Main Logo

Tuesday, 25 June 2019

දහනවය, විස්ස හා මහින්ද


දහනවය, විස්ස හා මහින්ද 

දැන් ඒ ගමන මහින්දගෙ පිළ කියාගෙන යනවා ඔවුන් දහනවයට ඡන්දය දුන්නෙ විස්ස ගේන බවට මෛත්‍රිපාල පොරොන්දු වුණ නිසා කියල. මහින්දත් ඒ වගේ කතාවක් පහුගිය දා කිවුවා.  ශ්‍රී ල නි පක්‍ෂය දහනවයට ඡන්දය දුන්නෙත් මෛත්‍රිපාල ඔවුන්ටත් විස්සක් ගේන බවට පොරොන්දු වුණු නිසා ද? ඊයේ මා අසා සිටියා ඩලස් අලහප්පෙරුම මහා බුද්ධිමත් ස්වයං විවේචනාත්මක වෙසක් ගනිමින් තමන් දහනවයට ඡන්දය දීම වරදක් බව පිළිගන්නා බවත් එහෙත් එසේ කෙළේ විස්ස ගෙනෙන බවට පොරොන්දු වූ නිසා බවත් කියනවා. මේ ඩලස් අලහප්පෙරුම නුගේගොඩ රැස්වීම දවස්වල හිටියේ කොහෙද?  

ඒ ප්‍රශ්නය විස්සට අදාළ නැති බව පැහැදිලියි. නමුත් මා ඒ ප්‍රශ්නය අහනවා. දහනවය ගෙනාවෙ ඊනියා දින සීයේ යහපාලන ආණ්ඩුවෙන්. ඩලස් ඒ බව දන්නවා. දහනවය ගෙනාවෙ නුගේගොඩ රැස්වීමට පස්සෙ කියන එකයි මගේ මතකය. ඩලස් ඒ වන විට මහින්දගෙ හොඳ හිතවතෙක් වෙලා. ඒත් ජනවාරි මාසෙ නම් මහින්දට දුරකථනයටවත් ඔහු සම්බන්ධ කර ගන්න බැරි වුණා. කෙහෙළිය රඹුක්වැල්ලත් කියල තිබුණ දහනවයට ඡන්දය දුන්නෙ විස්ස ගේන බවට පොරොන්දුවක් දුන් නිසා කියල. කෙහෙළිය කියන්නෙ ජී එල් සමග පළාත්සභා පොදු ලැයිස්තුව අස් කර ගන්න බවට ලියුමක් දුන් තැනැත්තා. ඒ අවුරුද්දකට දෙකකට කලින්. මහින්දගෙ අනුග්‍රහයක් නැතිව ඔවුන් ඒ ලිපිය දෙයි කියල හිතන්න බැහැ. 

මහින්ද කියන ඕන දෙයක් පිළිගන්න රටේ අර පනස්අට ලක්‍ෂයෙන් අති විශාල බහුතරය සූදානමින් ඉන්නවා. ඔවුන් මා කියන දෙයක් සතපහකට ගණන් ගන්නේ නැහැ. මහින්ද කොටි පරදවන්නෙ අරකෙන් ද කියල සෝමවංශ අමරසිංහගෙන් අහන්න අවුරුදු විස්සකටත් ඉස්සර කොටි පැරදවිය හැකි බව හා යුතු බව මා කියා තිබුණා. එහෙත් මා කියන දේට වඩා මහින්ද කියන දේ මිනිසුන්ට විශ්වාසයි. ඔවුන් මා සලකන්නේ කිසි වැඩක් කරල නැති නිකම් ලිපි ලියන්නකු හැටියට පමණයි. සමහරු හිතන්නෙ මට පුළුවන් ඊනියා තියරි විතරයි කියලයි. මා ප්‍රායෝගික ව කර ඇත්තේ කුමක් දැයි ඔවුන් අහනවා. මා ආයුධයක් ගෙන සටන් බිමට ගිය නැති බව ඇත්තයි. ඒහෙත් මා කිසිවක් නොකළ අයකු ලෙස සැලකීම නම් තරමක ප්‍රශ්නයක්. ඒත් ඒ ගැන මා පුදුම වෙන්නේ නැහැ. හතරවැනි සියවසෙන් පමණ පසුව අප හිතන එක නතර කරලා. අප දන්නේ හිතන අය ගැන නොව අනුන්ගේ සින්දු කියන ඩ්‍රීම් ස්ටාර්ලා ගැන පමණයි. මා කියන්නේ පඬියන් ගැන ම පමණක් නො වෙයි.  

අවාසනාවකට ත්‍රස්තවාදීන් පරාජය කිරීමේ සම්පූර්ණ ගෞරවය ම මෙන් මහින්දට හිමිවෙලා. වැඩිම වුණොත් ගෝඨාභය ගැන කියාවි. එහෙත් සරත් ෆොන්සේකා වසන්ත කරන්නාගොඩ ආදීන් ද සිටිනවා. මේ ගෞරවය නිසා මහින්ද කියන ඕනෑම දෙයක් පනස්අට ලක්‍ෂය පිළිගන්නවා.   

පනස්අට ලක්‍ෂය මා ප්‍රතික්‍ෂෙප කරාවි. මට ලැබුණු කුට්ටිය කීයද කියලා අහාවි. එහෙත් මා ඉතා හොඳින් දන්න දෙයක් තියෙනවා. දහනවය සාකච්ඡා වෙන කාලෙ විස්සක් ගැන ඒකාබද්ධ විපක්‍ෂය කතා කෙළේ නැහැ. මා එය දැන ගත්තේ කෙසේ ද කියා මා කියන්නේ නැහැ. එකල මා ඒකාබද්ධ විපක්‍ෂයේ ප්‍රධානීන්ට පෞද්ගලික ව  ලිපියක් යැවුවා අඩු තරමෙන් දහනවයේ යම් යම් කොන්දේසි ඉවත් කරවන්න කියා. එහෙත් ඔවුන් ඒ ලිපිය සතපහකට ගණන් ගත්තේ නැහැ. ඒ වන විට මහින්ද දහනවයට ඡන්දය දෙන්න තීරණය කරල ඉවරයි. පසු දිනෙක පවිත්‍රා වන්නිආරච්චි ඉතා පැහැදිලි ව කියා තිබුණා තමන් දහනවයට ඡන්දය දුන්නෙ සර් (මහින්ද) කී නිසා කියල. විස්සක් ගැන කතාවක් තිබුණෙ නැහැ. 

විස්සෙ කතාව ඊයෙ පෙරේදා ඇදල ගත්ත එකක්. දහනවයට ඡන්දය දීම වරදක් බව පෙන්නුවා ම තමයි විස්සක් ඇදල ගත්තෙ. ඊට ඉස්සර විස්සක් ගැන කියැවුණෙ නැහැ. පසු කාලෙක 2018 මැයි මාසෙ වගේ ජ වි පෙ ආණ්ඩුව වෙනුවෙන් විස්සක් ගෙනාවා. ඒක විධායක ජනාධිපති ක්‍රමය සම්පූර්ණයෙන් ම වගේ අහෝසි කරන්න ගෙනාපු එකක්. ජනාධිපති තෝරන ක්‍රමයත් වෙනස් කරන්න ඒකෙ කියල තිබුණා. 2018 මැයි මාසෙ විස්ස ගැන මා ලියා ඇති මහින්දගෙ මුට්ටි දේශපාලනය ගැනත් කියලා. දහනවය ගෙනාපු දවස්වල විස්සක් ගැන කතාවක් තිබුණෙ නැහැ. ඒකාබද්ධ විපක්‍ෂෙ මහින්දගෙ කීමට දහනවයට ඡන්දය දුන්නා. අද ඔවුන් විස්ස ගැන බයිලා කියනවා. 

