Main Logo

Monday, 11 December 2017

අවාසියට හැරී ඇති නන්දිකඩාල්

අවාසියට හැරී ඇති නන්දිකඩාල්


ඒකාබද්ධ විපක්‍ෂය (පොහොට්ටුව) හා මෛත්‍රිපාල කල්ලිය අතර සාකච්ඡා අවසන් වී ඇති බවක් පෙනෙනවා. මේ සාකච්ඡා කෙරුණේ රට ජාතිය ආගම ගැන හිතාගෙන නොව බලය හා හුදෙක් බලය  පමණක් ගැන සිතාගෙන. සාකච්ඡා  ජාතිකත්වයක් මත කළ යුතු යැයි අප කිහිප දෙනකු කියා සිටි නමුත් එය සාර්ථක වූයේ නැහැ. මා එසේ කියා ඇත්තේ කොහේ ද කියා ජනමාධ්‍ය පරිහරණය කරන පඬියකු අහන්න පුළුවන්. මේ ලිපි කියවන කිහිප දෙනා නම් එසේ කියා ඇත්තේ කොතැන ද කියා දන්නවා ඇති. අප මුල සිට ම, රනිල් අගමැති වූ කාලයේ සිට ම, කීවේ රනිල් අගමැති කමෙන් ඉවත් කර මහින්ද අගමැති ලෙස පත්කරන ලෙස. ඒ මේ පළාත් පාලන ආයතන මැතිවරණවලට බොහෝ කලින්.

Sunday, 10 December 2017

ඒකි ගැන තවදුරටත්

ඒකි ගැන තවදුරටත්

බුදුදහමට ඇති ප්‍රධාන ප්‍රශ්නය බුදුදහම විශ්වාස නොකරන අය බුදුදහම කීියා දීමට ඉදිරිපත් වීම. බුදුදහම ප්‍රත්‍යක්‍ෂය මත පදනම් වෙනවා. එහෙත් හැම විට ම හැම අයකුට ම ප්‍රත්‍යක්‍ෂය මත පමණක් පදනම් වෙන්න බැහැ. අපට බුදුහාමුදුරුවන් දේශනා කර ඇති දේ (අඩු තරමෙන් දේශනා කර ඇතැයිි කියන දේ) මත පදනම් වෙන්න වෙනවා. මට තේරෙන විධියට නම් ප්‍රත්‍යක්‍ෂය පමණක් වැදගත් වන්නේ නිවන් අවබෝධයේ දී. එහෙත් ඒ ප්‍රත්‍යක්‍ෂය  ලෞකික ප්‍රත්‍යක්‍ෂයක් නම් නො වෙයි.

Saturday, 9 December 2017

කෝ අර අවපාතය

කෝ අර අවපාතය

පසුගිය දිනවල ප්‍රදේශ කිහිපයකට මහත් හානියක් කළ ඔකීගෙන් පසු තවත් කරදරයක් පැමිණෙන බව කාලගුණ විද්‍යා දෙපාර්තමේන්තුව අනාවරණය කළා. සමහරුන් කීවේ ඕකි ගියාට පසු ඒකි එනවා කියලා. ඒ කොහොම වුණත් කාලගුණ දෙපාර්තමේන්තුව ඒ ගැන විස්තර පළ කළා. බෙංගාල බොක්කේ ගිණිකොණ දෙසින් ඇරඹී  ලංකාව හා ඉන්දියාව පැත්තට ගමන් කර වායු අවපාත තත්වයකට පත්වන බවක් සඳහන් වුණා. පසුගිය අටවැනි දා තෙක් එහි බලපෑම තිබිය හැකි බවත් ධීවර ජනතාවට මුහුදු යෑමෙන් වැළකී සිටින ලෙසත් කියැවුණා. මේ අනාවැකි අප දෙස බලා සිටින ජාත්‍යන්තරයෙන් ද කියැවුණා.

Friday, 8 December 2017

ඒකාබද්ධ විපක්‍ෂයේ නත්තල්

ඒකාබද්ධ විපක්‍ෂයේ නත්තල්


ඒකාබද්ධ විපක්‍ෂයේ ඇතැමුන් අමන කතා කියන්න පටන් අරන්. පළාත් පාලන මැතිවරණ වැදගත් බව ඇත්ත. එහෙත් එහි අරමුණ කෙසේ නමුත් අදාළ ආයතනයේ සභාපති ධුරය හෝ නගරාධිපති ධුරය හෝ ලබා ගැනීම නො වෙයි. එහෙත් ඒකාබද්ධ විපක්‍ෂයේ ඇතැම් අය කටයුතු කරන්නේ බෞද්ධයන් නත්තල සැමරිය යුතු ය යන අදහස දරුවන්ට ලබා දෙන රූපවාහිනි නිවේදක නිවේදිකාවන් මෙන්. මේ නිවේදිකාවක් අහනවා කුඩා බෞද්ධ දරුවකුගෙන් නත්තලට නත්තල් ගහක් සරසන්නේ නැත් ද කියා. කුඩා බෞද්ධ දරුවන් නත්තල් ගීතවලින් මත් කරනවා.

Thursday, 7 December 2017

අපට රෙසිඩන්ට්ලා එපා

අපට රෙසිඩන්ට්ලා එපා

ඇමරිකාව නමින් හැඳින්වෙන ඇමරිකාවේ එක්සත් රාජ්‍ය (United States of America) ලෝකයේ අනෙක් රටවල දූෂණ ගැන උනන්දුවක් දක්වනවා. ඇමරිකාව කියන්නේ මහාද්වීපයක නමක්. එය දකුණු ඇමරිකාව හා උතුරු අමෙරිකාව යනුවෙන් කොටස් දෙකකටත් බෙදෙනවා. මිනිසුන් කැපූ පැනමා ඇලෙන් අද වෙන් වෙලා තිබුණත් මේ එකම භූමියක්. කැනඩාව හා මෙක්සිකොව පමණක් නොව චිලී බ්‍රසීලය ආජන්ටිනාව වෙනිස්‍යුලාව වගේ රටවලුත් ඇමරිකාවේ. එහෙත් ඒ එක රටක්වත් ඇමරිකාවේ ආජන්ටිනාව වගේ නම් දාගෙන නැහැ.

Wednesday, 6 December 2017

මැතිවරණයට පෙර ජාතිකත්වය නොවීම

මැතිවරණයට පෙර ජාතිකත්වය නොවීම


මෙකල දේශපාලනය හරිම අවුල්. දේශපාලනඥයන් කටුස්සන්ටත් වඩා ඉක්මනට වෙනස් වෙනවා. උදේ කියපු දේ හවසට කියන්නේ නැහැ. හවසට කියන්නේ වෙන ම දෙයක්. රූපවාහිනි නාලිකාවලට නම් වඩා වැදගත් නත්තල. ඔවුන් නත්තල ගැන කතා කරන්නේ නොවැම්බර් අග සිට. නත්තල් ගීත නිතර ප්‍රචාරය වෙනවා. වෙළෙඳ සමාගම් නත්තලට භාණ්ඩ විකුණනවා. එක් නිවේදිකාවක් කියනවා අප නත්තල වෙනුවෙන් කාර්ය බහුල වෙලා කියලා. එහෙම කාර්ය බහුල වෙන අයත් ඇති. මේ රූපවාහිනියේ වැඩ. එහෙත් ඔවුන් හිතන තරම් අනෙක් බොහෝ අයට නත්තලට  වැඩක් නැහැ. නත්තල අද බටහිරයන්ගේ උත්සවයක්. ක්‍රිස්තුස් වහන්සේ උපන්නේ හිම නොවැටෙන බටහිර ආසියාවේ වුවත් නත්තල් පින්තුර හිමෙන් වැහිලා. ක්‍රිස්තුස් වහන්සේ උපන්නේ අයිස්ලන්තයේ ද කියා වෙලාවකට හිතෙනවා. බටහිරයන්ගෙ උත්සවයක් හැටියට නත්තල අප මත පටවනවා. මේ බටහිර සංස්කෘතික ආධිපත්‍යය.

Tuesday, 5 December 2017

සම්මුති හා එකඟතා

සම්මුති හා එකඟතා


ඊයේ (හතරවැනි දා) බදුල්ලේ පැවැත් වූ පොදු ජන පෙරමුණේ රැස්වීමට විමල්, ගම්මන්පිල, ඩලස්, දිනේෂ් සහභාගි වෙලා නැහැ. ඒ අහම්බයක් වීමට ඇති ඉඩකඩ ඉතා අඩුයි. සමහරවිට එක් අයකුට දෙදෙනකුට පෞද්ගලික හේතු, මගුල් ගෙවල්, මළ ගෙවල් ආදී වෙනත් කටයුතු, තියෙන්න ඇති. ඒත් ඒ සියලු දෙනාට ම එක විට පෞද්ගලික හේතු ඇති වුණයි කියලා හිතන්න බැහැ.

Monday, 4 December 2017

සරවනමුත්තුලාගේ ප්‍රශ්නය

සරවනමුත්තුලාගේ ප්‍රශ්නය

පාකියසෝති සරවනමුත්තු ගැන බොහෝ දෙනා දන්නව වෙන්න පුළුවන්. විකල්ප ප්‍රතිපත්ති ගැන කියවන පාකියසෝති සුනේත්‍රාගේ මිතුරෙක්. චන්ද්‍රිකාගේත් මිතුරෙක්. මේ සිංහල හා දෙමළ ප්‍රභූන් වැඩ කරන්නේ එකට. මොවුන්ට ප්‍රශ්නයක් වී ඇත්තේ සර්වජන ඡන්දය. හෙට අනිද්දා, හැරිසන් හා රනිල් කියන විධියට පෙබරවාරි දහවැනි දා පළාත් පාලන ආයතන මැතිවරණ පැවැත්වෙනවා. මැතිවරණ කොමිසම තවමත් ඒ ගැන නිශ්චිත යමක් කියලා නැහැ. පෙබරවාරි 10 ගැන මැකො රනිල්ට කිව්ව ද නැත්නම් රනිල් මැකොට කිව්ව ද කියන එක පැහැදිලි නැහැ. සමහර විට හැරිසන් මේ දෙන්නට ම කියන්න ඇති. හැරිසන් වගේ අය නැත්නම් ජනමාධ්‍යත් නැහැ.

Sunday, 3 December 2017

දෙමළ ජාතිවාදයට ආවඩන ඊනියා ස්මාට් ජාතිකවාදය  හෙවත් මොට ජාත්‍යන්තරවාදය

දෙමළ ජාතිවාදයට ආවඩන ඊනියා ස්මාට් ජාතිකවාදය  හෙවත් මොට ජාත්‍යන්තරවාදය

ඊනියා ස්මාට් ජාතිකවාදීන්ට අනුව ඔවුන් විකල්ප දකුණ ලෙස හඳුන්වන ජාතිකවාදීන්ට මෙලෝ දෙයක් තේරෙන්නේ නැත. ඔවුන් සිතන්නේ දේශපාලනය ඊනියා දේශපාලන විද්‍යාව හැදෑරුවන්ට පමණක් තේරෙන මහා විද්‍යාවක් ලෙස ය. රෝගීන් වෙදකම සඳහා ඊනියා ගොඩ වෙදුන්, ශාන්තිකර්ම කරන්නන් වෙතට යන විට වෛද්‍යවරයකුට හැඟෙන ආකාරයේ කම්පාවක් ජනයා දේශපාලන ප්‍රශ්න සාකච්ඡා කිරීමට ජාතිකවාදීන් වෙතට යන විට තමන්ට හැඟේ යැයි පසුගිය දා ඊනියා පශ්චාත් උපාධි ද ඇති මහා දේශපාලන විද්‍යාඥයකු ප්‍රකාශ කර තිබුණා. ඡන්ද බලය දේශපාලන විද්‍යාව හැදෑරුවන්ට  පමණක් සීමා කරමු ද?

Saturday, 2 December 2017

ඉංගිරිසි කතා කරන ජාතිකවාදීන්


ඉංගිරිසි කතා කරන ජාතිකවාදීන්

ජාතිකවාදීන් අතර විවිධ අය ඉන්නවා. එමෙන් ම දෙමළ ජාතිවාදය ගැනත් ඔවුන් අතර විවිධ මත තියෙනවා. ජාතිකවාදීන් ලෙස මා නම් කරන්නේ ඊනියා ස්මාට් ජාතිකවාදීන් නො වෙයි. ඔවුන් ජාතිකවාදීන් නො වෙයි. ඔවුන් ස්මාට් නොවන ජාත්‍යන්තරවාදීන්. අද අප ඉන්න කණගාටුදායක තත්වයට ඔවුනුත් වග කියන්න ඕන. මුලින් ම ජෙනීවාහි අප බටහිර ගැටවලට හසු කෙළේ ඒ ඊනියා ස්මාට් ජාතිකවාදීන්. මෙහි දී මා සඳහන් කරන්නේ ඔවුන් ගැන නො වෙයි. ඔවුන් ව්‍යාජ පඬියන් පමණයි.

