වෙඩි තැබුවේ දුමින්ද නොවන බවත් පළමුවෙන් වෙඩි තැබුණේ දුමින්දට බවත්. ඇයට අනුව දුමින්ද සිල්වාට මරණ දඬුවම නියම කෙරී ඇත්තේ මිනී මැරුම සැලසුම් කළාට. නඩු තීන්දුව සංගත නම් දුමින්දට සමාව දීම ප්‍රශ්නයක්. එහෙත් නඩු තීන්දුවෙත් පරස්පර ඇත්නම් සමාව දීම ප්‍රශ්නයක් නො වෙයි.

Friday, 25 June 2021

දුමින්ද හා තානාපතිනිය

 

දුමින්ද හා තානාපතිනිය

 

මා දුමින්ද සිල්වා දැක ඇත්තේ එක් දවසක් පමණයි. ඒ ඕඩෙ පන්සලේ (ශ්‍රී ලංකා විද්‍යාලය) පැවති උත්සවයකදි. ඒ උත්සවයට ඇල්ලෙ ගුණවංශ හාමුදුරුවොත් චම්පක රණවකත් සහභාගි වුණා. එදා මා දුමින්ද සමග වචන කිහිපයකට වඩා කතා කළේ නැහැ. ඉන් පෙරවත් පසුවවත් ඔහු සමග වචනයක්වත් කතා කර නැහැ.

Thursday, 24 June 2021

අපේ හාමුදුරුවන් වෙතටයි

 

අපේ හාමුදුරුවන් වෙතටයි

 

ඔබ වහන්සේ මා කියන දේ සතපහකටවත් ගණන් නොගන්නා බව මා දන්නවා. මා සමහර විට මහාවංසය සමග එහෙමත් නැත්නම් අටුවා ව සමග එකඟ නොවන දේ කියනවා වෙන්න පුළුවන්. එසේත් නැත්නම් මෙරට බොහෝ උගතුන් බුද්ධිමතුන් වියතුන් මෙන් ම ඔබ වහන්සේත් මා නූගතකු ලෙස සලකනවා වෙන්න පුළුවන්. මා ත්‍රිපිටකයේ දන්නේ සූත්‍ර දහයකටත් අඩු සංඛ්‍යාවක්. ත්‍රිපිටකය වනපොත් කළ අය සිය ගණනක් ඉන්න රටක මට බුදුදහම ගැන කියන්න තියෙන්නේ මොනවා ද කියා ඔබ වහන්සේ හිතනවා ඇති. 

Wednesday, 23 June 2021

ආණ්ඩුවක් පළවා හරිමු

 

ආණ්ඩුවක් පළවා හරිමු

 

රටක ආණ්ඩු කීයක් තියෙනවා ද කියන එක ප්‍රශ්නයක්. කවුරු හරි හිතනවා නම් එක්සත් ජනපදවල ඇත්තේ ජෝ බයිඩන්ගේ ආණ්ඩුව පමණක් ය කියා එය වරදවා වටහා ගැනීමක්. බයිඩන්ගේ ආණ්ඩුවට නිල ආණ්ඩුව කියා කියන්න පුළුවන්. ඒත් ඔත්තු සේවා සමහර විට නිල ආණ්ඩුවට නොදන්වා කටයුතු කරනවා. ඒවාත් සමහර විට  ක්‍රියා කරන ආණ්ඩු. ඇතැම් ව්‍යාපාරිකයන්ගේ ද ආණ්ඩු තියෙනවා. එංගලන්තය ඉන්දියාව ආදී රටවලත් තත්වය එහෙමයි.

Tuesday, 22 June 2021

ණයක් වූ ණය ආර්ථිකය

 ණයක් වූ ණය ආර්ථිකය 


ආර්ථික අර්බුදයක් තියෙන බව ඇතැම් ඇමතිවරු පිළිගැනීම සුබ ලකුණක්. විවිධ සංස්ථා ණය බරින් මිරිකිලා. ඇතැම් සංස්ථා වෙනත් සංස්ථාවලට ණයයි. සියලු සංස්ථා රාජ්‍ය බැංකුවලට ණයයි. විපක්‍ෂයේ පඬියන් පඬි නැට්ටන් කියන්න පුළුවන් මේ සියල්ල වත්මන් ආණ්ඩුවේ වැරදි ප්‍රතිපත්තිය නිසා වූවක් කියල. ඒත් ඔය ණය ගැනීම අද ඊයේ ආරම්භ වුණු එකක් නො වෙයි. යහපාලන කාලෙ කිසිම සංස්ථාවක් වෙනත් සංස්ථාවකට හරි රාජ්‍ය බැංකුවකට හරි ණය වෙලා තිබුණෙ නැද්ද? 