හොඳයි අපි හිතමු මෛත්‍රිපාල විස්ස ගේන බවට පොරොන්දු වුණා කියල. දැන් ඒ විස්සෙ තියෙන්න යන්නෙ මොනව ද කියල ඩලස් හරි කෙහෙළිය හරි පවිත්‍රා හරි දැන ගෙන හිටිය ද? දැන ගෙන හිටිය ම කියමු. එත් මේ අනාගතයෙ සිද්ධ වෙන දෙයක් ගැන දුන් ඊනියා පොරොන්දුවක් නිසා දහනවයට ඡන්දය දෙනවා ද? ජනාධිපති ධුරයක් දැරූ අයකු කිසිම ලියවිල්ලක් නැතිව මෛත්‍රිපාල දුන් පොරොන්දුවක් මත පමණක් ඒ සා වැදගත් පනතකට ඡන්දය දෙනවා ද? 

අනෙක් අතට ඒකාබද්ධ විපක්‍ෂයෙ ම අය තමයි කිව්වෙ මෛත්‍රිපාල විශ්වාස කරන්න බැහැ කියලා. රෑ එකට ආප්ප කා පසුදා උදේ තමන්ට විරුද්ධ වූ අයකු ගැන මාස කිහිපයක් යන්නට මත්තෙන් එවැනි විශ්වාසයක් ඇති කර ගත්තේ කෙසේ ද? මට මෛත්‍රිපාල ගැනවත් මහින්ද ගැනවත්  තදබල විශ්වාසයක් නැහැ.  ඒත් ඒ දෙදෙනා එකතු නොවී රනිල් ඉවත් කරන්න බැරි බව මා දැන සිටියා. මා ඒ සඳහා ලිව්වා. පහුගිය ඔක්තෝම්බරයෙ එය එලෙසමත් ඉටු වුණා. මයිලෝ කාරයන් නොවන්නට අපට හුඟක් දේ කර ගන්න තිබුණා.  

මහින්ද දහනවයට ඡන්දය දෙන්න ඒකාබද්ධ විපක්‍ෂය පෙළඹෙව්වේ තමාට ඊනියා විධායක අගමැතිකම ලැබේවිය යන බලාපොරොත්තුවෙන් විධායක ජනාධිපති බලතල කපා දැමීමට කියන එක දැන් කියන එකක් නැහැ. ඔහු අඩු වශයෙන් දහතුන ගැනවත් හිතුවේ නැහැ. පළාත් සභා තිබිය දී විධායක ජනාධිපති බලතල කප්පාදු කිරීම ඔහුට ප්‍රශ්නයක් වුණේ නැහැ. රට ගැන නොව පෞද්ගලිකත්වය ගැන පමණක් සිතා තීරණ ගැනීමේ වරදින් අද රට ම අස්ථාවර වෙලා. මහින්ද ඒකාබද්ධ විපක්‍ෂයේ ඡන්ද ලබා නොදෙන්න දහනවය සම්මත කර ගන්න බැහැ.  

2018 මැයි 05, 08, 16, 26, 27, 30 හා ජූනි 08 කාලය වෙබ් අඩවියේ පළ වූ ලිපි කියෙව්වොත් විස්ස ගැන තව යමක් කමක් දැන ගන්න පුළුවන්. කාගෙ කාගෙත් කිල්ලෝටවල හුණු තියෙනවා. දහනවයට පමණක් නොව යහපාලන අයවැයටත් ඒකාබද්ධ විපක්‍ෂය ඡන්දය දුන් බවයි මගේ මතකය. වැරදි නම් කියන්න. මේ රටේ තියෙන්නෙ දරුණුම ගණයෙ ගණුදෙනු (ඩීල්) දේශපාලනයක්. දහනවයට විරුද්ධ ව ඡන්දය දුන්නෙ සරත් වීරසේකර පමණයි. ජානක බණ්ඩාර ඡන්දය නොදී ගෙදර ගියා.    

Monday, 24 June 2019

එකුන් විස්ස හෙවත් දහනවය

එකුන් විස්ස හෙවත් දහනවය 



සිංහල භාෂාව හරි ම ක්‍රමානුකූලයි. දැන් සිංහලයන්ට ක්‍රමයක් නැති එක වෙන ම ප්‍රශ්නයක්. එකුන් විස්ස කියන්නෙ එකක් අඩු විස්ස. එකක් වැඩි වුණා ම ඒක විසි එක වෙනවා. අද කතාව එකුන් විස්ස ගැන. මෛත්‍රිපාල දහනවයට විරුද්ධ ව කතා කරලා. දහඅටටත් විරුද්ධ කියල කියනවා. හැබැයි එයත් දහඅටට ඡන්දෙ දුන්න. දහනවය සම්මත කර ගන්න එයා සමග තකතීරු යහපාලනේට ගිය ශ්‍රී ල නි ප මන්ත්‍රීවරුනුත් ඡන්දය දුන්න. ඔය දෙකට ම මහින්දත් පක්‍ෂ වුණා. දහඅට සම්මත කර ගත්තෙ මහින්ද ජනාධිපති වෙලා ඉන්න කොට. ඒක සම්මත කර ගත්තෙ මූලික වශයෙන් ම මහින්දට තුන්වැනි වතාවකටත් ජනාධිපති ධුරයට ඉදිරිපත් වෙන්න පුළුවන් වෙන විධියට. 

Sunday, 23 June 2019

පාස්කු ප්‍රහාරය ෆැන්ටසියක්

 පාස්කු ප්‍රහාරය ෆැන්ටසියක්  



තූත්තුකුඩි විශ්වවිද්‍යාලයේ සමාජයීය විද්‍යා පීඨයේ ආචාර්ය මහාචාර්ය විද්වතුන් රැසකගේ සහභාගීත්වයෙන් කරන ලද පශ්චාත්නූතනවාදී පශ්චාත් යටත්විජිත භූ දේශපාලනික අධ්‍යයනයකින් හෙළි වී ඇත්තේ පාස්කු ඉරිදා ලංකාවේ බෝම්බ ප්‍රහාරයක් සිදු වී නොමැති බවයි. මේ අධ්‍යයනයට විසිඑක්වැනි සියවසේ තවදුරටත් වර්ධනය කෙරී ඇති නූතන විද්‍යාත්මක ක්‍රමවේදයන් යොදා ගෙන ඇති බවත් සඳහන් වෙනවා.

Saturday, 22 June 2019

අගෝස්තු එකොළහ

අගෝස්තු එකොළහ

අගෝස්තු එකොළොස්වැනි දා පොහොට්ටුවේ පළමුවැනි සම්මේලනය පවත්වා ගෝඨාභය ජනාධිපති අපේක්‍ෂක ලෙස දැනුම් දීමට යන බව සඳහන් වෙනවා. පොහොට්ටුවේ සම්මේලනයක් පවත්වා ම නැද්ද? එහි සභාපති නම් ජී එල් පීරිස්. ලේකම් කෙනකුත් ඉන්නවා. ඒත් ඒ පිටිපස්සෙ දැන් ඉන්නෙ බැසිල්.  ඒත් පොහොට්ටුව නිර්මාණය කෙළෙ බැසිල් නොවෙයි. ඔහු එහි උප්පැන්නය සඳහා නම දුන්නා පමණයි. නුගේගොඩ රැස්වීම පැවැත්වෙන විටත් පොහොට්ටුව නිර්මාණය වී තිබුණා. පඬි පෝතකයකු කියන්න පුළුවන් නමක් තිබුණෙ නැහැ කියල. නමක් නැති වුණත් මිනිසුන් එක්රොක් වෙමින් සිටියා. ඒ කාලෙ බැසිල් රට ගම අත්හැරල ගිහින් හිටියෙ. 