Friday, 1 December 2017

විග්නේෂ්වරන් හා මැතිවරණ

විග්නේෂ්වරන් හා මැතිවරණ

ප්‍රභාකරන්ගේ උපන් දිනය නිමිත්තෙන් පැවැත්වූ උත්සවයක දී උතුරු පළාතේ අධ්‍යාපන ඇමති ජාතික කොඩිය එසවීම ප්‍රතික්‍ෂෙප කිරීම ගැන කතා කෙරුණා. රුවන් විජේවර්ධන ඇමතිවරයා කියා තිබුණා ඒ පිළිබඳ සොයා බලන බවත් ජාතික කොඩිය එසවීම ප්‍රතික්‍ෂෙප කිරීම ගැන දඬුවම් කළ යුතු බවත්. ඒ ගැන දැන් කෙරෙන්නේ කුමක් ද කියා රුවන් විජේවර්ධන අපට කියනවා ද?

Thursday, 30 November 2017

ඊනියා ස්වාභාවික ආපදා

ඊනියා ස්වාභාවික ආපදා

පළාත් කිහිපයක ම පාසල් පැවැත්වෙන්නෙ නැහැ. ඊයේ රාත්‍රී මහා සුළඟක් හමා ගියා. ලෝකයේ ම කාලගුණය වෙනස් වෙලා. අපේ රටේ විතරක් නොවෙයි. භූමිකම්පා සුළි සුළං ගංවතුර හැම රටක ම පාහේ වාර්තා වෙනවා. මෙරට පාලකයන් ධර්මිෂ්ට නැහැ. එහෙත් කාලගුණ විපර්යාසය ඒ හින්ද ම නොවෙයි. මිනිසුන් ද ධාර්මික නැහැ. ලෝකයේත් එහෙමයි. දළ පූට්ටුවා මරා දැම්මේ කවුද කියා දන්නේ නැහැ. ඒ ඝාතකයන්ට දේශපාලන අනුග්‍රහයක් ආරක්‍ෂාවක් තිබෙන්නත් ඇති. නොතිබෙන්නත් ඇති. එහෙත් දළ පූට්ටුවා මරා දමා වැඩි දිනක් යන්නට පෙර තවත් ඇතකු මරා දමා ඇති බව වාර්තා වෙනවා. ඒ මිනිසුන්ගේ ධාර්මිකබවට නිදසුන්.

Wednesday, 29 November 2017

මිනීමරුවන් සැමරීම

මිනීමරුවන් සැමරීම

දෙමළ ජාතිවාදීන් ප්‍රභාකරන් ඇතුළු මිනීමරුවන් සමරලා. ප්‍රභාකරන් වෙනුවෙන් කේක් කෑමට වවුනියා මණ්ඩපයේ සිංහල සිසුන්ට බල කරලා. යාපනය සරසවියේ ප්‍රභාකරන් සැමරීමට ගුරුවරු සිසුන් සමග එක් වෙලා. ප්‍රභාකරන්ගේ පින්තූර යාපනයේ ප්‍රදර්ශනය කරලා. රුවන් විජේවර්ධන කියනවා චෙන්නායිහි පමණක් ප්‍රභාකරන්ගේ විශාල රූප ප්‍රදර්ශනය කරලා තිබුණා කියලා. එයින් කියන්නෙ දෙමළ ජාතිවාදය ලංකාවට විරුද්ධ ව තමිල්නාඩුවේත් තියෙන බව. එහෙත් ප්‍රභාකරන් සැමරීමට විරුද්ධ ව ජ වි පෙ වචනයක්වත් කියන්නෙ නැහැ. ආණ්ඩුවත් බොරුවට හරි ප්‍රභාකරන් සැමරුවන්ට විරුද්ධව නීතිය ක්‍රියාත්මක කරනවයි කියද්දි ජ වි පෙ ඒ ගැන කතාකරන්නෙ නැහැ. ආණ්ඩුව අද නීතිය ක්‍රියාත්මක කිරීමක් ගැන කියන්නේ පළාත් පාලන මැතිවරණ ළඟ නිසා. එහෙත් නීතිය ක්‍රියාත්මක කිරීමට පෙර නීතිය නවාවි. ඊට පෙර පළාත් පාලන මැතිවරණ තියේවි.

Tuesday, 28 November 2017

වම දකුණ

වම දකුණ

අද විකල්ප දකුණ (Alt - right) යන්න ජාතිකවාදීන්ට යොදා ගැනීමට මෙරට ඇතැම් පඬියන් උත්සාහ දරණවා. මේ මෙරට කිසිම පඬියකු නිර්මාණය කළ සංකල්පයක් නො වෙයි. මේ සංකල්පයත් බටහිර නිර්මාණයක්. එය රොබර්ට් ස්පෙන්සර් නම් ඇමරිකානු ජනමාධ්‍යවේදියා 2008 දී පමණ හඳුන්වා දුන් සංකල්පයක් ලෙසයි කියැවෙන්නේ. ඒ සංකල්පය සාමාන්‍යයෙන් යෙදෙන්නේ සුදු ස්වොත්මවාදී අදහස්වලට. මෙරට පඬියන් ද මේ ස්වොත්තමවාදී කතා කියනවා. මේ අනුකාරක පඬියන් සියල්ල ගන්නේ බටහිරින්. ඔවුන් තරම් බටහිර දැනුම් ආධිපත්‍යයට හිස නමන නිවටයන් පිරිසක් මෙරට තබා ලෝකයේවත් නැතිව ඇති. විකල්ප දකුණ යන සංකල්පය ට්‍රම්ප්ගේ ජයග්‍රහණයත් සමග නැවත ඉදිරියට ආවා. ඒත් එය දැන් එතරම් යෙදෙන්නේ නැහැ. මෙරට පඬියන් ඇතැම් විට බටහිර සංකල්ප යොදා ගන්නේ ඒ බටහිර අභාවයට යන විට. බටහිරින් අදහස් සංකල්ප ප්‍රවාද අපට ඒමට තවමත් අවුරුද්දක් දෙකක් යනවා.

Monday, 27 November 2017

සිංහල බුද්ධාගම

සිංහල බුද්ධාගම

සිංහල බුද්ධාගම අද වේගයෙන් ක්‍රිස්තියානිකරණය වෙනවා. ඒ අද ඊයේ පටන්ගත් දෙයක් නො වෙයි. දහනවවැනි සියවසේ අග අප බටහිර නූතනත්වයට යටවීමේ ප්‍රතිඵලයක්. ඕල්කට් බුද්ධාගම ද එහි එක් අංගයක්. මාක්ස්වාදය බටහිර විද්‍යාව ආදී දැනුම් හා ඒ ආශ්‍රිත තාක්‍ෂණය ලංකාවේ දී සිංහල බුද්ධාගම ක්‍රිස්තියානි කිරීමට දැඩි බලපෑමක් කර තිබෙනවා. බටහිර නූතනත්වය මුළුමනින් ම ග්‍රීක යුදෙව් ක්‍රිස්තියානි චින්තනය මත බිහිවූවක්. එහි අධිපතිවාදී සංස්කෘතිය යුදෙව් ක්‍රිස්තියානියේ ඇංග්ලිකන් ක්‍රිස්තියානි සංස්කෘතිය. අද වන විට සිංහල බුද්ධාගම ක්‍රිස්තියානිකරණය වීම ඉතා වේගවත් වෙලා.

Sunday, 26 November 2017

තීරණාත්මක මොහොතක්

තීරණාත්මක මොහොතක්

මේ මොහොතේ සිංහලයන්ගේ ප්‍රමුඛතාව විය යුත්තේ කුමක් ද? සිංහලයන්ට, විශේෂයෙන් ම සිංහල බෞද්ධයන්ට ඉතිහාසයේ බොහෝ විට වැරදී ඇත්තේ ප්‍රමුඛතා හඳුනාගැනීමට නොහැකි වීමත් අසමගියත් හේතුකොටගෙනයි. ප්‍රමුඛතා හඳුනාගැනීමට නොහැකි වීමට අසමගිය බොහෝ විට බලපා තිබෙනවා. පෘතුගීසීන් ලංකාවට පැමිණි සමයේ රජ පවුලේ සහෝදරවරුන් අතර තිබූ අසමගිය හේතුකොටගෙන පෘතුගීසීන් පළවා හැරීම ප්‍රමුඛතාව ලෙස හඳුනාගැනීමට නොහැකි වුණා. ප්‍රමුඛතාව වූයේ සහෝදරවරුන් අතරින් බලය තිබිය යුත්තේ කාට ද යන්නයි.

Saturday, 25 November 2017

ආණ්ඩුව වෙනස් කළ යුතුයි වෙනස් කළ හැකියි

ආණ්ඩුව වෙනස් කළ යුතුයි වෙනස් කළ හැකියි

දහනවවැනි ව්‍යවස්ථා සංශෝධනයෙන් පසු ජනාධිපතිට අගමැති වෙනස් කිරීමට නොහැකි ය කියන මතය බටහිර විද්‍යාව පට්ටපල් බොරුය කියන අර්ථයෙන් නොවූවත් පට්ටපල් බොරුවක්. අගමැති නොව අමාත්‍ය මණ්ඩලය ම වෙනස් කිරීමට ජනාධිපතිට පුළුවන්. මේ පිළිබඳ ව යමකුට දැන ගැනීමට අවශ්‍ය නම් කළ යුත්තේ දහනවවැනි ව්‍යවස්ථා සංශෝධනය කියවීමයි. මෙකල එය අමාරු වැඩක් නොවෙයි. ඕනෑම අයකුට එක්කෝ ව්‍යවස්ථාව නැත්නම් දහනවවැනි ව්‍යවස්ථා සංශෝධනය බාගත කරන්න පුළුවන්. එහෙත් බොහෝ දෙනා එසේ කරන්නේ නැහැ. මුහුණුපොතේ අයත් පඬි කටකතා කිසිම ඉවක් බවක් නැතිව ප්‍රචාරය කරනවා. ඔවුන් කම්මැලිකමට ව්‍යවස්ථාව බාගත කරගෙන කියවන්නේ නැහැ.

Friday, 24 November 2017

මහින්ද අගමැති කරමු

මහින්ද අගමැති කරමු

මහින්ද අගමැති කරමු කියලා අප සම්මන්ත්‍රණයක් පැවැත්වුවෙ රනිල් අගමැති වූ විගස ම. එහෙත් එය එදා ප්‍රවෘත්තිමය වටිනාකමක් තිබූ ප්‍රකාශයක් ලෙස ජනමාධ්‍ය කල්පනා නොකරන්න ඇති. අද තරමක ප්‍රවෘත්තිමය වැදගත්කමක් එයට තියෙන්න පුළුවන්. ඒත් අපේ ප්‍රකාශ ජනමාධ්‍ය ගණන් ගන්නේ නැහැ. අද මැතිවරණ ගැනත් ඊනියා සමගියක් ගැනත් බොහෝ දෙනා කතා කරනවා. ඒ සමගිය මැතිවරණ මූලික සමගියක් වීම ප්‍රශ්නයක්.

Thursday, 23 November 2017

හිතට වධ දෙන ප්‍රශ්න

හිතට වධ දෙන ප්‍රශ්න

ඊයේ (විසිදෙවැනි දා) ලිපියෙහි සඳහන් ජෝන් වීලර්ගේ සිතට වධ දුන් ප්‍රශ්නය හැරුණු විට තවත් සිතට වධ දෙන ප්‍රශ්න තිබෙනවා. එකක් තමයි මට අනෙක් අයට තේරෙන විධියට යමක් කීමට නොහැකි වීම. වීලර් ආචාර්ය උපාධි හතළිස්පහක පමණ උපදේශක වී සිටියා. එමෙන් ම ෆයින්මාන් ඇතුළු නොබෙල් ත්‍යාගලාභී කිහිප දෙනකු ම ඔහුගේ ශිෂ්‍යයන්. මගේ ශිෂ්‍යයන් බොහෝ දෙනකු අද ඉන්න තැන් බැලුවම කියන්න පුළුවන් ඔවුන්ට මා කී කිසිවක් තේරී නැති බව. එය ඔවුන්ගේ වරදක් වෙන්න බැහැ. තවත් වධ දෙන ප්‍රශ්නයක් නම් සිංහල ජාතියේ අනාගතයයි. අද අපට නායකයකු නැහැ. මුහුණු පොතේ ඉන්න අය කියාවි නායකයන් ඉන්නවා කියා. ඒත් මුහුණු පොත් ප්‍රතිචාර මා කියවන්නේ ඉතා අකමැත්තෙන්. ඔවුන් ප්‍රශ්න දෙස බලන්නේ ඉතා මතුපිටින්.