Monday, 21 June 2021

දිවයින හා ජාතිකවාද

 

දිවයින හා ජාතිකවාද

 

උපාලි පුවත්පත් සමාගමේ කළමනාකාර අධ්‍යක්‍ෂ ව සිටි ජේම්ස් ලැනරෝල් මහතා මිය ගොස් ඇති බව මා දැන ගත්තේ අද උදේ දිවයින පුවත්පත කියවීමෙන්. ජේම්ස් ලැනරෝල් යනු කවුද කියා දිවයිනේ (ලංකාවේ) තියා අද උපාලි පුවත්පත් සමාගමේ වැඩ කරන බොහෝ දෙනකු නොදන්නවා ඇති. උපාලි පුවත්පත්වලට යම් ජාතිකත්වයක් දීමට ප්‍රධාන වශයෙන් කටයුතු කළ දෙදෙනකු හිටියා. එක් අයකු වූයේ ජේම්ස් ලැනරෝල් මහතා. අනෙක් තැනැත්තා එඩ්මන්ඩ් රණසිංහ මහතා. ලැනරෝල් මහතා පරිපාලන සේවයේ සිටි අයෙක්. ඔහු ජේ ආර් ජයවර්ධන යටතේත් සේවය කළා. එඩ්මන්ඩ් රණසිංහ මහතා කලකට පෙර එ ජා ප හිතවතෙක්. ඔහු සියරට පුවත්පතේ කතුවරයා ලෙසත් කටයුතු කර තියෙනවා.

Sunday, 20 June 2021

නැගෙනහිර පර්යන්තය හා වාම දේශපාලනය

 

නැගෙනහිර පර්යන්තය හා වාම දේශපාලනය

 

කුම්බලා මාළු කෑවා නම් දිරවා ගනින් බළලෝ කියා කතාවක් තියෙනවා. ඒ අතර අනේ සකෝ බල ලෝ කියා කතාවකුත් තියෙනවා. දෙවැන්නෙන් කියන්නේ ශක්‍රයාට ලෝකය දිහා බලන්න කියා. මා හිතන්නේ කාලයකින් ශක්‍රයා තබා වයිමාවත් ලෝකය දිහා බලා නැහැ කියා. විජය ඇවිත් අවුරුදු දෙදහස් පන්සීයකට වැඩි වුණත් දිව්‍ය ලෝකයේ එය ඔවුන්ගේ දිනවලින් විසිපහක් පමණ. කොවිඩ් 19 ඇවිල්ල තාම තත්පර ගණනක් වෙන්න ඇති. ශක්‍රයා දැන් ම නම් බලන එකක් නැහැ. කොහොමටත් මිනිසුන් අධර්මිෂ්ඨ නම්  ශක්‍රයා බලන්නේ නැහැ. ලංකාවත් මුළු ලෝකයමත් අධර්මයෙන් වැහිලා. ශක්‍රයාට බැලුවත් නොපෙනෙන තරමට ලෝකය වැහිලා.

Saturday, 19 June 2021

දේශපාලන වසංගතය හා වසංගත දේශපාලනය

 

දේශපාලන වසංගතය හා වසංගත දේශපාලනය

 

කොවිඩ් 19 වසංගතය හමුවේත් විපක්‍ෂය කරන දේශපාලනය වසංගතයක් වෙලා. සජිත් නායකයා වුණත් රනිල් නායකයා වුණත් වෙනසක් නැහැ. අනුර ධනදාසලා යටත්විජිතලා සම්ම ජාතියේ විපක්‍ෂ නායකයන් නොවන නිසා ඔවුන් ගැන කතා කිරීමෙන් වැඩක් නැහැ.  විපක්‍ෂ නායකයන් නොවන බව කීමෙන් අදහස් කෙරෙන්නේ ඔවුන් ජනාධිපති අගමැති වන බවක් නො වෙයි. ඔවුන්ට ඊළඟ පාර්ලිමේන්තුවට එන්න වෙන්නේ ඒ සඳහා විශේෂ අවසර පත්‍රයක් ලබා ගැනීමෙන් පමණයි. ඒ රැස්වීම් බලන්න. 

News item on Indian intervention.

 News item on Indian intervention. 


http://island.lk/lankas-amb-in-myanmar-questions-continuing-indian-interference-in-lankas-domestic-affairs/


Friday, 18 June 2021

ගෝපාල් ලංකාපාල් ද?

 

 

ගෝපාල් ලංකාපාල් ද?