Friday, 21 June 2019

සමථා දේශනය


සමථා දේශනය


සමථා බලවේගය හමුවේ පසුගිය 

දහනවවැනි දා මා පැවැත්වූ දේශනය මේ 

සබැඳියෙන්

https://youtu.be/gPYIJMDCyvw

පාස්කු ප්‍රහාරයට වැරදිකරුවන් නැද්ද?

පාස්කු ප්‍රහාරයට වැරදිකරුවන් නැද්ද?   



අද ජූනි විසිඑක. අද සූර්යයා තම වාර්ෂික ගමනේ දී උත්තර ධ්‍රැවය දෙසට වැඩියෙන් ම යන දවස. අද උත්තරාර්ධ ගෝලයට වැඩි ම කාලයක් හිරු පේන්න තියෙන දවස. දෙරණේ චතුර මතක් කරල දෙනව පාස්කු ප්‍රහාරයට අදට මාස දෙකයි කියල. මාස දෙකක් ගිහිල්ලත් වැරදි කාරයකු නැහැ. සහරාන් මළේ නැත්නම් ඔහුටත් නිදහස් වෙන්න තිබුණ. බුදුහාමුදුරුවන් මිනී මස් වැළඳූ බව කී අබ්දුල් රාෂික් පාර්ලිමේන්තු තේරීම් කමිටුව ඉදිරියට ඇවිත් පවු සමා කරගෙන. ආගමික ශාස්තෘවරයකුට නිග්‍රහ කරල සමාව ගත්ත ම සියල්ල හරි යනවා ද? ඕනෑම වැරැද්දක් කරල සමාව ගත්ත ම නිදහස් වෙන්න පුළුවන් ද? ක්‍රිස්තියානි ආගමේ නම් පවු සමාකිරීමක් තියෙනවා. ඒත් ක්‍රිස්තියානි නීතියේ ක්‍රිස්තියානි අධිකරණයේ කිසිම දඬුවමක් නැතිව ඕනෑම අවස්ථාවක වැරදිවලට සමාව ගන්න පුළුවන් ද? 

Thursday, 20 June 2019

ගෝඨාභය හා ජනාධිපති ධුරය

ගෝඨාභය හා ජනාධිපති ධුරය



මා ඊයේ පැවති ජාතික සමථා බලය රැස්වීමේ දී ද ප්‍රකාශ කෙළේ මහා සංඝයා වහන්සේ හා ගිහි බහුතරයක් මේ වන විටත් ගෝඨාභය රාජපක්‍ෂ ජනාධිපති අපේක්‍ෂක ලෙස තෝරා ගෙන ඇති බව ය. පොහොට්ටුව හෝ ශ්‍රී ල නි පක්‍ෂය හෝ මෙහි දී කළ යුත්තේ ඒ තෝරා ගැනීම අනුමත කිරීම හෝ නොකිරීම හෝ පමණකි. අද පැවැත්වෙනවා යැයි කියන රැස්වීමක දී රාජපක්‍ෂලාට කළ හැකි එකම කාර්යය ද එය ය. 

ඊනියා ආදීවාසීන් හා වෙනත් කතා

ඊනියා ආදීවාසීන් හා වෙනත් කතා



විශ්වකර්ම කණ්ඩායම සමග මා කළ සාකච්ඡාවක 

රූහඬපටය  මේ සබෑඳියෙන්




Wednesday, 19 June 2019

නැවෙන් පැනීම හා අපේක්‍ෂකත්වයට ගැනීම

නැවෙන් පැනීම හා අපේක්‍ෂකත්වයට ගැනීම

ජනතා විමුක්ති පෙරමුණ යැයි කියා ගන්නා ජනතා විරෝධී පෙරමුණේ ලාල් කාන්ත පසුගිය දා රාජිත සේනාරත්න ගැන හොඳ ප්‍රකාශයක් කර තිබුණා. රාජිත චීන සිගරට් ගෙන්වීම මුල් කර ගෙන ආණ්ඩුවෙන් අස්වීමට සූදානම් බව ප්‍රකාශ කළ විට ලාල් කාන්ත කියා තිබුණේ ගිලෙන නැවෙන් පනින්නට සුදානම් වන බවක්. ඒත් ලාල් කාන්ත හා ඔහුගේ නායක අනුර දාසනායක අමතක කර තිබූ කරුණක් වූයේ තමන් ද ගිලෙන නැවෙන් පනින්නට සූදානම් වන බවයි. 

අනුර දාසනායක මේ දුර්දාන්ත ආණ්ඩුවේ ඇමතිවරයකු නොවන්න පුළුවන්. ඒත් ඔහු ආණ්ඩුවේ මුර බල්ලාටත් එහා ගිය අයෙක්. මේ දුර්දාන්ත ආණ්ඩුව (දැන් ආණ්ඩු දෙකක්) බලයට පත් කිරීමට දර දිය ඇද්ද අය අතර දාසනායකලා හා ලාල් කාන්තලා ඉන්නවා. ඒ කියන්නේ ඔවුන්වත් චම්පකලාවත් රාජිතලාවාත් මේ ආණ්ඩුව බලයට පත් කළ බවක් නො වෙයි. ඔවුන්ට එවැනි කාර්යයක් කරන්න බැහැ. මේ ආණ්ඩුව බලයට පත් කෙරුණේ බටහිර රටවල් හා ඉන්දියාව විසින්. අදත් මෛත්‍රිපාල වටා ඉන්දීය ඔත්තු කරුවන් ඉන්නවා. මෛත්‍රිපාල වැඩිය සවන් දෙන්නේ මේ ඉන්දීය ඔත්තු කරුවන්ට මිසක් පැරණි ශ්‍රී ල නි පාක්‍ෂිකයන්ට නො වෙයි. මෛත්‍රිපාල පැරණි ශ්‍රී ල නි පාක්‍ෂික මන්ත්‍රීවරුන්ට දෙන පොරොන්දු ඉන්දීය ඔත්තු කරුවන් විසින් වෙනස් කෙරෙනවා. මා නොකීවාට ජ්‍යෙෂ්ඨ ශ්‍රී ල නි පාක්‍ෂිකයන්ට ඒ ගැන වැටහීමක් තියෙන්න ඕන.  

ජ වි පෙ අද නැව් බඳේ එක් කකුලකුත් නැවෙන් පිට එක් කකුලකුත් තියා ගෙන ඉන්නෙ. ඔවුන් ආපසු නැවට ගියෙ නැත්තන් වෙන්න තියෙන්නෙ මුහුදෙ ගිලිලා මැරෙන එක විතරයි. ආපහු ගියොත් වෙන්නෙ නැවත් එක්ක ගිලෙන එක. දෙකෙන් කෝක කළත් වෙනසක් නැහැ. රාජිතටත් ඒ සන්තෑසිය ම තමයි. තව මාස කිහිපයක් මාධ්‍ය සාකච්ඡා පවත්වමින් ඉන්න පුළුවන්. 

මාධ්‍ය අපට සහාය දුන්නත් නැතත් අප කියන දේ විකෘත කර ප්‍රචාරය කළත් අප අපේ වෑයම ඉදිරියට ගෙන යනවා. ඒ සිංහල බෞද්ධ රාජ්‍යය යළි පිහිටුවීම. අප එහි පළමු රැස්වීම ඊයේ කුලියාපිටියේ උඩුබද්දාවේ දී පැවැත්තුවා. එය එහි සංවිධානය කෙරුණේ කුලියාපිටියේ සිහල සෙනග සංවිධානය මගින්. එහි දී අපට තවත් තැන් කිහිපයකින් රැස්වීම් පැවැත්වීමට ආරාධනය කෙරුණා. 