Wednesday, 22 November 2017

දියගොඩ සැමතැන පෙර ද පසු ද

දියගොඩ සැමතැන පෙර ද පසු ද

ක්වොන්ටම් භෞතිකයේ ද්විත්ව සිදුරු පරීක්‍ෂණය ගැන ඇතැමුන් දන්නවා.  භෞතික විද්‍යාව පිළිබඳ නොබෙල් ත්‍යාගලාභී රිචඩ් ෆයින්මාන් එය තේරුම් ගැනීමට නොහැකි බව ප්‍රකාශ කළා. එහි ඉතිහාසය තරංගවාදය කරා දිව යනවා. තහඩුවක සිදුරු දෙකක් තුළින් ආලෝක ධාරාවක් යවා එය තිරයක් මත පතිත කරවීම මෙහි මූලික කටයුත්ත. එසේ කිරීමේ ප්‍රතිඵලයක් ලෙස තිරයේ රටා නිර්මාණය වෙනවා. මේ රටා තේරුම් කර දුන්නේ, මතක තබා ගන්න තේරුම් කර දුන්නේ, තරංගවාදය මගින්. පසුව ප්ලෑන්ක් ක්වොන්ටම් අදහස ඉදිරිපත් කළා. අයින්ස්ටයින් ෆෝටෝනය යන සංකල්පයට පසුබිම සකස් කළා. ඉන් පසු ආලෝකය ෆෝටෝන ලෙසත් තේරුම් කෙරුණා.

Tuesday, 21 November 2017

මැතිවරණ දේශපාලනය හා බැඳුම්කර මගඩිය

මැතිවරණ දේශපාලනය හා බැඳුම්කර මගඩිය

බැඳුම්කර කොමිසමේ සාක්කි විභාගය අවසන්. එහි වාර්තාව තව සති තුනකින් පමණ නිකුත් වේය කියා හිතනවා. කොමිසමට කළ හැක්කේ නිර්දේශ කිරීම පමණයි. වරදකරුවන් කවුදැයි නිගමනය කිරීම කොමිසමේ කාර්යයක් නො වෙයි. රනිල් කොමිසමට ලිඛිත ව මෙන් ම වාචික ව ද කරුණු දක්වා සිටියා. ඔහු තමන් කරන්නේ කුමක් ද යන්න දන්නා එකම දේශපාලනඥයා. ඔහු මහජන මතයට ගරු කරන්නේ නැහැ. එහෙත් සමහර විට මහජන මතය ඉදිරියේ අඩියක් පස්සට ගන්නවා. ඒ අඩි දෙකක් ඉදිරියට තැබීමේ බලාපොරොත්තුවෙන්.

Monday, 20 November 2017

සත්භාවවේදයට එරෙහිව ඥානවිභාගය

සත්භාවවේදයට එරෙහිව ඥානවිභාගය

පසුගිය දහසයවැනි බ්‍රහස්පතින්දා පේරාදෙණිය විශ්වවිද්‍යාලයේ දර්ශන අධ්‍යයනාංශය මගින් ඉහත සඳහන් තේමාවෙන් සමුළුවක් සංවිධානය කර තිබුණා. එය එකී අධ්‍යයනංශයෙහි ප්‍රධානී  ආචාර්ය චරිත හේරත්ගේ මෙහෙයවීමෙන් පැවැත්වුණේ. මා හිතන්නේ අධ්‍යයනාංශයත් ශාස්ත්‍ර පීඨයත් එහි දී විශාල කාර්යභාරයක් ඉටු කළ බව. ශාස්ත්‍ර පීඨාධිපතිතුමා ඇතුළු ඒ සියල්ලන්ට මගේ ස්තුතිය. සමුළුව පැවැත්වුණේ ලෝක දාර්ශනික දිනය සැමරීමට. විශ්වවිද්‍යාලයකින් මට අධ්‍යයනික දේශනයක් සඳහා ආරාධනයක් ලැබීම හාවා හඳ දැකීම වගේ වැඩක්. චරිත නොවන්නට මට මේ ආරාධනයත් නොලැබෙන බවත් මා දන්නවා.

Sunday, 19 November 2017

ගිංතොට සිද්ධි ඇති වන්නේ ඇයි?

 ගිංතොට සිද්ධි ඇති වන්නේ ඇයි?

ගිංතොට සිද්ධ වුණේ මොකක් ද කියන එක ජනමාධ්‍යයෙන් කියන්නේ නැහැ. එක්තරා වෙබ් අඩවියකට අනුව මෙය බයිසිකලයක යම් අයකු හැප්පීම නිසා හටගත්තක්. අවාසනාවකට මෙන් හැප්පීමට අමතර ව ඒ සිද්ධියට සම්බන්ධ වී ඇත්තේ එක ම ජාතියකට හෝ එක ම ජනවර්ගයකට අයත් දෙදෙනකු නො වෙයි. ප්‍රශ්නය තාවකාලික ව සමනයකට පත් වී ඇතත් දින දෙකකින් නැවත ඇවිළී ගිහින්.

Saturday, 18 November 2017

සංහිඳියාවේ දිග පළල

සංහිඳියාවේ දිග පළල

උතුරු පළාතේ අධ්‍යාපන ඇමති පාසල් උත්සවයක දී ජාතික කොඩිය එසවීම ප්‍රතික්‍ෂෙප කරලා. ඔහු මෙරට රටවැසියකු නො වේ ද? ඔහුගේ ක්‍රියාව අනුමත කළ හැකි ද? ඊනියා සංහිඳියාව වෙනුවෙන් අප එවැනි ක්‍රියා නොසැලකිය යුතු ද? මෙය ටික දිනකින් උතුරේ ජනතාවත් අමතක කරාවි ද?

Friday, 17 November 2017

බැඳුම්කරය හා මැතිවරණ දේශපාලනය

බැඳුම්කරය හා මැතිවරණ දේශපාලනය

අර්ජුන් ඇලෝෂියස් සමග දූරකතන සම්බන්ධකම් පැවැත් වු පාද සටහන් කරුවන් රාශියකගේ විස්තර හෙළි වෙලා. ඔවුන් මොනවා කතා කළා ද කියා අප දන්නේ නැහැ. සමහරවිට පෞද්ගලික කාරණා වෙන්නත් බැරි නැහැ. ඒත් අපට ප්‍රශ්න තියෙනවා. සැක තියෙනවා. ඒ සැක දුරු කිරීම පාද සටහන් කරුවන්ගේ මෙන් ම රවි කරුණානායකගේත් රනිල්ගේත් පමණක් නොව මෛත්‍රිපාලගේත් කාර්යයක්. 

මේ බැඳුම්කර මගඩියේ මුල මෛත්‍රිපාලත් ඉන්නවා. ඒ සම්බන්ධ පළමු කෝප් වාර්තාව පාර්ලිමේන්තුවට ඉදිරිපත් වීමට ඔන්න මෙන්න තිබිය දී මෛත්‍රිපාල පාර්ලිමේන්තුව විසුරුවා හැරියා. ඒ බව අද වන විට බොහෝ දෙනාට අමතක වෙලා. ඒ පළමු කෝප් වාර්තාව ඉල්ලා මා ශ්‍රෙෂ්ඨාධිකරණයෙහි නඩුවක් ද පැවරුවා. එහෙත් එයට ගෙන ආ මූලික විරෝධයක් බොහෝ කලකට පසු අධිකරණය පිළිගත්තා. මූලික විරෝධයකටත් තීන්දුව දීමට මාස ගණනාවක් ගත වෙන අවස්ථා තියෙන බව ඉන් පැහැදිලි වුණා. මෛත්‍රිපාල හා රනිල් මැතිවරණ දේශපාලනය යොදා ගෙන බැඳුම්කර මගඩියෙන් පළමුව ගොඩ ආවා.

Thursday, 16 November 2017

මෛත්‍රිපාල සමග එකතු වීම

මෛත්‍රිපාල සමග එකතු වීම

මෛත්‍රිපාලගේ ආප්ප රාත්‍රියට අවුරුදු තුනක් ගෙවිලා. පොළොන්නරුවේ ශ්‍රී ල නි ප සංවිධායක වීමේ සිට ජනාධිපති වීම දක්වා ඉතිහාසය එක්තරා විධියකින් ඉතිහාස ගතවන්නක්. ඒ යහපත් දේශපාලනය සම්බන්ධයෙන් නම් නො වෙයි. රනිල් නොකියා කියන්නේ ඉංගිරිසි නැතිව ජනාධිපතිකම කරන්න බැරි බව. ඒ රනිල්ගේ පඬි කතාවක්. ජනාධිපතිකමට මූලික සුදුසුකම ඉංගිරිසි දැන ගැනීම නොව රටට ඇති ඇල්ම. මේ නිවට ආණ්ඩුවේ කිසිවකුටවත් ඒ සුදුසුකම තියෙනවා ද?

Wednesday, 15 November 2017

කැට්ස්නර් මා සහ ජනමාධ්‍ය

කැට්ස්නර් මා සහ ජනමාධ්‍ය

මා ලියු යථාර්ථය නිර්වචනය කිරීම පිළිබඳ ලිපිය පළවීමෙන් පසු එයට ප්‍රතිචාර ලෙස නලින් සුභසිංහ, මාධ්‍ය මේරිලන්ඩ් විශ්වවිද්‍යාලයට සම්බන්ධ ව භෞතික විද්‍යාවේ පදනම අධ්‍යයනය කරන රූත් කැට්ස්නර් සමග පැවැත්වූ සාකච්ඡා දෙකක් ඉදිරිපත් කර තිබුණා. කැට්ස්නර් යථාර්ථවාදිනියක්. එහෙත් මා සමග පැවැත් වූ විද්‍යුත්  මාධ්‍ය සංවාදයෙන් පසු ඇය ඒ බව සෘජුව ම පිළිගන්නේ නැහැ. කැට්ස්නර් තම පත්‍රිකාවකින් කර ඇත්තේ කලින් සියැට්ල්හි වොෂිංටන් විශ්වවිද්‍යාලයෙහි ක්රේමර් විසින් ඉදිරිපත් කර තිබූ අදහසක් වර්ධනය කිරීමක්.

Tuesday, 14 November 2017

යථාර්ථය නිර්වචනය කිරීම - 2

යථාර්ථය නිර්වචනය කිරීම - 2

රූත් ඊ කැස්ට්නර් කියන්නේ මේරිලන්ඩ් විශ්වවිද්‍යාලයේ භෞතික විද්‍යාවේ පදනම ගැන අධ්‍යයන කරන කණ්ඩායමේ මහාචාර්යවරියක්. ඇය පසුගිය දා තවත් දෙදෙනකු සමග පළකළ පත්‍රිකාවක ක්වොන්ටම් භෞතිකයේ විසඳුම්වල දකින්නට ලැබෙන අධිස්ථාපන (සුපර්පසිෂන්) මූලධර්මයෙන් කියැවෙන විසඳුම් ද යථාර්ථ විභවයක් ලෙසට සැලකීමට යෝජනා කර තිබුණා. ක්වොන්ටම් විසඳුමක අවස්ථා දෛශික ගණනාවක් තිබෙන නමුත් අප නිරීක්‍ෂණය කරන්නේ එක් දෛශිකයකින් නිරූපණය කෙරෙන්න පමණයි. අනෙක් අවස්ථා වෙනත් අවශ්‍යතා යටතේ නිරීක්‍ෂණය වීමේ සම්භාවිතාවක් තියෙනවා. ඒවාත් යථාර්ථ විභව ලෙස ගැනීමටයි කැස්ට්නර් යෝජනා කර ඇත්තේ. මෙය අලුත් අදහසකට වඩා පැරණි අදහසක් වර්ධනය කිරීමක්. මේ අවස්ථා දෛශික ගැන මා ද කලකට පෙර පත්‍රිකාවක් පළ කර තිබුණා. කෙසේ වෙතත් යථාර්ථය ගැන මා මගේ අදහස් කිහිපයක් රූත් කැස්ට්නර්ට දැන්වූවා. මේ ඈ හා මා අතර ඇති වූ සංවාදය.

මෙහි ඈය කලින් පෙන්වා සිටියේ නිරීක්‍ෂකයාගෙන් තොර යථාර්ථයක් ඇති බව. ඇය යථාර්ථ විභව ගැනත් කීවා. ඉයන් ජෝන්ස් නමැත්තා යථාර්ථයක් ඇති බව හෝ නැති බව නොවෙයි ඇගේ ප්‍රශ්නය බව කියා ඇය බේරා ගැනීමට තැත් කළා. එහෙත් මා ඇගෙන් උපුටා ගැනීම් සහිතව පෙන්වා දුන්නේ ඇය නිරීක්‍ෂකයාගෙන් තොරව යථාර්ථයක් ඇති බව පෙන්වීමට උත්සාහ දරා ඇති බව. පසුව ඇය එයට නිසි පිළිතුරක් නොදී අපට එකඟ විය හැකි බවක් කීවා. එතැනින් එහාට මා තර්ක කරන්න ගියේ නැහැ. මා ඇයට ස්තුති කළා.