 

ෂමින්ද්‍ර ෆර්ඩිනැන්ඩුගේ වාර්තාවකට අනුව සම්බන්ධන්ගේ නායකත්වයෙන් දෙමළ ජාතික සංධානයේ නියෝජිත පිරිසක් ලංකාවේ ඉන්දීය මහා කොමසාරිස් ගෝපාල් බග්ලේ හමුවෙලා. දෙමළ ජාතික සංධානයේ නියෝජිත පිරිසට  මාවෙයි සේනාධිරාජා, ඒබ්‍රහම් සුමන්තිරන්, ධර්මලිංගම් සිද්ධාර්තන් හා සෙල්වම් අඩෙයික්කලනාදන් අයත් වෙලා. ඉන්දීය මහා කොමසාර්ස් සමග නියෝජ්‍ය මහා කොමසාර්ස් විනෝද් ජේකබ් හා දේශපාලන උපදේශිකා බානු ප්‍රකාශ් සාකච්ඡාවට සහභාගි වෙලා.

Thursday, 17 June 2021

පැරදීලා පලා ගියේ නැහැ

 

පැරදීලා පලා ගියේ නැහැ

 

එක්සත් ජාතීන්ගේ සංවිධානයේ මහා සභාවේ සභාපති ධුරයට මාල දිවයිනේ විදේශ ඇමති පත්වෙලා. එය දේශපාලන වශයෙන් බලවත් තනතුරක් නො වෙයි. එහෙත් මෙයින් හෙළිවන කරුණක් තියෙනවා. තවමත් එක්සත් ජාතීන්ගේ මහා සභාව  බටහිරයන්ට පාලනය කළ හැකි බව. එක්සත් ජාතීන්ගේ සංවිධානයේ සභාපති ධුරයට පැවති තරගයේ දී මාලදිවයින් විදේශ ඇමති පිටුපස බටහිර රටවල් හා ඉන්දියාව හිටියා. ඔහුට විරුද්ධ බලවත් අපේක්‍ෂකයා වූයේ ඇෆ්ගනිස්ථානයයි. ඒ පිටුපස චීනය රුසියාව හා පකිස්ථානය හිටියා. වැඩි ඡන්ද ඉතා විශාල සංඛ්‍යාවකින් මාලදිවයින දිනා තිබෙනවා. බටහිර ක්‍රිස්තියානි නූතනත්වය කඩා වැටෙද්දී ද හරි හමන් විකල්පයක් නැති වීමේ ප්‍රශ්නයයි තියෙන්නේ. එය හොඳ තත්වයක් නො වෙයි. අද මුළු ලොව ම අසමත්. එහෙත් විකල්පයක් නැහැ.

Wednesday, 16 June 2021

ඉගැන්වීම ගැන ඉගෙනීමක්

 

ඉගැන්වීම ගැන ඉගෙනීමක්

 

ඉගැන්වීමෙන් කෙරෙන්නේ යම් සමාජයක පවතින දැනුම ඊළඟ පරම්පරාවට ලබා දීමට කටයුතු කිරීමයි. එයින් කියැවෙන්නේ සමාජයේ පවතින සියලු දැනුම් ඊළඟ පරම්පරාවට ලබා දෙන බව නො වෙයි. දැනුමෙන් කොටසක්, විශේෂයෙන් ඒ සමාජයේ ජීවත්වීම සඳහා අවශ්‍ය රැකියාවක් කිරීම ඇතුළු ජීවනෝපායක් සඳහා අවශ්‍ය කොටසක්,  ලබා දෙන අතර ඉතිරිය ලබා ගැනීම සඳහා වූ මග පෙන්වීම ඉගැන්වීමෙන් කෙරෙනවා. ආගමික දැනුම්වලින් මරණින් මතු ජීවත්වීම ගැන ද කියනවා. බුදුදහමින් නම් කියන්නේ නැවත නූපදින විධියට ජීවත්වෙන්න කියා.  වත්මන් බටහිර ක්‍රිස්තියානි නූතනත්වයේ විශාල දැනුම් සම්භාරයක් ඉංගිරිසියෙන් තියෙනවා. ඒ දැනුම ලබා ගැනීම ඉංගිරිසියෙන් තමයි කරන්න වෙන්නෙ.