අපට අවශ්‍ය බටහිරයන් විසින් නැති කෙරුණු සිංහල බෞද්ධ රාජ්‍යය යළි පිහිටුවන්න. ඊනියා නිදහස ලැබී අවුරුදු හැත්තෑවකට වැඩි කලක් ගියත් අප තවමත් සංස්කෘතික වශයෙන් ක්‍රිස්තියානි රාජ්‍යයක්. සිංහල බෞද්ධ රාජ්‍යය යළි පිහිටුවනවා කියන්නෙ සිංහල බෞද්ධයනට වෙන ම රාජ්‍යයක් ඉල්ලන එක නො වෙයි. බටහිර නූතනත්වය කියන්නෙ ක්‍රිස්තියානිය (කතෝලික නො වෙයි) මුල් කර ගත් සංස්කෘතියක බිහි වුණු ප්‍රපංචයක්. 

අපේ ආදි නිර්මාණත් බටහිර නූතනත්වයෙ තියෙනවා. ඒ අපේ සංකල්ප ඔවුන්ගෙ සංකල්ප කර ගැනීමෙන් පසුව. බෞද්ධයන්ගෙ ශූන්‍යය (සිංහලයන් ඒ සඳහා යොදාගත් සංකේතය ( ් ) හල් කිරීම. දැනට ලෝකයේ ශූන්‍ය සඳහා භාවිතා කර ඇති පැරණි ම සංකේතය තියෙන්නෙ සීගිරියෙ කියල හිතන්න පුළුවන්) නොවෙයි බටහිර ගණිතඥයන්ගෙ ශූන්‍යය. අපේ ශූන්‍යය චතුස්කෝටිකය පදනම් කර ගත් එකක්. බටහිරයන් එය ද්විකෝටකය තුළට ගත්තා. ශූන්‍යයේ නිර්මාතෘවරුන් බෞද්ධයන් (බොහෝ විට සිංහල බෞද්ධයන්) වුණත් අද අප යොදා ගන්නෙ බටහිරයන් තම සංස්කෘතිය තුළට අවශෝෂණය කර ගත් (උරා ගත්) ශූන්‍යයක්. නූතනත්වය බිහි වුණෙ ග්‍රීක යුදෙව් ක්‍රිස්තියානි චින්තනයේ මිසක් සිංහල බෞද්ධ චින්තනයේ නො වෙයි. සිංහල බෞද්ධයකු වත්මන් බටහිර ගණිතයට දී ඇති නව සංකල්පයක් නැහැ.

ඒ කොහොම වුණත් අද අපට වැදගත් වන්නෙ ජනාධිපතිවරණයෙ දි සිංහල බෞද්ධ රාජ්‍යය යළි පිහිටීවීමට ප්‍රතිඥා දෙන අපේක්‍ෂකයකු ජනාධිපති ධුරයට පත් කර ගැනීම. මේ අපේක්‍ෂකයා තෝරා ගැනීම ප්‍රධාන දේශපාලන පක්‍ෂවලට පැවරිය යුතු නැහැ. එ ජා පෙරමුණවත් ශ්‍රී ල නි පක්‍ෂයවත් පොහොට්ටුවවත් දෙමළ මුස්ලිම් ජාතිවාදී ආගම්වදී පක්‍ෂවත් සිංහල බෞද්ධ රාජ්‍යය යළි පිහිටුවන අපේක්‍ෂකයකු තෝරා ගැනීමට සුදුසු නැහැ. ඒ පක්‍ෂවල විවිධ න්‍යාය පත්‍ර ක්‍රියාත්මක වෙනවා.

සමාජවාදය කියන්නෙ මාක්ස්වාදී අර්ථයෙන් කිසි දා වලංගු නොවූ සංකල්පයක්. කාට හරි ප්‍රළුවන් ද ලෝකයේ ඇති ඊනියා සමාජවාදී රටක් නම් කරන්න. ලංකාවෙ ව්‍යවස්ථාවෙ නම් තියෙනවා සමාජවාදී කියලා. බලාගෙන යනකොට ඒ සමාජවාදී රාජ්‍යයෙ අගමැති රනිල්! ඊට වඩා සමාජවාදයක් තියෙන්න පුළුවන් ද? මේ සමාජවදයක් මිස වෙන දෙයක් නො වෙයි. 

ගෝඨාභය ජනාධිපති අපේක්‍ෂකයා වී ඇත්තේ ජනතා කැමැත්තෙන් මිස පොහොට්ටුවේ කැමැත්තෙන් නො වෙයි. පොහොට්ටුව බැසිල්ගේ නිර්මාණයක් නො වෙයි. බැසිල් පොහොට්ටුවේ උප්පැන්න සහතිකයේ පියා සඳහන් වන කොටුවේ නම ලියා ගෙන. අද පොහොට්ටුවේ ඉන්න හරි ඉන්න බව අඟවන හරි දැවැන්තයන් නුගේගොඩ රැස්වීම දින හිටියේ කොහේ ද? එක්කෝ පිටරට නැත්නම් ගෙවල්වල, එහෙමත් නැත්නම් නුගේගොඩ කඩවල, වේදිකාවේ නම් නොවෙයි. මේ අයට ජනාධිපති අපේක්‍ෂකයා තේරීමට ඇති අයිතිය කුමක් ද? 

ශ්‍රී ල නි පක්‍ෂයටත් ඒ අයිතිය නැහැ. ඉන්දීය ඔත්තු කරුවන් විසින් මෙහෙයවනු ලැබ මෛත්‍රිපාල සමග රනිල්ට එකතු වූ ඔවුන්ටත් සිංහල බෞද්ධ රාජ්‍යය යළි පිහිටුවන අපේක්‍ෂකයා තේරීමට අයීතියක් නැහැ. රනිල්ගේවත් සජිත්ගේවත් කරුණාරත්න ජයසූරියගෙවත් එ ජා පක්‍ෂයකටවත් ඒ අයිතිය නැහැ.

ජනතාව ඒ අපේක්‍ෂකයා තෝරා ගනිවි. මෙරට එක්සත් රාජ්‍යවල මෙන් ජනාධිපති අපේක්‍ෂකයා තෝරන ප්‍රාථමික ඡන්ද නැහැ. තිබුණත් තියෙන්නෙ පක්‍ෂවල. ඒකෙන් වැඩක් නැහැ. මා හිතන්නේ ජනතාව දැනටමත් ගෝඨාභය තෝරා ගෙන ඉවරයි. ප්‍රශ්නය වන්නේ යම් හේතුවක් නිසා ගෝඨාභයට ඉදිරිපත් වීමට නොහැකි වුවහොත් කරන්නේ කුමක් ද යන්නයි. අපි එයටත් මුහුණ දෙමු. ඒ වෙනත් රාජපක්‍ෂ කෙනකු නම් නොවිය යුතු බවයි මගේ හැඟීම.   

Tuesday, 18 June 2019

නිවට සිංහල දේශපාලනඥයන්ගේ ව්‍යාජ සිංහ සෙය්‍යාව

නිවට සිංහල දේශපාලනඥයන්ගේ ව්‍යාජ සිංහ සෙය්‍යාව 


ජනාධිපතිවරණය කල් දැමීමේ වුවමනාවක් ඇතැමුනට තිබෙන බව පේනවා. ජනාධිපතිත් පාර්ලිමේන්තු මැතිවරණයක් පැවැත්වීම සඳහා ජනමතවිචාරණයක් පැවැත්වීමක් ගැන කතා කර තිබෙනවා. එහෙත් පාර්ලිමේන්තුව විසුරුවා හැරිය හැක්කේ පාර්ලිමේන්තුවේ තුනෙන් දෙකේ අනුමැතියකින් කෙරෙන යෝජනා සම්මුතියකින් පසුව හෝ වසර හතරහාමාරක් ගෙවුණු තැන ජනාධිපතිගේ නියෝගයක් මත හෝ යැයි පැහැදිලි ව ආණ්ඩුක්‍රම ව්‍යවස්ථාවේ සඳහන් වෙනවා. ඒ දහනවවැනි ව්‍යවස්ථා සංශෝධනයේ ප්‍රතිඵලයක් ලෙස. 