මෙරට පමණක් නොව පිටරට මහාචාර්යවරුන්ටත් ඇත්තේ උපකල්පන පමණයි. ඔවුන් හිතනවා නිරීක්‍ෂකයාගෙන් තොරව යථාර්ථයක් ඇති බව. එහෙත් එය කිසි දිනෙක පෙන්නන්න පුළුවන් එකක් නො වෙයි.  අප යථාර්ථය යැයි කියන්නේ අපේ හිතළුවකට. අපට ඇත්තේ යථාර්ථයක් නොව යථාර්ථ. ඒ ඊනියා යථාර්ථ නිරීක්‍ෂකයාගෙන් සවායත්ත නැහැ.

බටහිරත් ඉතා විශිෂ්ට ගණයේ චින්තකයන් ඇත්තේ ස්වල්පයයි. අනෙක් අය විශ්වවිද්‍යාලවල ඊනියා පර්යේෂණ ආයතනවල බොරු පත්‍රිකා පළ කරනවා. විශිෂ්ට ගණයේ අය අලුත් කතන්දර ගොතනවා. ලංකාවේ විශිෂ්ට ගණයේ කිසිවකු නැහැ.

Monday, 13 November 2017

අනුරාධ නගරය දැන් පෙනෙනා සේ

අනුරාධ නගරය දැන් පෙනෙනා සේ

මේ නිවට ආණ්ඩුව යටතේ කලකට ඉහත නිිදහස් දිනයක සංඛ අමර්ජිත්ට ගඩොල් බාගයක් මතක් කරමින් එක් ගායිකාවක් දන්නෝ බුදුන්ගේ ගීීය ගැයුවා. අර ඇතැම් පඬියන් කියන ආකාරයට ඇය ඒ ගීතයේ මුල් ඔපෙරා ශෛලියට සාධාරණයක් ඉටු කරන්න යන්න ඇති. එහෙත් සිංහලයන් ඒ කටහඬ ප්‍රතික්‍ෂෙප කරනවා.  ඊයේ (ඉරිදා) අනුරාධ නගරයට විශාල සෙනගක් රැස්වුණා. ඒ අර ඔපෙරාවට සවන් දෙන්න නො වෙයි. ඒ ඔපෙරාවේ සංස්කෘතික ආධිපත්‍යයට විරුද්ධවයි. ඒ ආධිපත්‍යයෙහි රනිල්ට විරුද්ධවයි. රනිල් පසුපස යන මෛත්‍රිපාලට විරුද්ධවයි. 

Sunday, 12 November 2017

මහින්ද තනිකිරීමක්

මහින්ද තනිකිරීමක්

ඔබේ ප්‍රතිචාරවලට පින්! ඔබ මගෙන් ඉල්ලා සිටින්නේ නැවත ලිපි පළ කිරීමටයි. එහෙත් ඔබ සියලු දෙනාම දෙසියකට අඩුයි. මෙරට ජනගහණය කෝටි දෙකක් පමණ. ඉන් හරි අඩක් පමණ යම් මට්ටමක උගතුන් කියා සිතමු. එවිට කෝටියක් පමණ උගතුන්ගෙන් මට ලිපි ලියන ලෙස කියන්නේ දෙසියයක් පමණයි.

Thursday, 9 November 2017

අන්තිම ලිපිය  


අන්තිම ලිපිය



මා ලියන්නේ පුරුද්දට වුවත් මා ඒ ලිපි පළ කරන්නේ ඇයි? ඒ මට අනෙක් අයට කීමට යමක් ඇතැයි සිතන නිසයි. එහෙත් ඒ කියන දේ ඒ අනෙක් අය වැරදි කියා නිගමනය කරන්නේ නම් මා ඒ ලිපි පළ කළ යුත්තේ ඇයි? අවුරුදු තිස්පහකට වැඩි කාලයක් මා ලියා පළ කර ඇති නමුත් තුන්හාර සියයක්වත් මා කියන දේ නිවැරදි කියා නොපිළිගන්නා බව පැහැදිලියි. 1994 දී මා කළුතර දිස්ත්‍රික්කයට තරඟ කළ අවස්ථාවේ දී මට මනාප පන්දහසකට වඩා ලැබුණෙ නැහැ. ඒ මුළු දිස්ත්‍රික්කයෙන් ම! මෙරට ජනයා මගේ දේශපාලන අදහස්වලට අකමැති බව, ඒ වැරදි යැයි සලකන බව මා එදා තේරුම් ගත යුතුව තිබුණා.

Wednesday, 8 November 2017

යථාර්ථය නිර්වචනය කිරීම  


යථාර්ථය නිර්වචනය කිරීම





රූත් ඊ කැස්ට්නර් කියන්නේ මේරිලන්ඩ් විශ්වවිද්‍යාලයේ භෞතික විද්‍යාවේ පදනම ගැන අධ්‍යයන කරන කණ්ඩායමේ මහාචාර්යවරියක්. ඇය පසුගිය දා තවත් දෙදෙනකු සමග පළකළ පත්‍රිකාවක ක්වොන්ටම් භෞතිකයේ විසඳුම්වල දකින්නට ලැබෙන අධිස්ථාපන (සුපර්පසිෂන්) මූලධර්මයෙන් කියැවෙන විසඳුම් ද යථාර්ථ විභවයක් ලෙසට සැලකීමට යෝජනා කර තිබුණා. ක්වොන්ටම් විසඳුමක අවස්ථා දෛශික ගණනාවක් තිබෙන නමුත් අප නිරීක්‍ෂණය කරන්නේ එක් දෛශිකයකින් නිරූපණය කෙරෙන්න පමණයි. අනෙක් අවස්ථා වෙනත් අවශ්‍යතා යටතේ නිරීක්‍ෂණය වීමේ සම්භාවිතාවක් තියෙනවා. ඒවාත් යථාර්ථ විභව ලෙස ගැනීමටයි කැස්ට්නර් යෝජනා කර ඇත්තේ. මෙය අලුත් අදහසකට වඩා පැරණි අදහසක් වර්ධනය කිරීමක්. මේ අවස්ථා දෛශික ගැන මා ද කලකට පෙර පත්‍රිකාවක් පළ කර තිබුණා. කෙසේ වෙතත් යථාර්ථය ගැන මා මගේ අදහස් කිහිපයක් රූත් කැස්ට්නර්ට දැන්වූවා. මේ ඈ හා මා අතර ඇති වූ සංවාදය. මගේ අවසාන ප්‍රතිචාරයට ඇය ප්‍රතිචාරයක් දැක්වූයේ නැහැ. සමහර විට මගේ අදහස්වල කිසිදු වටිනාකමක් නැතැයි ඈ සිතන්න ඇති. මා ඒ සංවාදය මුළුමනින් ම පළ කරන්නේ යථාර්ථය යනු කුමක් දැයි බටහිර දාර්ශනිකයන්ට හා භෞතික විද්‍යාඥයන්ට නිර්වචනය කිරීමට නොහැකි බව පෙන්වීමටත් යථාර්ථය යන්නෙන් අදහස් කරන්නේ කුමක් දැයි විස්තර කිරීමට ඔවුන් අපොහොසත් බව පෙන්වීමටත්. මේ සංවාදය හා ඉන් මතුවන කරුණු පිළිබඳ විවරණයක් පසුව බලාපොරොත්තු වන්න. එතෙක් මෙයට ප්‍රතිචාර දැක්වීමෙන් වළකින්නේ නම් මැනවි.  

Tuesday, 7 November 2017

තෙල වැඩි කාට ද?


තෙල වැඩි කාට ද?



මෙරට ජනමධ්‍යවල මෙතරම් දක්‍ෂ විචක්‍ෂණශීලී විචාරශීලි බුද්ධිමතුන් සිටිය දී මෙරට මෙතරම් ප්‍රශ්න තියෙන්නේ ඇයි ද කියන එකත් ප්‍රශ්නයක්. ජනමාධ්‍යවේදීන් කියාවි ඔවුන් ඉදිරිපත් කරන විසඳුම් ක්‍රියාත්මක කිරීමට කිසිවකු නැති බව. ඒකත් ඇත්ත. ඒත් ඒ අය ඉදිරිපත් කරන විසඳුම් ගැන කියන්න පුළුවන් මොනවා ද? මේ කාට හරි කියන්න පුළුවන් ද නිදහස් අධ්‍යාපනය කියන්නෙ මොකක් ද කියලා. ඒත් සයිටම් ගැන ඒ අය කතා කරන්නෙ උතුරු කොළඹ වෛද්‍ය විද්‍යාලය හා සයිටම් අතර වෙනසවත් දැනගෙන ද? මේ ගැන තව දුරටත් කතා කරන එකට මහින්දවාදීන් හා ව්‍යාජ සමාජවාදීන් කැමති නැහැ.

Monday, 6 November 2017

ශ්‍රි පාද අඩවිය මොන සුදු ඒජන්තයට ද?


ශ්‍රි පාද අඩවිය මොන සුදු ඒජන්තයට ද?



මේ ලිපි ලිවීමෙන් එතරම් වැඩක් නොවන බව දැන දැනත් ලිපි ලියන්නේ පුරුද්දට වෙන්න පුළුවන්. මේ ලිපි කියවන්නේ වැඩිපුර ම මහින්දවාදීන්. අද රටේ ජාතිකවාදීන් ඉන්නේ ඉතා ස්වල්පයයි. ජාතිකවාදීන් ලෙස පෙනී සිටින්නන් බොහෝ දෙනා දේශපාලන ඉලක්ක ඇති ව වැඩ කරන අය. ඔවුන්ගේ පසුබිම අවසානයේ දී ව්‍යාජ සමාජවාදය. විශේෂයෙන් ම  පැරණි ජ වි පෙරමුණේ ව්‍යාජ සමාජවාදය. මේ අය මහින්දගේ හොඳක් කියන විට මෛත්‍රිපාලගේ වැරුද්දක් කියන විට රනිල්ට දොස් කියන විට ගම්මන්පිලගේ හෝ විමල්ගේ හෝ ප්‍රකාශයක් අගය කරන විට සතුටු වනවා. සයිටම් ගැන මොවුන්ට ඇත්තේ නිදහස් අධ්‍යාපනය ඉවරයි වැනි අඳෝනාවක් පමණයි. එහෙත් නිදහස් අධ්‍යාපනය යනු කුමක් දැයි ඔවුන් දන්නේ නැහැ. ඔවුන්ගේ ස්ථාවරවල ඇති පරස්පර ඔවුන්ට පෙනෙන්නේ නැහැ. සයිටම් වෙනුවෙන් ජීවිත පරිත්‍යාගයෙන් වැඩ කළේ යැයි කියන එහෙත් තවමත් ජීවත්වන දොස්තරවරුන් ගැන ඔවුන් හිතන්නේ වීරත්වයෙන්. අද ඇරඹීමට නියමිත දෙමව්පිය මාරාන්තික උපවාසයෙන් අවසානයේ දී වාසි ලබන්නේ රනිල් හා දෙමළ ජාතිවාදීන්. ඔවුන් පිටුපස බටහිරයන් හා ඉන්දියාව ඉන්නවා. 

Sunday, 5 November 2017

බටහිර වෛද්‍ය හා දෙමළ වෙල්ලාල ඒකාධිකාර  

බටහිර වෛද්‍ය හා දෙමළ වෙල්ලාල ඒකාධිකාර

මාධ්‍ය වාර්තාවලට අනුව මෛත්‍රිපාල සිරිසේන පූජ්‍ය මැදගොඩ අභයතිස්ස හාමුදුරුවන්ට කියල තියෙනවා දේශපාලනඥයන් ඊනියා ජනවාර්ගික ප්‍රශ්නයක් තම පැවැත්ම සඳහා යොදා ගත්තත් එහි යම්කිසි දෙයක් ඇති බවත් දෙමළ ජනයාට යම් දෙයක් දිය යුතු බවත්. බොහෝ දේශපාලනඥයන් බොරු ප්‍රබුද්ධයන් වෙන්න ඕන වුණාමත් ඔය වගේ කතා කියනවා. සමහරු නොදන්න කමට කියනවා. තවත් සමහරු ඉන්දියාවෙ නැත්නම් බටහිර වුවමනාවට ඒ දේ කියනවා. සමහරු අප රැවටීමට කියනවා. මෛත්‍රිපාල  මේ මොකක් නිසා අර ප්‍රකාශය කළා ද දන්නෙ නැහැ. ඒකට කමක් නැහැ.