Tuesday, 15 June 2021

චීන ජාතික ෂෙං හෙ හා භාෂා තුනේ සෙල්ලිපිය

 

චීන ජාතික ෂෙං හෙ හා භාෂා තුනේ සෙල්ලිපිය

 

 

පසුගිය දිනෙක හිටපු නාවික හමුදාපතිවරයකු වූ රවි විජේගුණරත්න මහතා ගාල්ලේ ත්‍රෛභාෂික සෙල්ලිපිය ගැන නැවතත් මතක් කර තිබුණා. ඒ මහතා ප්‍රශ්න කරන එක කරුණක් නම් එහි සිංහල භාෂාවෙන් යමක් සඳහන් නොවීමයි. සෙල්ලිපිය ලියා ඇත්තේ චීන, දෙමළ හා පර්සියානු (ඉරාන) භාෂාවලින්. මේ සෙල්ලිපිය ගැන විවිධ අය විවිධ මත පළ කරනවා. එකල ගාල්ලේ දෙමළ කතාකරන ජනයා සිටි බවත් ඔවුන් සිංහලයන් සමග එකට හිටි බවත් කියනවා. චෙල්වනායගම්ගේ ලේලියක වන නිර්මලා චන්ද්‍රහාසන් ඒ කතාව කියන්නේ මෙරට අනාදිමත් කාලයක සිට සිංහල හා දෙමළ කතාකරන ජනයා එක මට්ටමක සිටි බව කීමට.

Monday, 14 June 2021

රනිල් ගැට

 

රනිල් ගැට

 

ලංකාවේ ඉන්න උගතුන් වියතුන් බුද්ධිමතුන් එක්ක මට හැරෙන්නවත් බැහැ. බොහෝ දෙනා තෙල් මිල වැඩි කිරීම සම්බන්ධයෙන් සාගර කාරියවසම් හා උදය ගම්මන්පිළ අතර ඇතිව තියෙන චෝදනා ප්‍රතිචෝදනා දකින්නේ නාට්‍යයක් ලෙස. ඔවුන් කියන්නේ රෑට එක්ව හොරකමේ ගිහින් දවල්ට ජනතාව රවටන්න බැණ ගන්නවා කියා. ඒකත් එක තේරුම් ගැනීමක් තමයි. ඒත් මේ ඊනියා නාට්‍යයේ දෙපැත්තේ නළුවන් දිහා බැලුව ම එහෙම රඟදැක්වීමක් පෙනෙන්නේ නැහැ.

Sunday, 13 June 2021

ගම්මන්පිළ පොරක් ද?

 

ගම්මන්පිළ පොරක් ද?

 

කොවිඩ් නෙවෙයි මොන වසංගතය ආවත් මෙරට මධ්‍යම පංතිය තම අසික්කිත පුරුදු අත්හරින්නේ නැහැ. මධ්‍යම පංතියේ ඉතා වැඩි පිරිසක් ඊනියා උගත්තු. පොරවල්. ඒ උගතුන්ගෙන් විශාල ප්‍රමාණයක් අධ්‍යාපනය නිසා මධ්‍යම පංතියට පැන ගත් අය. මධ්‍යම පංතිය පොදුවේ ගත්කල දරුවන් නිෂ්පාදනය කරනවා හැරුණු විට වෙන නිෂ්පාදනයක් කරන්නේ නැහැ. ඔවුන් ජීවත් වන්නේ අසරණ ගැහැණුන් දුක් මහන්සි වී උපයන මුදලින්. නෑ ඔවුන්ගේ ගෑණුන් නො වෙයි. ඇඟලුම් කර්මාන්තයෙහි හා බටහිර ආසියාවේ (ඊනියා මැද පෙරදිග) වැඩ කරන ගැහැණුන්. මටත් ඩොලර්වලින් පඩි ගෙවන්නේ ඒ අය උපයන ඩොලර්වලින්. මා රටට සතපහක් උපයන්නේ නැහැ. මාත් ඇතුළු මධ්‍යම පංතිය පඬිකමට කියන්නේ අපෙන් නිෂ්පාදනයක් නැති වුවත් සේවාවන් සිදු වෙනවා කියා.

Saturday, 12 June 2021

අපි පොරවල් ද?

 

අපි පොරවල් ද?

 

බොහෝ කලකට පෙර පාසලේ දී විශ්වවිද්‍යාලයේ දී බොහෝ දෙනාට අනුව මා දක්‍ෂ ශිෂ්‍යයෙක් වුණා. අද යොදා ගන්න චචන අනුව නම් පොරක් වුණා. මාත් එහෙම සිතුවේ නැහැ කියන්න බැහැ. මටත් අවශ්‍ය වුණේ විද්‍යාඥයෙක් වෙන්න. ඒ මා පොරක් කියා සිතූ නිසාත් වෙන්න පුළුවන්. මට යම් යම් දේ ගැන හැකියාවකුත් තිබුණා. ප්‍රවාදාත්මක භෞතික විද්‍යාවට මගේ කැමැත්තකුත් තිබුණා.