Monday, 17 June 2019

හිස්බුල්ලා හා ජනාධිපති අපේක්‍ෂක

හිස්බුල්ලා හා ජනාධිපති අපේක්‍ෂක

හිස්බුල්ලාගෙන් අරාබි ජාතිකයන් කිහිප දෙනකු සම්බන්ධයෙන් ප්‍රශ්න කෙරිලා. ඔහු ඒ අරාබි ජාතිකයන් සමග යම් ගණුදෙනුවක යෙදිලා. ඇඳිරි නීතිය පනවා ඇති වෙලාවක මේ අරාබි ජාතිකයන් යම් හෝටලයක හදිසියෙන් තම ඇඳුම් පවා හෝටලයෙන් පිටත මාරු කර යම් මල්ලක් තබා යමින් මේ කර ඇත්තේ කිනම් ගණුදෙනුවක් ද? අර පාර්ලිමේන්තු තේරීම් කමිටුවට නම් ඒ කිසිවක් ප්‍රශ්නයක් වෙලා නැහැ. 

Sunday, 16 June 2019

පොසොන් සිතිවිල්ලක්

පොසොන් සිතිවිල්ලක්

අද පොසොන් පොහෝ දා. මිහිඳු මහ රහතන් වහන්සේ ලංකාවට වැඩම කර අවුරුදු දෙදහස් තුන්සීයයක්. අප එයට පෙරත් බෞද්ධයන් ව සිටි බවට සාක්‍ෂි තියෙනවා. මට හැඟෙන අයුරින් අවුරුදු දහස් ගණනකට පෙර හෙළ දිවයිනත් මිසරයත් (ඊජිප්තුවත්) මායාවරුන්ගේ වත්මන් බසින් නම් මෙක්සිකෝවත් අතර සම්බන්ධකම් තිබී තියෙනවා. අපේ සංස්කෘතීන් ජනප්‍රවාද අතර සමානකම් තියෙනවා. ලෝකයේ පිරමිඩ් දකින්න පුළුවන් මේ රටවල. අපේ රටේ දාගැබ් ද යම් ආකාරයක පිරමිඩ්. පිරමිඩයක් කියන්නේ පාදයෙහි යම් සංවෘත ජ්‍යාමිතික රූපයක් ඉන් ඔබ්බෙහි ශීර්ෂයක පිහිටි ලක්‍ෂ්‍යයක් සමග සම්බන්ධ කරන රේඛාවලින් සෑදුණු ජ්‍යාමිතික රූපයක්. අපේ දාගැබ්වල පාදය වෘත්තයක් වන අතර එය ශීර්ෂයට යා කරන්නේ සරල රේඛාවලින් නොව වක්‍ර රේඛාවලින්. 

Saturday, 15 June 2019

පාර්ලිමේන්තු තේරීම් කමිටුව


පාර්ලිමේන්තු තේරීම් කමිටුව


පාර්ලිමේන්තු තේරීම් කමිටුවේ ඇතැම් සාමාජිකයන්ගේ පක්‍ෂග්‍රාහීත්වය සහ දුර්මත ප්‍රචාරණය ඊයේ ඉතා හොඳින් පැහැදිලි වුණා. කලින් දවසක කමිටුවේ ඇතැමුන් රාජ්‍ය පරිපාලන අමාත්‍යාංශයේ ලේකම් රත්නසිරි මහතාගෙන් ප්‍රශ්න කෙරුවේ රාජ්‍ය සේවකයන්ගේ ඇඳුම පිළිබඳ චක්‍රලේඛය ඒ මහතාගේ හිතුමතයට යැවූ එකක් බව කියවා ගැනීමට (නැහැ මේ ඩ්‍රීම් ස්ටාර් පඬියන්ගේ පඬි පෝතකයන්ගේ පඬි නැට්ටන්ගේ කටේ තියෙන කියැවීම -reading යන පඬි සංකල්පය නො වෙයි). කමිටුවේ එක් සාමාජිකයකු කියා සිටියේ අදාළ ඇමති (රංජිත් මද්දුම බණ්ඩාර) එවැනි චක්‍රලේඛයක් යැවීමට තමා උපදෙස් නොදුන් බව කියා ඇති බවයි. එහෙත් ඊයේ රංජිත් මද්දුම බණ්ඩාර කීවේ අදාළ චක්‍රලේඛය යැවීමට තමා උපදෙස් දුන් බවයි. 



අපට පාර්ලිමේන්තු තේරීම් කමිටුව ගැන කෙතරම් විශ්වාසයක් තබා ගත හැකි ද? ඔවුන් ප්‍රශ්න කරන ආකාරය ජනමාධ්‍යයේ ප්‍රචාරය කිරීමත් හොඳයි. බුද්ධි අංශවල ඇතැම් තොරතුරු හෙළිදරවු වෙන බව ඇත්තයි. එහෙත් අද දෙකේ කොළේට බස්සා ඇති බුද්ධි අංශ පිළිබඳ දැන ගත්තා කියා විශේෂයක් වන්නේ නැහැ. කොහොමටත් කමිටු සාමාජිකයන්ගේ ආකල්ප අපට මේ ප්‍රශ්න කිරීම් මගින් දැන ගන්නට ලැබෙනවා. දුර්මත ප්‍රචාරය කරන කමිටු සාමාජිකයන් ගැන මහෝපාසක කරුණාරත්න ජයසූරියට කියන්න ඇත්තේ කුමක් ද



පාර්ලිමේන්තු තේරීම් කමිටුව ප්‍රශ්න කරන ආකාරයෙන් ඒ ජනාධිපති ඉලක්ක කරගෙන කෙරෙන්නක් බව පැහැදිලියි. ඒ අතර ම කමිටුවේ සාමාජිකයන් මෙන් ම පිටස්තරයන් අතරත් ඇති ජනාධිපති අපේක්‍ෂකත්ව තරගයත් පැහැදිලි වෙනවා. කරුණාරත්න ජයසූරිය, සජිත් ප්‍රේමදාස, රවි කරුණානායක ආදීන් තරගයේ ඉහළින් ම ඉන්නවා. ඒත් තවමත් ප්‍රධාන තරගකරු රනිල්. අද ඇත්තේ මෛත්‍රිපාල ආණ්ඩුවක් හා රනිල් සුමන්තිරන් ආණ්ඩුවක්. මේ ආණ්ඩු දෙක අතර ගැටුම තමයි අද දේශපාලනයෙ කැපී පෙනෙන්නේ. 



මෙය ඊනියා ව්‍යවස්ථාදායකය හා විධායකය අතර ගැටුමක් නො වෙයි. මෙරට විවිධ පඬියන් දන්නේ බටහිර සංකල්ප නැවත නැවත කීම පමණයි. ඩ්‍රීම් ස්ටාර්ලා අනෙක් අයගේ සින්දු (බයිලා) කීම හැර වෙන මොනවා කරන්න ද? අපේ රටේ ව්‍යවස්ථාදායකය හා විධායකය අතර ඉරක් ගසා කර වෙන් කිරීමක් දකින්න බැහැ. අපට වෙන් කරන්න බැහැ. එය අපේ සංස්කෘතික ලක්‍ෂණයක්. ඒ වෙන් කිරීමට නොහැකි වීම අමාත්‍ය මණ්ඩලය රැස් නොකිරීමට ගත් තීරණයෙනුත් පැහැදිලි වෙනවා. ලබන අඟහරුවාදා අමාත්‍ය මණ්ඩලය රැස්වෙන්න ඉඩ තියෙනවා. 