Saturday, 4 November 2017

මහින්දට සුබ අනාගතයක්  


මහින්දට සුබ අනාගතයක්





දැන් බොහෝ දෙනකු දන්නවා නව ව්‍යවස්ථාවක් සම්පාදනය කිරීමට මේ සිංහල විරෝධී දෙමළ ජාතිවාදී නිවට ආණ්ඩුවට ජනවරමක් නැති බව. ඇතැමුන් ඒ සම්බන්ධ විද්‍යුත් ලිපි මටත් යොමු කරනවා. අද වන විට නව ව්‍යවස්ථාව ප්‍රතික්‍ෂෙප කරමු යන්නත් නව ව්‍යවස්ථාවක් සම්පාදනය කිරීමට ආණ්ඩුවට ජනවරමක් නැති බවත් සමාජගත වී අවසන්. ව්‍යවස්ථාව පරාජය කරමු යන සටන්පාඨයේ සිට ව්‍යවස්ථාව ප්‍රතික්‍ෂෙප කරමු යන්නට සිංහල ජනමතය ඉතා ඉක්මණින් තල්ලු වුණා. ඒ සමග ආණ්ඩුව පියවරක් පස්සට ගෙන තිබෙනවා. එහෙත් ආණ්ඩුව වැඩි කල් යෑමට පෙර පියවර දෙකක් පෙරට තබාවි. ඔවුන්ට එංගලන්තය ප්‍රමුඛ බටහිරයන්ගෙන් හා ඉන්දියාවෙන් ලැබී ඇති විධානය එයයි. ඒ විධානය 2013ට බොහෝ කලකට පෙර ලැබුණු බව ඇතැම් ජාතිකවාදීන් දන්නේ නැහැ.

Friday, 3 November 2017

සුද්දන්ගේ දැනුම් සපත්තු ලෙව කෑම


සුද්දන්ගේ දැනුම් සපත්තු ලෙව කෑම



චන්ද්‍රිකාත් හාමුදුරුවරුන්ට චීවරධාරීන් යැයි කියනවා. තම දෙමව්පියන්ට වඩා ඇංග්ලිකන් ක්‍රිස්තියානි මහමුදලි සීයා ගැන ආඩම්බර වන ඇයගෙන් වෙනත් කියුමක් බලාපොරොත්තුවෙන් සිටි අයකු වේ නම් මේ වන විට තම වරද වටහා ගෙන ඇති. මේ සිංහල බෞද්ධ විරෝධී පැකේජ් නෝනාගෙන් වෙන මොනවා බලාපොරොත්තු වන්න ද? අද ඇයට අත්තනගල්ල ප්‍රාදේශීය සභා මන්ත්‍රී ධුරයකටවත් තේරී පත්වන්න බැහැ. ඇගේ පුතා තමා සිංහල බෞද්ධයකු වීම ගැන ලජ්ජා වන්නේ යැයි කී විට ඉන් මෑණියන් කවුදැයි නිරූපනය වන බව ඇයට වැටහීමක් නැහැ.

Thursday, 2 November 2017

සයිටම් හා බලය විමධ්‍යගත කිරීම




සයිටම් හා බලය විමධ්‍යගත කිරීම



සයිටම් ප්‍රශ්නය නිිදහස් අධ්‍යාපනය පිළිබඳ ප්‍රශ්නයක් නොවන බව මා එකල ම කිව්වා. නිදහස් අධ්‍යාපනය කියන්නෙ මොකක් ද කියලා මා කිව්වට බොහෝ දෙනා ඒ සත පහකටවත් ගණන් ගත්තෙ නැහැ. ඔවුන් හිතන් හිටියෙ ඊනියා නිදහස් අධ්‍යාපනයක් සඳහා ඔවුන් සටන් කරන බව. එහෙත් සයිටම්හි තිබුණෙ ප්‍රමිතිය පිළිබඳ ප්‍රශ්නයක්. ඒ ප්‍රශ්නය ඇතැම් රජයේ විශ්වවිද්‍යාලවල වෛද්‍ය පීඨවලත් තියෙනවා.

Wednesday, 1 November 2017

සර්ව පාක්‍ෂික කමිටු එපා  


සර්ව පාක්‍ෂික කමිටු එපා



මෛත්‍රිපාල සිරිසේන ජනාධිපති ලෙස කියා තිබුණ ව්‍යවස්ථාව ගැන සලකා බලන්න සර්ව පාක්‍ෂික කමිටුවක් පත් කරන්න ඕන කියලා. සර්ව පාක්‍ෂික සම්මේලන, කමිටු පත් කරන්නෙ වැඩක් නොකරන්න නම් ඒක තරමක හොඳ වැඩක්. එහෙත් ඒවට සහභාගි වන අය විවිධ අරමුණු ඇතිව එනවා. මාත් සර්ව පාක්‍ෂික නියෝජිත සම්මේලනය කියලා එකකට සහභාගි වෙලා තියෙනවා. මා නම් සහභාගි වුණෙ අපේ හමුදා ප්‍රභාකරන් පරාජය කරන තෙක්. බොහෝ දෙනා අද මොනව කිව්වත් එදා කිව්වෙ හමුදාවන්ට කොටි පරාද කරන්න බැහැ කියලා. ඒත් මා එකහෙළා ම කිව්වෙ අපට කොටි පරාද කරන්න පුළුවන් කියලා. ඒ අනුව මා ඒ නියෝජිත සම්මේලනයට සහභාගි වුණෙ කොටි පරාජය කරන්න හමුදාවට කල් අරන් දෙන්න පමණයි.

Tuesday, 31 October 2017

ඔක්තෝම්බර් 31 හා නොවැම්බර් 07


ඔක්තෝම්බර් 31 හා නොවැම්බර් 07



ඔක්තේම්බර් 31 හා නොවැම්බර් 07 මගේ දින දර්ශනයේ වැදගත් දවස්. ඒ මගේ මුණුබුරන්ගේ උපන් දින. මෙතරම් ප්‍රශ්න තියෙද්දී මගේ මුණුබුරන්ගේ උපන් දින දැන ගැනීමට ඇති වුවමනාව කුමක් දැයි කිසිවකු මගෙන් අසන්න පුළුවන්. මේ දින දෙක ලෝකයාටත් වැදගත්. හරියට ම මෙයට අවුරුදු පන්සියයකට පෙර 1517 මක්තෝම්බර් තිස්එක්වැනි දා මාටින් ලූතර් පාප්වහන්සේගේ ඇතැම් ක්‍රියාවලට විරුද්ධව පෝස්ටරයක් ඇලෙවුවා. ඒ පෝස්ටරයෙන් ප්‍රෙතෙස්තන්තවාදය උපන්නා. ප්‍රොතෙස්තන්ත කියන්නෙ ප්‍රොටෙස්ටන්ට් කියන වචනය සිංහලට යෙදී ඇති අන්දම. එහි විරෝධය යන අර්ථය තියනවා. මාටින් ලූතර් කතෝලික ආගමට හා පාප්වහන්සේට විරුද්ධ වුණා. ඔහු එක්තරා ආකාරයකට මූලධර්මවාදියකු ලෙසත් සලකන්න පුළුවන්. කෙසේ වෙතත් මාටින් ලූතර් නව ක්‍රිස්තියානි ප්‍රවණතාවකට මුල පිරුවා.

Monday, 30 October 2017

අද ඇරඹෙන විවාදය  


අද ඇරඹෙන විවාදය



ඊනියා ව්‍යවස්ථා මණ්ඩලය විසින් පත් කෙරුණු මෙහෙයුම් කමිටුවේ අතුරු වාර්තාව අද සිට දින තුනක් විවාද කිරීමට නියමිතයි. මේ විවාදය පැවැත්වෙන්නේ ඇමරිකානු ඔරුමත්තුනාඩු යුද්ධ නැව් කිහිපයක් කොළඹ වරායේ තිබෙන අතර. ඒ සිද්ධි දෙක සමගාමී වීම අහම්බයක් වන්නත් පුළුවන්, සැලසුම් කරන ලද්දක් වෙන්නත් පුළුවන්. රනිල් වික්‍රමසිංහ හිතන් හිටිය ද දන්නෙ නැහැ ඊනියා ව්‍යවස්ථා මණ්ඩලයේ ඡන්දයෙන් පමණක් නව ව්‍යවස්ථාව සම්මත කර ගැනීමට. එහි දී රටේ විරුද්ධත්වයක් ඇති වුණොත් විදේශවලින් යුද්ධාධාර ඉල්ලීමට. එය හිතළුවක් පමණක් වුවත් රනිල් වැඩ කරන ආකාරයට හා බටහිරයන්ගේ හා ඉන්දියාවේ අවශ්‍යතා අනුව නව ව්‍යවස්ථාවක් කෙසේ නමුත් සම්පාදනය කිරීම අද ප්‍රධාන කාර්යය වෙලා.

Sunday, 29 October 2017

දයාන්ලා නොදන්නා දේශපාලනය  


දයාන්ලා නොදන්නා දේශපාලනය



ඉංගිරිසියෙන් ලියන ඇතැමුන් දැන් නැවතත් හෙළිදරවු වෙමින් පවතිනවා. ඔවුන් ගැන එදත් අප නම් විශ්වාස කළේ නැහැ. ඇතැම් ජාතිකවාදීන් යැයි කියා ගන්නා අය මේ අදහස් සිංහලෙන් ලියනවා. තම දේශපාලන අභිමතාර්ථ මුදුන්පත් කර ගැනීමට ජාතිකත්වය යොදා ගන්නා අය ජාතිකවාදීන් නො වෙයි. චම්පක ජාතිකවාදියකු යැයි කියන අය අදත් ඉන්නවා ද? ඔහු කරණමක් ගසා නැවතත් සිංහල බෞද්ධයන් රවටන්න පුළුවන්. එහෙත් මේ රැවටීම වැඩි කලක් කරගෙන යන්න බැහැ.

Saturday, 28 October 2017

සුරංගනා කතා  


සුරංගනා කතා



මේ රටේ තරම් විිද්‍යාඥයන් ලෝකයේ වෙනත් රටක ඉන්නව කියල හිතන්න බැහැ. දේශපාලන විද්‍යාඥයන්, ආර්ථික විද්‍යාඥයන්, සමාජ විද්‍යාඥයන්, විවිධ ප්‍රවාද අනුගමනය කරන සාහිත්‍යධරයන්, භෞතික විද්‍යාඥයන්, රසායන විද්‍යාඥයන්, ජීව විද්‍යාඥයන්, වෛද්‍ය විද්‍යාඥයන්, ඉංජිනේරු විද්‍යාඥයන්, පශූ වෛද්‍ය විද්‍යාඥයන් ආදී වශයෙන් විද්‍යාඥයන් මෙරට දැක ගන්න පුළුවන්. ඔවුන් කිසිම ප්‍රවාදයක් සංකල්පයක් තම ක්‍ෂෙත්‍රවලට එකතු කර නැති නමුත් ඔවුන් පෙනී සිටින්නේ විද්‍යාඥයන් ලෙස. තමන් කතා කරන්නේ අහවල් විද්‍යාඥයකු ලෙස නැත්නම් අහවල් ක්‍ෂෙත්‍රයෙහි ප්‍රාමාණික විද්‍යාඥයකු ලෙස වශයෙන් කියනු අප අසා තියෙනවා. නීතිඥයන් සාමාන්‍යයෙන් විද්‍යාඥයන් ලෙස නොසැලකෙන නමුත් නීතියේ ප්‍රාමාණික විද්වතුන් ලෙස පෙනී සිටින්නන් ඉන්නවා.

Friday, 27 October 2017

ගල්ලෙන බිඳීම හා ව්‍යවස්ථා මණ්ඩලය බිඳීම  


ගල්ලෙන බිඳීම හා ව්‍යවස්ථා මණ්ඩලය බිඳීම

 

ඇතැම් ජාතිකවාදීන් යැයි කියා ගන්නා අය උපදෙස් ගන්නේ ජාත්‍යන්තරවාදීන්ගෙන් බව පැහැදිලියි. අද අප ඕනෑම අවස්ථාවකට මුහුණ දීමට සූදානම් ව සිටිය යුතුයි. රනිල්ගේ ප්‍රජාතන්ත්‍රවාතය යටතේ කුමක් සිදුවේ ද යන්න කල් තබා මුළුමනින් ම  කීම තරමක් අපහසුයි. එහෙත් එය යම් තරමකට පුරෝකථනය කරන්න පුළුවන්. අප අතර සිටින ජාතිකවාදීන් යැයි කියා ගන්නවුන්ගෙන් අප පරෙස්සම් විය යුතුයි. නිතර දෙවේලේ රූපවාහිනියෙන් වාචාල කතා කී පමණින් කිසිවකු ජාතිකවාදියකුවත් බුද්ධිමතකුවත් වන්නේ නැහැ.

Thursday, 26 October 2017

භයානක ව්‍යවස්ථා සංශෝධනයක්


භයානක ව්‍යවස්ථා සංශෝධනයක්



ඔක්තෝම්බර් 30, 31 හා නොවැම්බර් 01 ඊනියා මෙහෙයුම් කමිටු අතුරු වාර්තාව පිළිබඳ සාකච්ඡාවක් පැවැත්වෙනවා. එය පැවැත්නේනේ පාර්ලිමේන්තුවේ ද නැත්නම් ඊනියා ව්‍යවස්ථා මණ්ඩලයේ ද යන්න පැහැදිලි නැහැ. නව ව්‍යවස්ථාවක් සම්පාදනය කිරීම සඳහා ව්‍යවස්ථා මණ්ඩලයක් පත් කිරීමට ආණ්ඩුවටවත්  ඒ මණ්ඩලයේ වැඩ කටයුතුවලට සහභාගි වීමට ඒකාබද්ධ විපක්‍ෂයටවත් ජනවරමක් නැහැ. ජනතා පරමාධිපත්‍යයෙන් තීරණය වී ඇත්තේ නව ව්‍යවස්ථාවක් සම්පාදනය අනවශ්‍ය බවයි. එහෙත් ආණ්ඩක්‍රම ව්‍යවස්ථාවේ ඇති ජනතා පරමාධිපත්‍යය ආණ්ඩුවවත් ඒකාබද්ධ විපක්‍ෂයවත් රකින්නේ නැහැ. ඒ කියන්නේ ඒ දෙගොල්ලන් ම ආණ්ඩුක්‍රම ව්‍යවස්ථාවට පටහැණිව ක්‍රියා කරන බව. ආණ්ඩුක්‍රම ව්‍යවස්ථාව රැකීම තම රාජකාරියක් වුවත්, එනම් ආණ්ඩුක්‍රම ව්‍යවස්ථාව මගින් ඒ රාජකාරිය නියම කෙරී තිබුණත්, මෛත්‍රිපාල ජනාධිපති ලෙස ඒ කාර්යය ඉටු කරන්නේ නැහැ. ඒ කියන්නේ ජනාධිපතිත් ආණ්ඩුක්‍රම ව්‍යවස්ථාව රකින්නේ නැහැ.

Wednesday, 25 October 2017

නව ව්‍යවස්ථාව ප්‍රතික්‍ෂප කරමු




නව ව්‍යවස්ථාව ප්‍රතික්‍ෂප කරමු



අද රටේ මහත් උනන්දුවක් ඇති වී තිබෙන්නේ ආණ්ඩුක්‍රම ව්‍යවස්ථාවක් සම්පාදනය කිරීම ගැනයි. විය යුතු පරිදි ම අනෙක් ප්‍රශ්න යටපත් කරගෙන ව්‍යවස්ථා සම්පාදනය කිරීම පෙරට ඇවිත්. මහා සංඝ රත්නය තමන්වහන්සේගේ නිකාය, පාර්ශ්වය ආදියෙහි කාරක සභා යොදා ගනිමින් නව ව්‍යවස්ථාව ප්‍රතික්‍ෂෙප කරනවා. උන්වහන්සේ පොදුවේ ගතහොත් ප්‍රකාශ කරන්නේ නව ව්‍යව්ථාවක් සම්පාදනය කිරීමට ආණ්ඩුවට ජනවරමක් නැති බවත් මේ ආණ්ඩුක්‍රම ව්‍යවස්ථාවක් සම්පාදනය කිරීමට අවස්ථාවක් නොවන බවත්. උන්වහන්සේ පොදුවේ නැතත් මැතිවරණ නීතිය සංශෝධනය කිරීමට එකඟ වන බව  ප්‍රකාශ කර සිටිනවා.

Tuesday, 24 October 2017

මහින්දට වචනයක්  


මහින්දට වචනයක්



දින සියයේ ආණ්ඩුව පිහිටුවා දැන් වසර තුනකට ආසන්නයි. නීත්‍යානුකුල නොවන ඊනියා එ ජා පෙරමුණු – ශ්‍රී ල නි ප ජාතික ආණ්ඩුව පිහිටුවා වසර දෙකකට වැඩියි. පාර්ලිමේන්තුවේ නියෝජනය නොවන ශ්‍රී ල නි පක්‍ෂය සමග ඊනියා ජාතික ආණ්ඩුවක් පිහිටුවා ගන්න බැහැ. එහෙත් කරු ජයසූරිය කතානායක ව ඉන්න තාක් රනිල්ගේ ප්‍රජාතන්ත්‍රවාතය යටතේ පාර්ලිමේන්තුවේ නීති විරෝධී සම්ප්‍රදාය විරෝධී ක්‍රියා වෙන්න පුළුවන්. වෙනත් කිසිවකු ඊනියා ජාතික ආණ්ඩුව නීත්‍යානුකුල නොවීම ගැන කතා නොකරන්නේ මගේ තර්කය වැරදි නිසා ද? ශ්‍රී ල නි ප පිළිගන්නා කතානායක ම එ පෙ, ජා නි පෙ ආදී පක්‍ෂ පිළිගන්නේ නැහැ. ඒකාබද්ධ විපක්‍ෂය ඊනියා ජාතික ආණ්ඩුව ප්‍රශ්න නොකරන්නේ යම් දිනයක කරු ජයසූරිය විපක්‍ෂයේ පක්‍ෂ පිළිගනීවි යන බලාපොරොත්තුවෙන් ද?

Monday, 23 October 2017

රනිල්ගේ නැති ව්‍යවස්ථාව


රනිල්ගේ නැති ව්‍යවස්ථාව



රනිල් හැම තැනම කියන කතාවක් නම් නව ව්‍යවස්ථාවක් නැති බවයි. ඔහු අහන්නේ නැති ව්‍යවස්ථාවක් ගැන භික්‍ෂූන් වහන්සේ, ජනමාධ්‍ය, ඒකාබද්ධ විපක්‍ෂය, සහ වෙනත් අය කලබල වී ඇත්තේ ඇයි ද යන්නයි. ඒ අතර මෛත්‍රිපාල කියනවා බලය විමධ්‍යගත කිරීමට විරුද්ධ අය එයට විකල්පයක් ඉදිරිපත් කරන්නේ නැති බව. දැන් මේ බලය විමධ්‍යගත කිරීම ගැන මෛත්‍රිපාල කියන්නේ දහතුන්වැනි ව්‍යවස්ථා සංශෝධනය ගැන වෙන්න බැහැ. ඒකෙනුත් බලය බෙදිලා. ඔහු මේ කියන්නේ නව ව්‍යවස්ථාවක් ගැන බව පැහැදිලියි. මෛත්‍රිපාලට පුළුවන් වෙයි ද රනිල්ට කියන්න නව ව්‍යවස්ථාවක්  තියෙනවයි කියලා.

Sunday, 22 October 2017

අනේ මෛත්‍රිපාල අනේ රනිල්  


අනේ මෛත්‍රිපාල අනේ රනිල්



බටහිරයන්ගෙන්, පෘතුගීසීන්ගෙන්, තුවක්කු සෑදීමට උගත් සිංහලයන් පෘතුගීසීන්ටත් වඩා හොඳ තුවක්කු නිපදවූවා. එය හොඳ දෙයක්. බටහිර දැනුම් ආධිපත්‍යයට යට නොවීම යනු බටහිර දැනුම ප්‍රතික්‍ෂෙප කිරීමක් නොවන බව මෙරට කසිකබල් උගතුන්ට තේරෙන්නේ නැහැ. අපේ රටේ ප්‍රශ්නයත් එයමයි. ඊනියා උගතුන්ට බොහෝ දේ නොතේරීම, විශේෂයෙන් ම බටහිර සංකල්ප හා ප්‍රවාද නොතේරීම. එහෙත් ඔවුන් පෙන්නන්නේ ඔවුන්ට ඒ තේරෙන බවයි.

Saturday, 21 October 2017

විග්නේස්වරන් නොකී කතාව – 3  


විග්නේස්වරන් නොකී කතාව – 3



විග්නේස්වරන් යනු අමු ම අමු දෙමළ ජාතිවාදියෙක්. ඔහු පිටුපස ඉන්නේ බටහිර රටවල විසුරුණු දෙමළ ජනයා. ඔවුන් පිටුපස ඇත්තේ එංගලන්තය ප්‍රධාන බටහිර රාජ්‍ය. බටහිරයන් නොහිටින්න විග්නේස්වරන් කෙනකු නැහැ. මෙරට වෙල්ලාලයන්ට ඇති ප්‍රශ්නය ඔවුන් ඉංගිරිසින් යටතේ භූක්ති විඳි වරප්‍රසාද මහජන ඡන්දය ලබා දීමෙන් පසු ක්‍රම ක්‍රමයෙන් නැති වී යැමයි. 1912 පමණ වන තෙක් මෙරට ලාංකිකයන් යැයි කියන්නන් අතර ප්‍රධානත්වය දැරුවේ ඉංගිරිසි කතාකරන වෙල්ලාලයන්. ඉනුත් පොන්නම්බලම් කුමාරස්වාමි පවුල. එකල ඉංගිරිසි කතාකරන සිංහල ජනයාත් මේ පවුලේ නායකත්වය පිළිගත්තා. එකල ඉංගිරිසි කතාකරන වෙල්ලාලයන්ගේ සංඛ්‍යාව ඉංගිරිසි කතාකරන සිංහලයන්ට වඩා වැඩියි.

Friday, 20 October 2017

විග්නේස්වරන් නොකී කතාව - 2


විග්නේස්වරන් නොකී කතාව - 2



මල්වතු අස්ගිරි ප්‍රකාශයට රනිල් බයවෙලා. ඒ නිසා ම ඇංග්ලිකන් ක්‍රිස්තියානි සංස්කෘතියේ  ඔහු සංඝ භේදය ඇති කිරීමට උත්සාහ කරනවා. ඇංග්ලිකන් ක්‍රිස්තියානි සංස්කෘතියේ රනිල්ට මල්වතු මහානායක හිමියන් නිකම් ම නිකම් මල්වතු මහානායක. රනිල් අහනවා අදාළ උභය පාර්ශ්වීය කාරක සභා රැස්වීමට මල්වතු මා නාහිමියන් සහභාගි වුණා ද කියා. රනිල් පිටරට ගිය විට ඔහු නැතිව අමාත්‍ය මණ්ඩලය රැස්වෙන අවස්ථා තිබෙනවා. ඒ රැස්වීම් ගැනත් රනිල් ප්‍රශ්න කරනවා ද?  ලබන සතියේ ජනාධිපතිගේ සයිටම් ප්‍රකාශයත් සමග නැවතත් ව්‍යවස්ථාව අපට පෙනෙන්නට යට යවාවි. එහෙත් එය සම්මත කර ගැනීමට යටින් ක්‍රියා කරාවි. සයිටම් යොදා ගනිමින් මර්දනයක් දියත් වීමට ඉඩ තියෙනවා. ව්‍යවස්ථාව සම්මත කිරීමට කටයුතු කෙරෙන්නේ මර්දනය මගින්. රාමඤ්ඤ අමපුර නිකායේ ව්‍යවස්ථා විරෝධී ප්‍රකාශ ඉක්මන් වන්නේ නම් හොඳයි. එහෙත් අපට විග්නේස්වරන් අමතක කරන්න බැහැ.

Thursday, 19 October 2017

මල්වතු අස්ගිරි තීරණය  

මල්වතු අස්ගිරි තීරණය  (සංශෝධිත ලිපිය)

මල්වතු අස්ගිරි උභය පාර්ශ්වීය කාරක සභාව දහඅටවැනි දා තීරණය කරලා නව ආණ්ඩුක්‍රම ව්‍යවස්ථාවක් සම්පාදනය කිරීම හෝ තිබෙන ආණ්ඩුක්‍රම ව්‍යවස්ථාව සංශෝධනය කිරීම හෝ මේ අවස්ථාවේ දී අවශ්‍ය නොවන බව. කොහොමටත් ඒ සඳහා ආණ්ඩුවට ජනවරමක් නෑහැ.  එමෙන් ම කාරක සභාවේ තීරණය අනුව ව්‍යවස්ථා සම්පාදන ක්‍රියාවලිය වහාම නතර කළ යුතුයි. මේ තීරණ ගැනීම පිළිබඳ ව  මල්වතු අස්ගිරි උභය පාර්ශ්වීය කාරක සභාවේ මහානායක අනුනායක ලේඛකාධිකාරි හාමුදුරුවරුන් ඇතුළු සියලු මහා සංඝ රත්නයට  අපේ නමස්කාරය හිමි වෙනවා. උන්වහන්සේලා මේ තීරණය ගෙන ඇත්තේ සිංහල බෞද්ධ සම්ප්‍රදාය හා සංස්කෘතිය අනුව ජාතියේ මුරදේවතාවුන් වහන්සේ ලෙස බව පැහැදිලියි.