මෙරට විධායක ජනාධිපති අමාත්‍ය මණ්ඩලයේ ප්‍රධානියා. ඔහු අමාත්‍ය මණ්ඩලයේ සාමාජිකයෙක්. අමාත්‍ය මණ්ඩලයේ අනෙක් සාමාජිකයන් පාර්ලිමෙන්තුවේ, ඒ කියන්නේ ව්‍යවස්ථාදායකයේ. විධායක ජනාධිපති මාස තුනකට වරක්වත් පාර්ලිමේන්තුවට එනවා. එහි කතා පවත්වනවා. අමාත්‍ය මණ්ඩලයට ජනාධිපති නැතිව රැස්වෙන්න බැහැ. මේ අච්චාරුවේ ඇත්තේ ආණ්ඩු දෙකක්. අද ඇත්තේ මේ ආණ්ඩු දෙකේ ගැටුමයි. 



කලින් වතාවකත් ආණ්ඩු දෙකේ ගැටුමක් තිබුණා. ඒ චන්ද්‍රිකාගේ ආණ්ඩුව හා රනිල්ගේ ආණ්ඩුව අතර. ඒ ගැටුම ඊනියා පරිවාස ආණ්ඩුවක් හදල නවත්ත ගත්ත. මෙවරත් ඔක්තෝම්බර්  විසිහය වෙනින් ම ආණ්ඩුවක් හැදුව. ඒ ආණ්ඩුව කඩා දාන්න ජ වි පෙ කටයුතු කරල නැවතත් රනිල්ගෙ ආණ්ඩුව බලයට පත් කළා. ඔක්තෝම්බර් විසිහය ආණ්ඩුව රැක ගන්න බැසිල් කටයුතු කර නැති බව ශ්‍රී ල නි පක්‍ෂයේ ඇතැමුන් කියනවා. 



මෙවර ආණ්ඩු දෙකේ ගැටුම උත්සන්න වීමට දහනවවැනි ව්‍යවස්ථා සංශෝධනය බල පානවා. ඒ සංශෝධනය ඉවත් කිරීම මීළඟ මැතිවරණයේ එක් පොරොන්දුවක් විය යුතුයි. මහින්ද අමරවීර විධායක ජනාධිපති ධුරය අහෝසි කරන්න කතා කරන්නෙ මොන පාර්ලිමේන්තුව මගින් ද? පළාත් සභා අහෝසි නොකර විධායක ජනාධිපති ධුරය අහෝසි නොකළ යුතුයි. දේශපාලනඥයන් පරිණත නොවන බවක් පේනවා. ඔවුන්ට සමස්තය පේන්නෙ නැහැ. කුඩා ළමුන් මෙන් ඒ ඒ කරුණෙහි දී අනෙක් සියල්ල අමතක කර ක්‍රියා කරනවා. 



පාර්ලිමේන්තු තේරීම් කමිටුව විසුරුවා හැරිය යුතු ය කියා මා කියන්නේ නැහැ. හැමදාම මෙන් හවසට අපට ඔවුන් ගැන තවදුරටත් දැන ගැනීමේ අවස්ථාව ලැබෙනවා. තරමක ප්‍රශ්නයකට තියෙන්නෙ එයට අපේ මුදල් වියදම් වෙන එක පමණයි. ඒත් මේ රටේ සිදුවන මුදල් නාස්ති ගැන හිතන විට එය සොච්චම් මුදලක්. පාර්ලිමේන්තු රැස්වීමකට කොච්චර මුදලක් යනවා ද? ඒකට වියදම් කරන මුදලට සරිලන දෙයක් ඒකෙන් රටට ලැබෙනවා ද



ඒත් විපක්‍ෂය පාර්ලිමේන්තු තේරීම් කමිටුව පත් කරන්න උදවු කළා. ඒකෙ වාර්තාව හරි මොකක් හරි පාර්ලිමේන්තුවට ඉදිරිපත් කළා ම විපක්‍ෂය කොයි විධියට කටයුතු කරයි ද කියා අපි බලා ඉන්නවා.   





Friday, 14 June 2019

සහාරාන් වැඩ කෙළේ කාට ද?

සහාරාන් වැඩ කෙළේ කාට ද? 

පාර්ලිමේන්තු තේරීම් කමිටුව පත් කර ගත්තේ මොකට ද කියන එක දැන්වත් පැහැදිලි වෙන්න ඕන. අද මොන බයිලා කිව්වත් තේරීම් කමිටුව පත් කර ගත්තේ විපක්‍ෂයේත් සහාය ඇතිවයි. කිසිම දේශපාලනඥයකු ගැන විශ්වාසයක් තියන්න බැහැ. අප එහෙම කියන්නෙ හිතේ කාගෙ හරි නමක් තියාගෙන ඔහු වෙනුවෙන් නො වෙයි. මෛත්‍රිපාල, රනිල් පමණක් නොව මහින්ද බැසිල් ගැනත් විශ්වාසයක් තියන්න බැහැ. මෙහෙම කියන එකට ඇතැමුන් විරුද්ධ වේවි. දෙරණ 360 වැඩ සටහනේ දී මහින්දටත් දොස් පැවරුවාය කියා ඇතැමුනට කේන්ති ගිහිල්ලා. බැසිල් ගැනත් යමක් කීමට නොහැකි වීම ගැන නම් මටත් කේන්තියි. දැන් බැසිලිකාව මට විරුද්ධ ව යුද්ධ ප්‍රකාශ කරාවි. 

Thursday, 13 June 2019

අසාද් සාලිගෙ අට

අසාද් සාලිගෙ අට

අසාද් සාලි කියන්නේ පිස්සකුවත් මෝඩයකුවත් නො වෙයි. ඒ කියන්නෙ ඔහු වියතකු බුද්ධිමතකු කියන එකත් නො වෙයි. ඔහු බස්නාහිර පළාතෙ ආණ්ඩුකාර ධුරයට පත් කරනු ලැබුයෙ මෛත්‍රිපාල විසින්. හිස්බුල්ලත් ආණ්ඩුකාරයකු වුණේ ඡන්දෙකින් නො වෙයි. අසාද් සාලි විවිධ ප්‍රකාශ නිකුත් කරනවා. ඔහු බල්ලගෙ වැඩේ බූරුවා කරන පාර්ලිමේන්තු තේරීම් කමිටුවට ගිහිනුත් ප්‍රකාශ කරනවා. මේ ප්‍රකාශ කරන්නෙ යම් අරමුණක් ඇතිව. 

Wednesday, 12 June 2019

ආණ්ඩු දෙකේ ගැටුම අවසන් අදියරේ

ආණ්ඩු දෙකේ ගැටුම අවසන් අදියරේ



පාස්කු ඉරිදා ප්‍රහාරයෙන් දින පනහකට පසු (දින පනහේ ආණ්ඩුව මතක් වෙනවා) පසු මහින්ද රාජපක්‍ෂ මුස්ලිම් අන්තවාදය ගැන පැහැදිලි ප්‍රකාශයක් කරලා. ඔහු මුස්ලිම් දේශපාලනඥයන්ගේ සිංහලෙන් එකක් දෙමළෙන් තවත් එකක් දෙබිඩි ප්‍රතිපත්තිය ගැනත් මේ සියල්ල ජනාධිපතිවරණය සම්බන්ධයෙන් යොදා ගැනීමට ඇති හැකියාව ගැනත් කියනවා. මේ ටික කියන්න මෙච්චර කල් ගත්තෙ ඇයි?