Wednesday, 18 October 2017

විග්නේස්වරන් නොකී කතාව -1


විග්නේස්වරන් නොකී කතාව -1





විග්නේස්වරන්ගේ කතාවලට සිංහල දේශපාලනඥයන්වත් මාධ්‍යවේදීන්වත් පිළිතුරු දෙන්නේ නැහැ. විග්නේස්වරන් මහා බුද්ධිමතෙක් නො වෙයි. සයිටම් ගැන පඬි කතා කියමින් අවසානයේ දී ආණ්ඩුවට සිංහලයන් මර්දනය කිරීමට උදව් උපකාර කරන මාධ්‍ය ලොක්කන්ට හා ඔවුන්ගේ මාධ්‍ය සේවක නිවේදකයන්ටත් විග්නේස්වරන් කියන දේ වාර්තා කිරීම  හැර වෙන කියන්න දෙයක් නැහැ. සමහරවිට ඔවුන් සිතනවා ද දන්නේ නැහැ විග්නේස්වරන්ට පිළිතුරු දීම කාලය කා දැමීමක් කියා.

Tuesday, 17 October 2017

මහින්දගේ ව්‍යවස්ථා නිවේදනය  


මහින්දගේ ව්‍යවස්ථා නිවේදනය



මහින්ද රාජපක්‍ෂ ඊයේ නව ව්‍යවස්ථාව සම්බන්ධයෙන් නිවේදනයක් නිකුත් කරලා. එයින් කියැවෙන්නේ නව ව්‍යවස්ථාවක් සම්පාදනය කිරීමට මේ ආණ්ඩුවට ජනවරමක් නැති බවයි. නව ව්‍යවස්ථාවක් සම්පාදනය කිරීමට තබා ව්‍යවස්ථාව සංශෝධනය කිරීමටවත් මේ ආණ්ඩුවට ජනවරමක් නැහැ. එ ජා පෙරමුණට ලැබුණේ මන්ත්‍රීධුර 106ක් පමණයි. ජනතාව සියළු ආකාරයේ ව්‍යවස්ථා සංශෝධන ප්‍රතික්‍ෂෙප කර තිබෙනවා. ජනාධිපතිවරණයේ දී නම් මෛත්‍රිපාලට ජනමත විචාරණයකට තුඩු නොදෙන ව්‍යවස්ථා සංශෝධනවලට ජනවරමක් තිබෙනවා. එහෙත් මෛත්‍රිපාල ඒ ජනවරම ක්‍රියාත්මක කරන්නේ කෙසේ ද?

Monday, 16 October 2017

සිංහල දෙමළ සම්භව  


සිංහල දෙමළ සම්භව



උතුරු පළාතේ ආණ්ඩුකාරතුමා ඉංගිරිසි ගුරුවරයෙක්. එතුමා කතෝලික පවුලක උපත ලද අයෙකු නමුත් මහජන නියෝජිතයකු වුණේ සිංහල බෞද්ධයන් වැඩියෙන් වාසය කරන පාණදුරෙන්. එතුමා කලක් දැන් පැවිදි වී සිටින ජී අයි ඩී ධර්මසේකරගේ අනුගාමිකයෙක් වුණා. සමහර විට එතුමා එකල ජාතිකවාදියෙක් වෙන්න ඇති. එහෙත් පසුව එතුමා චන්ද්‍රිකාගේ අනුගාමිකයෙක් වුණා. ඒ අනුහසින් දෝ අද එතුමා උතුරු පළාතේ ආණ්ඩුකාරතුමා. එතුමා ධර්මසේකර සමග සිටියා නම් කවුරුන් වීමට තිබුණා ද?

Sunday, 15 October 2017

පුහු ජාත්‍යන්තරවාදී පඬියෝ  

පුහු ජාත්‍යන්තරවාදී පඬියෝ


ඊනියා ජාත්‍යන්තරවාදී පඬියන් අපට කියන එක් කරුණක් නම් ජාත්‍යන්තර මැදිහත්වීම් නැවැත්වීමට  අප බලය විමධ්‍යගත කළ යුතු බව. දයාන් ජයතිලක වැනි තමන් දේශපාලන විද්‍යාඥයන් ලෙස හඳුන්වා ගන්නවුන් (මෙරට දේශපාලන විද්‍යාඥයන් තබා කිසිම විද්‍යාඥයකු නැහැ) ඊනියා මධ්‍යස්ථභාවය ප්‍රදර්ශනය කරමින් තමන් සිංහල ජාතිකවාදීන්ට ඉහළින් සිටින ස්මාර්ට් දේශප්‍රේමීන් ලෙස පවසන්නේ ජාත්‍යන්තරය සෑහීමකට පත් කිරීමට අප බලය විමධ්‍යගත කළ යුතු බවයි. තමන් බටහිරින් ඉගෙන ගන්නා සංකල්ප හා ප්‍රවාද යොදා ගනිමින් වචන හරඹයකින් ඊනියා ජාත්‍යන්තරවාදීන් භූදේශපාලන යථාර්ථය වැනි ව්‍යාජ ගැන කියවනවා. මෙහි දී පැන නගින ප්‍රශ්නයක් නම් ඊනියා ජාත්‍යන්තරය අපක්‍ෂපාතීත්වය යන්නෙන් අදහස් කරන්නේ කුමක් ද යන්නයි. බලය විමධ්‍යගත කළ යුත්තේ කුමක් සඳහා ද? ඊනියා අසාධාරණයක් විසඳීමට ද, අභිලාෂ මුදුන්පත් කරවීමට ද, නැති දෙමළ සාමූහිකත්වයක් තහවුරු කිරීමට ද?

Saturday, 14 October 2017

මහින්ද එන පොට හොඳ නැහැ


මහින්ද එන පොට හොඳ නැහැ



බටහිර ඊනියා ස්වාභාවික විද්‍යාවන්හි දීට වඩා දේශපාලනයේ දී පුරෝකථන කිරීම අමාරුයි. එයට හේතු ලෙස (හේතුව යන්නත් හිතළුවක් වුවත්) කරුණු ඉදිරිපත් කිරීමට මේ අවස්ථාව නො වෙයි. එහෙත් මේ ආණ්ඩුව බලයට පත්කෙරුවේ බටහිරයන් හා ඉන්දියානුවන් බවත් ඔවුන් එහි දී බලාපොරොත්තු වූයේ සිංහල විරෝධී ව්‍යවස්ථාවක් සම්මත කර ගැනීමත් රණවිරුවන් දඩයම් කිරීම බවත් අප කිහිප වතාවක් ම සඳහන් කර ඇති. එය කියවූ එක් පඬියකු මා වැරදි බව කීමට හොඳ ප්‍රශ්නයක් අසා තිබුණා. පඬියා අසා තිබුණේ මේ ආණ්ඩුව පත් කිරීමට ඡන්දය දුන්නේ බටහිරයන් හා ඉන්දියානුවන් ද කියා! තවත් පඬියකු කියා තිබුණේ නව ව්‍යවස්ථාව නොදැක එය ප්‍රතික්‍ෂෙප කිරීමට නොහැකි බවයි. ව්‍යවස්ථාව තවමත් සම්පාදනය කර නැත්නම් කිරිඇල්ල නම් බුද්ධිමත් නීතිඥ ඇමතිවරයා ඉන් ඒකීය බවට හෝ බුදුදහමට හෝ තර්ජනයක් නොවන්නේ යැයි කියන්නේ කෙසේ දැයි ඒ ඇමතිගෙන් ප්‍රශ්න කරනවා නම් හොඳයි.

Friday, 13 October 2017

අස්ගිරිය, ව්‍යවස්ථාව හා ජනාධිපතිගේ වගකීම  


අස්ගිරිය, ව්‍යවස්ථාව හා ජනාධිපතිගේ වගකීම





නව ව්‍යවස්ථාව ප්‍රතික්‍ෂෙප කිරීම සිංහලයන්ගේ පමණක් නොව දේශප්‍රේමී මුස්ලිම් හා දෙමළ ජනයාගේ ද යුතුකම හා වගකීම විය යුතු ය. නව ව්‍යවස්ථාවේ ඊනියා අහිතකර වගන්ති සංශෝධනය කිරීම අපේ කාර්යය නොවිය යුතු ය. එසේ කළහොත් එක පැත්තකින් රනිල් පළාත් ආයතන පිළිබඳ පනතේ කළාක් මෙන් සංශෝධන මගින් තමන්ට වුවමනා වෙනත් ව්‍යවස්ථාවක් ගෙන ඒමට කටයුතු කරනු ඇත. එහෙත් එයටත් වඩා වැදගත් කරුණ වනුයේ මේ ආණ්ඩුවට නව ව්‍යවස්ථාවක් සම්පාදනය කිරීමට ජනවරමක් නැති වීම ය. 2015 අගෝස්තු මැතිවරණයේ දී නව ව්‍යවස්ථාවක් සම්පාදනය කිරීමට ඡන්දය ඉල්ලූ එ ජා පෙරමුණට මන්ත්‍රි ධුර 106ක් පමණක් ලැබිණි. ඒ මන්ත්‍රී ධුර 225කිනි. එමෙන් ම එ ජා පෙරමුණට මුළු ඡන්දවලින් 50%ක් නො ලැබීණි. එයින් කියැවෙන්නේ ජනතාව මැතිවරණයේ දී නව ව්‍යවස්ථාවක අවශ්‍යතාව ප්‍රතික්‍ෂෙප කර ඇති බව ය.

Thursday, 12 October 2017

සිංහල බෞද්ධ විරෝධී පඬියෝ


සිංහල බෞද්ධ විරෝධී පඬියෝ



සිංහලයන් අතර සිටින ඇතැම් පඬියන් සිංහල බෞද්ධ විරෝධීන් වීමටත් දෙමළ උගතුන් දෙමළ විරෝධී නොවීමටත් හේතුව කුමක් ද? පඬියන් කියනු ඇත්තේ දෙමළ ජනයාට වී ඇති අසාධාරණය නිසා දෙමළ උගතුන්ට දෙමළ විරෝධී වීමට හේතුවක් නැති නමුත් ඊනියා මානව හිතවාදී සිංහල පඬියන් දෙමළ ජනයාට වී ඇති අසාධාරණය හමුවේ හදවත උණු වී දෙමළ ජනයාට සාධාරණයක් කිරීමට යන විට සිංහල අන්තවාදීන්/ජාතිවාදීන්  තමන් සිංහල විරෝධීන් යැයි හඳුන්වන බව ය. එහෙත් මේ කියන පඬියන් එක්කෝ මාක්ස්වාදීන් නැත්නම් හිටපු මාක්ස්වාදීන්, අබෞද්ධයන්, ඊනියා උගතුන්  ආදීන් වීමට ඇති ඉඩකඩ ඉතා අධිකයි.  මේ උගතුන් ඉංගිරිසි මාධ්‍යයෙන් ඉගෙන ගත්තත් සිංහල මාධ්‍යයෙන් ඉගෙන ගත්තත් බෞද්ධ යැයි කියන පාසල්වල ඉගෙන ගත්තත් වෙනත් පාසල්වල ඉගෙන ගත්තත් වෙනසක් නැහැ. ඔවුන්ට ලැබෙන්නේ බටහිර ඉංගිරිසි යුදෙව් ක්‍රිස්තියානි සම්ප්‍රදායේ දැනුමක්.

Wednesday, 11 October 2017

ව්‍යවස්ථාව ප්‍රතික්‍ෂෙප කරමු

ව්‍යවස්ථාව ප්‍රතික්‍ෂෙප කරමු මේ සබැඳියෙන් ලබාගන්න


පුස්සක් වී ඇති මානව අයිතිවාසිකම්




පුස්සක් වී ඇති මානව අයිතිවාසිකම්





පෞද්ගලිකත්වය පිළිබඳ අදහස යුරෝපයේ ඉදිරියට පැමිණියේ පහළොස්වැනි සියවස අග. ඒ බටහිර චින්තන විප්ලවයත් සමග. එතෙක් බටහිර තිබුණේ කතෝලික චින්තනය. එය සාමූහිකත්වය මත පදනම් වූවක්. ඒ චින්තනයට විරුද්ධව පෞද්ගලිකත්වය ඉස්මතු කරන චින්තනයක් බටහිර, මුල දී ඉතාලියේ, බිහි වූවා. මුලින්ම එය පිරෙන්ට්සි හෙවත් ඉංගිරිසින් කියන ආකාරයට ෆ්ලොරන්ස් නගරයෙහි ආරම්භ වුණා. ඒ චිත්‍ර ශිල්පයෙහි හා එයටත් වඩා ප්‍රතිමාකරණයෙහි. මේ චින්තනයෙහි ආරම්භයේ බිහි වූවක් ලෙස මා දකින්නේ පිරෙන්ට්සි නගරයෙහි අවුරුදු පන්සියකට පෙර නිර්මාණය කළ ඩේවිඩ් ප්‍රතිමාවයි.

Tuesday, 10 October 2017

ඒකීය කතාව


ඒකීය කතාව



මෙරට අදත් ඒකීය රාජ්‍යයක් නො වෙයි. ඒකීය රාජ්‍යයක් යනු කුමක් දැයි අප නිර්වචනය කර තිබෙනවා. එහෙත් මෙරට විද්වත් නීතිඥයන්වත්, දේශපාලන විද්‍යාඥයන්වත්, දේශපාලන විචාරකයන්වත්, දේශ හිතෛශීන්වත්, දේශ ප්‍රේමීන්වත්, ජාතිකවාදීන්වත් එය සත පහකට ගණන් ගන්නේ නැහැ. ඒකීය රාජ්‍ය යුරෝපයේ ඇති වුණේ ජාතික රාජ්‍ය ඇතිවීමෙන් පසුවයි. ජාතික රාජ්‍ය යනු නෛතික රාජ්‍ය මිස නිසග ජාතිකත්වයක් ඇති රාජ්‍ය නො වෙයි.  එහි ජාතිකත්වය ඇතිවන්නේ නීතියෙන්. එවැනි රටක රටවැසි භාවය යම් ආකාරයකින් ලබාගත් අයකු අදාළ රටෙහි ජාතිකයෙක්. බටහිර ජාතික රාජ්‍ය ඇති වුණේ ඉතා මැතක. ඇතැමුන් කියන විධියට ඊනියා ධනපති විප්ලවයෙන් පසුව. කෙසේ නමුත් දහහත්වැනි සියවසට පෙර බටහිර ජාතික රාජ්‍යවත් ඒකීය රාජ්‍යවත් තිබුණේ නැහැ.

Monday, 9 October 2017

දෙමළ අනන්‍යතාව හා ඒකීය බව වැඩි කිරීම


දෙමළ අනන්‍යතාව හා ඒකීය බව වැඩි කිරීම





නව ව්‍යවස්ථාවෙන් ඒකීය බව ආරක්‍ෂා වන බව හරි ඒකීය බවට තර්ජනයක් නොවන බව හරි ව්‍යවස්ථාවේ වචන ගැන  නොව හරය ගැන කල්පනා කළ යුතු බව හරි දහතුන්වැනි ව්‍යවස්ථා සංශෝධනයෙන් දශමයක්වත් එහාට නොයන බව හරි කියන අය 1987 සිට 2009 දක්වා හිටියේ කොහේ ද කෙළේ කුමක් ද ආදිය සොයා බැලීමේ දී වැදගත් දෙයක් පැහැදිලි වෙනවා. එදා ඒ අය එදා දහතුනට පක්‍ෂ වූ බවත් බලය බෙදීමට පක්‍ෂ වූ බවත් යම් ආකාරයක සන්ධීය රාජ්‍යයකට පක්‍ෂපාත වූ බවත්. ඒකාබද්ධ විපක්‍ෂයේ නායකයන් රාශියක් ම මේ ගණයට අයත් වෙනවා.

Sunday, 8 October 2017

ඊනියා දෙමළ අනන්‍යතාව


ඊනියා දෙමළ අනන්‍යතාව



අප මෙරට සන්ධීය රාජ්‍යයකට විරුද්ධයි. එසේ විරුද්ධ වන්නේ දෙමළ ජාතිවාදීන් ඉල්ලන සන්ධීය රාජ්‍යය යුක්ති යුක්ත කරන්න බැරි නිසාත් එය සිංහල විරෝධී නිසාත්. ඇතැම් පඬියන් කියන්නේ සන්ධීය රාජ්‍යයකට විරුද්ධ වීම ප්‍රමාණවත් නැහැ, ඒකීය රාජ්‍යය සන්ධීය රාජ්‍යයකට වඩා සුදුසු බව පෙන්විය යුතුය කියා. මෙය සම්පූර්ණයෙන් ම වැරදි කතාවක්. සන්ධීය රාජ්‍යයක් ඉල්ලන අයයි පෙන්නුම් කළ යුත්තේ ඔවුන්ට අවශ්‍ය වූ දේ ලබාගැනීමට සන්ධීය රාජ්‍යයක් ඒකීය රාජ්‍යයකට වඩා සුදුසු ය කියා. මේ සිංහල විරෝධී පඬියන් ඇතැම් ඒකාබද්ධ විපක්‍ෂ නායකයන්ට අනුව බුද්ධිමත් දේශපාලන විද්‍යාඥයන්.

Saturday, 7 October 2017

ආණ්ඩුව පරාජය කිරීමට මග  


ආණ්ඩුව පරාජය කිරීමට මග




දිනේෂ් ගුණවර්ධන මල්වතු මහානාහිමි බැහැ දැකීමට ගිය අවස්ථාවේ උන්වහන්සේ ප්‍රකාශ කෙළේ මෙහෙයුම් කමිටුවේ අතුරු වාර්තාව පිළියෙළ කිරීමේ දී එතුමන් ද සහභාගි වූ බවයි. පසුව කිරිඇල්ල ද පවසා ඇත්තේ අතුරු වාර්තාව ඉදිරිපත් කර ඇත්තේ සියලු පක්‍ෂවල එකඟතාව මත බවයි. මෙය දිනේෂ් ගුණවර්ධනගේ ප්‍රශ්නයක් නොව ඒකාබද්ධ විපක්‍ෂයේ ප්‍රශ්නයක්. ඒකාබද්ධ විපක්‍ෂය ඊනියා ව්‍යවස්ථා මණ්ඩලයේ සිටිනතාක් මේ කතා අහන්න සිද්ධ වෙනවා.

Friday, 6 October 2017

නව ව්‍යවස්ථාව මුළුමනින් ප්‍රතික්‍ෂෙප කරමු  


නව ව්‍යවස්ථාව මුළුමනින් ප්‍රතික්‍ෂෙප කරමු



නව ව්‍යවස්ථාව සම්බන්ධයෙන් අපට විසඳා ගත යුතු ප්‍රශ්න කිහිපයක් තියෙනවා. මල්වතු මහානායක හාමුදුරුවන් මේ ප්‍රශ්නවලට කුමන පිළිතුරු දේවි දැයි හිතා ගන්න පුළුවන්. උන්වහන්සේ දැන් ඉන්නේ වික්‍රමබාහුලා දරණ මතයේමයි. අපට එය ප්‍රශ්නයක් නො වෙයි. අපට වික්‍රමබාහුලා වියන්ගොඩලා ජනරංජලා පන්සල් ගියත් එකයි, නැතත් එකයි. ඔවුන්ට මේ රටේ ඡන්ද දහදාහක් ගන්න බැහැ. ජනමාධ්‍ය නොවන්නට ඔවුන් ජීවත්වන බවවත් ඔවුන්ගේ නෑ හිතමිතුරන් හැරෙන්න වෙන කවුරුන්වත් දන්නේ නැහැ. ජනමාධ්‍ය අපට ඉඩක් නොදුන්නත් වික්‍රමබාහුලාට වියන්ගොඩලාට කාලය (විද්‍යුත් මාධ්‍ය) හා අවකාශය (මුද්‍රිත මාධ්‍ය) ලබා දෙනවා. මේ ආණ්ඩුව පිහිටුවීමට ජීවිත පරිත්‍යාගෙන් වැඩ කළාය කියන ජනරංජන තවමත් ජීවත් වෙනවා! 

Thursday, 5 October 2017

දයාන්ගේ මැද තැන


දයාන්ගේ මැද තැන



දයාන් ජයතිලක තමා දේශපාලන විද්‍යාඥයකු ලෙස හඳුන්වා ගන්නවා. ඩලස් අලහප්පෙරුම දයාන්ගේ දේශපාලන විචාර ඉතා ඉහළින් පිළිගන්නවා. පසුගිය දා ඒකාබද්ධ විපක්‍ෂයේ මන්ත්‍රීවරුන්ගේ යම් රැස්වීමක දේශනයක් සඳහා දයාන්ට ආරාධනය කර තිබෙනවා. ඔහුට එසේ ආරාධනය කෙළේ කවුද යන්නවත් කුමකට ද යන්නවත් මා දන්නේ නැහැ. වර්ධරාජ  පෙරුමාල් ප්‍රේමදාස ආදීන් සමග වූ කීර්තිමත් ඉතිහාසයක් ඔහුට තිබෙනවා. එකල ප්‍රේමදාස හිතවාදියකු වූ මහින්දපාලගේ කතෘත්වයෙන් පළ වූ ඔබ්සර්වර් පත්‍රයෙහි ඔහු අනුරුද්ධ තිලකසිරි නමින් ජාතික චින්තනයට විරුද්ධව ලිපි පෙළක් පළ කළා. ඒ ලිපි සිංහලට පරිවර්තනය කෙරී සිළුමිණ පත්‍රයෙහි පළවූවා.

Wednesday, 4 October 2017

ගුරුත්වාකර්ෂණ බලය


ගුරුත්වාකර්ෂණ බලය





සමහරු හිතන්නෙ ගුරුත්වාකර්ෂණය කියල දෙයක් තියෙනවා කියලා. එය ඇත්තක් කියලත් කියනවා. ඇත්ත සත්‍යය ආදිය සත්බව නැත්නම් ඇති බව සමග බැඳිලා. අප ඇත්ත කියලා කියන දෙය තියෙන්න ඕන. ඒත් මේ තියෙනවා කියලා කියන්නෙ මොකක් ද? තියෙන දේ තියෙන බව අප දැනගන්න ඕන. එහෙම දැනගන්නෙ කොහොම ද? මේ ප්‍රශ්නයට දෙන පිළිතුර මොකක් ද? ගුරුත්වාකර්ෂණය තියෙනව ද?

Tuesday, 3 October 2017

බෞද්ධයනට උපදෙස්


බෞද්ධයනට උපදෙස්



නව ව්‍යවස්ථාවක් ඕන කරන්නේ බටහිරයන්ට ඉන්දියානුවන්ට ඔවුන්ගේ ඔත්තු සේවාවන්ට ඔවුන්ගෙන් යැපෙන දෙමළ ජාතිවාදීන්ට හා පඬියන්ට බව අප ඊයේත් සඳහන් කළා. මේ ව්‍යවස්ථාව හදිසියේ ගෙන එන්නක් නො වෙයි. බටහිරයන් හා ඉන්දියාව මේ ආණ්ඩුව පත් කර  ගත්තේ ම ව්‍යවස්ථාව සම්පාදනය කිරීමට. නව ව්‍යවස්ථාව දහතුන රැකීමට හා දහතුන තවත් ඉදිරියට ගෙන යෑමට. ඒකාබද්ධ විපක්‍ෂයට උපදෙස් දෙන ඇතැම් පඬියන් කියනවා තමන් දහතුනෙන් එහාට දශමයක්වත් යෑමට ඉඩ නො දෙන බව. එය හුදු වාගාඩම්බරයක් පමණයි. අප රැවටීමක් පමණයි. ආණ්ඩුවත් කියන්න ඉඩ තියෙනවා තමන් දහතුන නියමාකාරයෙන් ක්‍රියාත්මක කිරීම හැර වෙනත් දෙයක් කරන්නෙ නැහැ කියලා.

Monday, 2 October 2017

මේ කාට ඕන නව ව්‍යවස්ථාවක් ද?  






මේ කාට ඕන නව ව්‍යවස්ථාවක් ද?



මේ අවස්ථාවේ නව ව්‍යවස්ථාවක් සම්පාදනය කිරීමට ඇති අවශ්‍යතාව කුමක් ද? ව්‍යවස්ථාවක් සම්පාදනය කිරීමට පෙර ඇසිය යුතු පළමු ප්‍රශ්නය එයයි. පසුගිය ජනාධිපතිවරණයට ඉදිරිපත් වූ ප්‍රධාන අපේක්‍ෂකයන්ගෙන් එක් අයකු වූ මහින්ද රාජපක්‍ෂට ව්‍යවස්ථාවක් සම්පාදනය කිරීමේ අවශ්‍යතාවක තිබුණේ නැහැ. අනෙක් අපේක්‍ෂකයා වූ මෛත්‍රිපාල ජනමත විචාරණයකට තුඩු නොදෙන ආකාරයකට ව්‍යවස්ථාව සංශෝධනය කිරීමට පොරොන්දු වුණා. එයින් කියැවෙන්නේ ජනාධිපතිවරණයේ  දී නව ව්‍යවස්ථාවක් සම්පාදනය කිරීමට මෙරට ජනතාව වරමක් දී නොමැති බවයි.