Tuesday, 11 June 2019

යුදෙව්වන් හා බෞද්ධයන්


යුදෙව්වන් හා බෞද්ධයන් 



මා ඊයේ සඳහන් කළා ශූන්‍ය පිළිබඳවත් මහාචාර්ය අමිර් ඇක්සල් පිළිබඳවත්. මා මහාචාර්ය අමිර් ඇක්සල්ට විද්‍යුත් පණිවුඩයක් යවා තිබුණා චතුස්කේටිකයෙන් ශූන්‍යය තේරුම්ගත හැකි ආකාරය ගැන කියා. මා ඊයේ රාත්‍රී  මගේ විද්‍යුත් තැපෑල පිරික්සීමේ දී ඉතා කණගාටුදායක පුවතක් දැන ගන්නට ලැබුණා. ඒ මහාචාර්ය අමිර් ඇක්සල්ගේ භාර්යාවගෙන් ලැබුණු පණිවුඩයක්. එහි සඳහන් වූයේ මහාචාර්ය ඇක්සල් 2015 දී මිය ගොස් ඇති බවයි. 

Monday, 10 June 2019

බෞද්ධයන් නැත්තන් ශූන්‍යය නැහැ


බෞද්ධයන් නැත්තන් ශූන්‍යය නැහැ



පහුගිය මැයි මාසෙ අටවැනි දා ලිව්ව බෞද්ධයනට බිංදුවවත් නැහැ කියන ලිපිය කියවල මෙරට ඉංගිරිසියෙන් ලියන ජනමාධ්‍යවේදියකු මට දැන්වුව අමීර් ඩී ඇක්සල් (Aczel) නමැත්තකු ශූන්‍යය සොයා ගැනීම (Finding Zero) මැයෙන් ලියා ඇති පොතක් ගැන. මා ඒ පොත කියවා තිබුණේ නැහැ. එබැවින් එහි පිටපතක් ගෙන්වා ගෙන කියෙව්වා. එතෙර වසන මගේ මිතුරකු ඒ පොතෙහි පීඩීඑෆ් (PDF) පිටපතක් ද එවා තිබුණා.

Sunday, 9 June 2019

නිවට නායකයන් නිසා සිංහලයන් වැරදි කරුවන් කිරීම


නිවට නායකයන් නිසා සිංහලයන් වැරදි කරුවන් කිරීම 

සුපුරුදු පරිදි සිංහලයන්, විශේෂයෙන් ම සිංහල බෞද්ධයන් වැරදි කරුවන් කරලා. මුස්ලිම් ජනයාට හිරිහැර කෙරෙනවයි කියල ඇතැම් අරාබි රටවලුත් කලබල වෙලා ජනාධිපතිගෙන් අහල කියලයි වාර්තා වෙන්නෙ. එය ඇත්තක් ද බොරුවක් ද කියන්න මා දන්නේ නැහැ. ඒත් චතුස්කෝටිකය අනුව නම් බොරුවක් නොවෙන්නත් පුළුවන්. ඒත් මට ප්‍රශ්නයක් තියෙනවා. ඉස්ලාම් කියන්නෙ ආගමක්. මුස්ලිම් කියන්නෙ සංස්කෘතියක්. ඉස්ලාම් හරි මුස්ලිම් හරි කියල ජනවර්ගයක් නැහැ. අනෙක් අතට සුන්නි ශියා වශයෙන් බෙදීමක් ද තියෙනවා. එයට අමතර ව සුෆි කියා කොටසකුත් ඉන්නවා. කුරූඳුවත්තේ දවටගහ පල්ලිය සුෆි මුස්ලිමුන්ගේ පල්ලියක් ලෙස සැලකෙනවා. 

Saturday, 8 June 2019

ආණ්ඩු දෙකක් එක්ක පුළුවන් ද?

ආණ්ඩු දෙකක් එක්ක පුළුවන් ද? 

දහනවවැනි ව්‍යවස්ථා සංශෝධනයේ රඟ දැන් කාටත් පේන්න ඕන. ඒ සංශෝධනයට ඡන්දය දුන් සියල්ලන් ම අද රටේ තත්වයට වග කියන්න ඕන. අද රටේ ආණ්ඩුවක් නැහැ. ආණ්ඩු දෙකක් තියෙනවා. එක ආණ්ඩුවක් කරන දේ අනෙක් ආණ්ඩුව නිශේධ කරන්න හදනවා. පාර්ලිමේන්තුව කෝළම් මඩුවක් වෙලා. ඒත් පාර්ලිමේන්තුව විසුරුවා හරින්න ජනාධිපතිට බැහැ. පාර්ලිමේන්තුව යෝජනාවක් සම්මත කරල විසුරුවා හරින්නට කටයුතු කරාවි කියල හිතන්න බැහැ.  එ ජා පෙරමුණ එවැනි යෝජනාවකට ඡන්දය දෙන එකක් නැහැ.

Friday, 7 June 2019

ඇදිල්ල හා ඇන්දිල්ල

ඇදිල්ල හා ඇන්දිල්ල 


පොලිටික්ස් යන්නෙහි ග්‍රීක නිරුක්තිය ජනතාව හා සම්බන්ධයි. එය දේශපාලනය වශයෙන් සිංහලට පරිවර්තනය වී තිබෙනවා. මොන අර්ථයෙන් ගත්තත් මේ රටේ දේශපාලනයක් කෙරෙන්නේ නැහැ. ජනතාවගේ සුභසිද්ධියට වැඩක් කෙරෙන්නෙත් නැහැ. මෙහි ඇත්තේ ඉතාමත් ජරාජීර්ණ අර්ථයකින් පොලිටික්ස් කිරීමක්. එනම් තම වාසියට ජනතාව හැසිරවීමක්, මෙහෙයවීමක්.  සාමාන්‍ය විධියට කියනවා නම් තම වාසිය සඳහා ජනතාව ගොනාට ඇන්දවීමක්. 

Thursday, 6 June 2019

ගෝඨාභය ආවත් නැතත්

ගෝඨාභය ආවත් නැතත්

ජාතික හා වාම කේන්ද්‍ර කඳවුර ජනාධිපතිවරණයට සූදානම් ද? මා මේ ප්‍රශ්නය අසන්නේ ශ්‍රී ල නි ප, පොහොට්ටුව, ම එ පෙ, ජා නි පෙ, පි හෙ උරුමය ආදී පක්‍ෂ කිසිවක් ඒ ගැන පැහැදිලි පිළිතුරක් නොදෙන නිසයි. ල ස ස ප, කො පක්‍ෂය කතා කළත් වැඩක් නැහැ. ඒ පක්‍ෂ අද ඇත්තේ මළවුන් අතර. 

Wednesday, 5 June 2019

රාමළාන් හඳ

රාමළාන් හඳ 


අද රාමළාන්. ඒත් මා හඳ බලන්න පාතිමාට එන්න කියන්නේ නැහැ. එයට ප්‍රධාන හේතුව මගේ භාර්යාව සමගවත් හඳ බලන්න මගේ වයස අනුව හිතෙන්නෙ නැති නිසා. දෙවනුව හඳ බැලීමෙන් පමණක් සිංහල - මුස්ලිම් සහජීවනයක් (ඊනියා සංහිඳියාවක් නොව) ඇති කරන්න බැරි නිසා. ජඩමාධ්‍ය සුපුරුදු පරිදි මේ අදහස්වලට ප්‍රචාරයක් නොදේවි. දැන් පෝය හැටකට වැඩි කාලයක් ජනමාධ්‍ය මා අත්හැර ගොස්. ඊයේ මට කුලියාපිටියේ දී අවුරුදු තිහකට පමණ පසු හමු වූ අයකු ඇසුවේ මා දැන් නිහඬ ඇයි කියා. මා නිහඬ නැති බවත් ඒත් මගේ හඬ පිටවන්නට ඉඩක් නැති බවත් මා කී විට ඔහුට මා කියන දේ තේරුම් ගියා. එහෙත් මා කියන දේ සමාජයට නොගිහින් තියෙන්නේ නැහැ. ජඩමාධ්‍ය කුමක් කළත් ඒ අදහස් රටට යනවා.

Tuesday, 4 June 2019

මෙල්බර්න් රණවිරු සමරු කතාව


මෙල්බර්න් රණවිරු සමරු කතාව 


සති අග අරුණේ පළ වූ මෙල්බර්න් රණවිරු සමරු කතාව 


පාස්කු ප්‍රහාරයට පසු පාස්කු නාට්‍යය


පාස්කු ප්‍රහාරයට පසු පාස්කු නාට්‍යය
පාස්කු නාට්‍ය සාමාන්‍යයෙන් කතෝලික ප්‍රදේශවල රඟ දැක්වෙනවා. අද පාස්කු නාට්‍යය ලංකාව පුරා ම රඟ දැක්වෙනවා. අසාද් සාලි හා හිස්බුල්ලා මෛත්‍රිපාලගෙන් ඉල්ලා සිටියා ඥානසාර හිමියන් නිදහස් කරන ලෙස. ඒ ඉල්ලීමට ම නොවූවත් ඥානසාර හිමි නිදහස් කෙරුණා. රතන හිමියන් අසාද් සාලි හිස්බුල්ලා මෙන් ම බද්‍යුද්දීන් ද තනතුරුවලින් ඉවත් කරන ලෙස ඉල්ලමින් ඊනියා අඛණ්ඩ උපවාසයක් ඇරඹුවා. ඥානසාර හිිමියන් රතන හිමියන්ට සහයෝගය දක්වමින් තමන්වහන්සේ නිදහස් කරන ලෙස ඉල්ලා සිටි අසාද් සාලි හා හිස්බුල්ලා ඉවත් කරන මෙන් ඉල්ලා නුවර සිට කොළඹට පාද යාත්‍රාවක් ඇරඹුවා. පාද යාත්‍රාව ගැටඹෙට එනකොට අසාද් සාලි හා හිස්බුල්ලා තම තනතුරුවලින් ඉල්ලා අස්වුණා. පාද යාත්‍රාවත් උපවාසයත් නැවතුණා. නුවර ඇසළ පෙරහැරෙන් පසු දවල් පෙරහැර දිය කපන්න එන්නෙත් ගැටඹෙට. තාම පොසොන් මාසෙ ලැබුව විතරයි. 

Monday, 3 June 2019

මෙල්බර්න් දේශන

මෙල්බර්න් දේශන



තවත් මෙල්බර්න් දේශනයක පළමුවැනි කොටස


https://www.facebook.com/SLMelbourneEkamuthuwa/videos/559154731157793/

රූහඬපටයක පළමු කොටස.

රූහඬපටයක පළමු කොටස




මෙල්බර්න් හා සිඩ්නි නුවරවල මා ගත කළ සති කිහිපයෙහි හඬපට හා රූහඬපට හත අටක් නිෂ්පාදනය වුණා. එමෙන් ම රැස්වීම් ගණනාවක කතා කිරීමටත් ආරාධනය කෙරුණා. ඒ ලංකාවේ අවුරුදු පහකට ලැබෙන අවස්ථාවලට වැඩියි. මෙහි ඇත්තේ එක් රූහඬපටයක පළමු කොටසයි.


https://www.facebook.com/sannasatv/videos/1336551906492509/
  

හිස්බුල්ලා බද්‍යුද්දීන් අත්අඩංගුවට නොගන්නේ ඇයි?

හිස්බුල්ලා බද්‍යුද්දීන් අත්අඩංගුවට නොගන්නේ ඇයි?

රතන හිමියන්ගේ උපවාසයෙන් පැහැදිලි වන කරුණ සිංහලයන්ට නායකත්වයක් නැති කමයි. ඒ උපවාසය බලන්න යන දේශපාලනඥයන්ට ඔවුන් මොන අරමුණෙන් එහි ගියත් කිසි දිනෙක ඒ නායකත්වයට පත් වෙන්න බැහැ.  ඒ කියන්නේ උපවාසය බලන්න නොගිය දේශපාලනඥයන්ට ඒ නායකත්වය හිමි වේය යන්න නො වෙයි. සිංහල ජනතාව ආගම් පක්‍ෂ භේදයකින් තොරව රතන හිමියන් බැලීමට ගොස් කියන්නේ එක ම එක කරුණක් පමණයි. ඒ අර ඇතැම් ත්‍රිරෝද රථයක කියවන්න ලැබෙන ආකාරයට අපි අසරණ වෙලා බුදුහාමුදුරුවනේ යන්නයි. දැන් කසිකබල් පඬියන් කියන්න පුළුවන් බුදුහාමුදුරුවන්ට සරණ වෙන්න බැහැ කියල. පඬියන් දන්න සිංහල බෞද්ධ සංස්කෘතියක් නැහැ. ඔවුන් හිතන්නෙ ඊනියා බෞද්ධ දර්ශනයක් ගැන. නැහැ බෞද්ධ දර්ශනය කියල එකක් නැහැ. සියළු දර්ශන පට්ටපල් බොරු.

Sunday, 2 June 2019

ජාතිකත්වයේ අපේක්‍ෂකයා

ජාතිකත්වයේ අපේක්‍ෂකයා

අසාද් සාලි, හිස්බුල්ලා, රිෂාඩ් බද්‍යුද්දීන් ඉවත් කිරීම ඉතා වැදගත්. ඒ බව ජනතාව කියන්නේ මාසයකටත් වැඩි කාලයක් තිස්සේ. රතන හිමියන් සෑම විටක ම මෙන් මෙවර ද දේශපාලන වාසි සඳහා ප්‍රශ්නය දඩමීමා කරගන්න හදනවා. ඕමල්පේ සෝභිත හාමුදුරුවොත් උපවාසයට දිරි දෙන්න වැඩම කරලා. මේ හාමුදුරුවරු දේශපාලන පක්‍ෂවල සාමාජිකයන් වුණු පාර්ලිමේන්තු මන්ත්‍රීවරු වෙච්ච හාමුදුරුවරු. එය සිංහල බෞද්ධ සම්ප්‍රදායට විරුද්ධයි. සිංහල බෞද්ධ සම්ප්‍රදායේ හාමුදුරුවරු පාලකයන් වෙන්න ගියේ නැහැ. උන්වහන්සේ පාලකයන්ට අනුශාසනා කළා, ඒ අතර ඇතැම් අවස්ථාවල පාලකයන් ද තැනුවා. එහෙත් පාලකයන් වුණේ නැහැ. රාජසභාවේ සාමාජිකයන් වහන්සේ වුණෙත් නැහැ. 

Saturday, 1 June 2019

ජනතාව රවටන දේශපාලනඥයෝ හා ජඩමාධ්‍ය

ජනතාව රවටන දේශපාලනඥයෝ හා ජඩමාධ්‍ය 



ඊනියා සංහිඳියාව කියන එක අද නැත්තට ම නැති වෙලා. මෛත්‍රිපාල හා රනිල් අතරත් සංහිඳියාවක් නැහැ. ඒ නැති වෙලා දැන් අවුරුදු තුනකට වැඩියි. එදා සිට ඇත්තේ ආණ්ඩු දෙකක්. ඒ බව තේරුම් ගැනීමට ඒකාබද්ධ විපක්‍ෂයට බැරි වුණා. රනිල් ඉවත් කිරීම ප්‍රධාන කටයුත්ත බවට පත් වී තිබිය දී ඒකාබද්ධ විපක්‍ෂයේ ඇතැමුන් රනිල් රැක්කා. අවසානයේ දී බැරි ම තැන මහින්ද අගමැති කිරීමට සිදු වුණා. එහෙත් ඒ ඔක්තෝම්බර් විසිහය ආණ්ඩුව රැක ගැනීමට එකී ඒකාබද්ධ විපක්‍ෂයේ ම ඇතැමුන් උත්සාහ ගත්තේ නැහැ. ඔවුන්ට වඩා අවශ්‍ය වූයේ රිෂාඩ් බද්‍යුද්දීන්ගේ පක්‍ෂය රැක  ගැනීම.